بۇگىن استانادا نۇرعيسا تىلەنديەۆ اتىنداعى «ءوز ەلىم» اتتى V مۋزىكالىق فەستيۆال باستالادى. انشىلەر, دومبىراشىلار جانە ديريجەرلار اراسىندا ۇيىمداستىرىلاتىن بايقاۋعا ەلىمىزدىڭ تۇكپىر-تۇكپىرىنەن جانە رەسەيدەن كەلگەن 16-35 جاس ارالىعىنداعى ۇمىتكەرلەر قاتىسادى. جاس مۋزىكانتتار ءۇش اتالىم بويىنشا ەكى اينالىمنان تۇراتىن دودادا بىرنەشە كۇن بويى ونەر جارىستىرادى. فەستيۆال جەڭىمپازدارى 1 ءساۋىر كۇنى «استانا» كونتسەرت زالىندا وتەتىن «تاماشا انمەن كەلىپ ەدى كوكتەمدە» اتاۋىن يەلەنگەن گالا-كونتسەرتتە ماراپاتتالادى.
بيىلعى بايقاۋدىڭ قازىلار القاسىنىڭ قۇرامىنا جەزتاڭداي, كۇمىس كومەي انشىلەرىمىز بيبىگۇل تولەگەنوۆا مەن نۇرجامال ۇسەنباەۆا, بەلگىلى مۋزىكانتتار, قر ەڭبەك سىڭىرگەن قايراتكەرلەرى – ايتقالي جايىموۆ, سەكەن تۇرىسبەك, ءبىلال ىسقاقوۆ, ەرمۇرات ۇسەنوۆ, ۇلان كەنجەبەكوۆ, دۇيسەن كۇشىكباەۆ, نۇرلان جاراسوۆ, قر ەڭبەك سىڭىرگەن ارتىستەرى – ازامات جىلتىركوزوۆ, جەكسەن نۇرجاۋوۆ كىرىپ وتىر. سونداي-اق, ۇمىتكەرلەردى بولگاريانىڭ حالىق ءارتىسى ورلين گورانوۆ, رف ەڭبەك سىڭىرگەن ءارتىسى, پروفەسسور اناتولي لەۆين, تانىمال ديريجەر دوريان ۋيلسون (اقش) باعالايدى.
باس جۇلدەگەرگە استانا قالاسى اكىمىنىڭ كۋبوگى تاپسىرىلادى. بۇدان وزگە بايقاۋدا وزىپ شىققاندار گران-پري جۇلدەسىمەن جانە فەستيۆال لاۋرەاتى اتاعىمەن ماراپاتتالادى. كونكۋرسانتتارعا ادەتتەگى ەكىنشى, ءۇشىنشى سىيلىقتار بەرىلىپ, اتاۋلى توسبەلگىلەر دە تابىستالادى.
گالا-كونتسەرتتە بايقاۋ جەڭىمپازدارىمەن قاتار, استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ قازاق وركەسترى مەن سيمفونيالىق وركەسترى, كامەرالىق حورى ونەر كورسەتەدى. سونداي-اق, بيبىگۇل تولەگەنوۆا, نۇرعالي ءنۇسىپجانوۆ, نۇرجامال ۇسەنباەۆا, باعدات سامەدينوۆا, ايگۇل ۇلكەنباەۆا, ايگۇل قوسانوۆا, ازامات جىلتىركوزوۆ, ايزادا كاپونوۆا قاتىسادى.
امانعالي قالجانوۆ, استانا اقشامى
