كەشە استاناداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ جاڭا XXVIII ماۋسىمى جىلداعى داستۇرگە ساي قازاقستاننىڭ ەڭبەك سىڭىرگەن قايراتكەرى, رەجيسسەر الىمبەك ورازبەكوۆ قويعان «اباي» تراگەدياسىمەن اشىلدى. بۇل ماۋسىم تەاتر ەسىمىن ەنشىلەپ وتىرعان ساحنا ساڭلاعى, قازاق ۇلتتىق كاسىبي تەاتر ونەرىنىڭ نەگىزىن قالاۋشىلاردىڭ ءبىرى, كسرو حالىق ءارتىسى, كسرو مەملەكەتتىك سىيلىعىنىڭ لاۋرەاتى قاليبەك قۋانىشباەۆتىڭ تۋعانىنا 125 جىل تولۋىمەن تۇسپا-تۇس كەلىپ وتىر.
جىلدا تەاتر ماۋسىمىنىڭ «اباي» سپەكتاكلىمەن اشىلۋىنىڭ وزىندىك ۇلكەن سەبەبى بار. اباي بەينەسىن ساحناعا العاش الىپ شىققان قاليبەك قۋانىشباەۆ بولاتىن. زامانداستارى قاللەكي اتاپ كەتكەن ايگىلى ءارتىستىڭ وسى ءرولىن تۋىندى اۆتورى, زاڭعار جازۋشى مۇحتار اۋەزوۆتىڭ ءوزى جوعارى باعالادى. سوندىقتان قويىلىمدى ساحنالاۋ قاللەكيلىكتەرگە ۇلكەن جاۋاپكەرشىلىك جۇكتەيدى.
سپەكتاكلدەن ەكى ابايدى كورۋگە بولادى. تولىسقان, كەمەلدەنگەن اباي بەينەسىن – قازاقستاننىڭ حالىق ءارتىسى تىلەكتەس مەيراموۆ سومداسا, جاستاۋ, البىرتتاۋ ابايدى – قازاقستاننىڭ ەڭبەك سىڭىرگەن قايراتكەرى نۇركەن وتەۋىلوۆ وينايدى.
جالپى بيىل قاللەكي تەاترى ەلوردانىڭ 20 جىلدىق مەرەيتويىنا ارنالعان استانا قالاسىنىڭ ەل وڭىرلەرىندەگى مادەني كۇندەرى كەزىندە ايماقتار تۇرعىندارىنا رەپەرتۋارىنداعى ۇزدىك قويىلىمدارىن ۇسىندى. سونىڭ ىشىندە الماتىدا «وتەللو», «شيە» جانە «قاراش-قاراش» قويىلىمدارىن قويدى. وسى شاھاردا تىلەكتەس مەيراموۆتىڭ 70 جىلدىعىنا وراي ءارتىستىڭ شىعارماشىلىق كەشى ءوتىپ, «قارداعى كوگەرشىننىڭ ءىزى…» قويىلىمىنىڭ پرەمەراسى ءوتتى. سپەكتاكلدىڭ العاشقى كورسەتىلىمى قازاقستان تەاترلارى اسسوتسياتسياسى قولداۋىمەن مەرەيتوي يەسىنىڭ العاشقى ۇلكەن ساحناسى – م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ءوتتى. پرەمەرانىڭ ارنايى كورسەتىلىمى تىلەكتەس مەيراموۆتىڭ تۋعان جەرى قاراعاندى وڭىرىندە جالعاستى. ەلوردا تورىندەگى مەرەيتوي قاراشا ايىنا جوسپارلانىپ وتىر.
ال قاللەكيلىكتەر وتكەن ماۋسىمدا سەرىك تۇرعىنبەكۇلىنىڭ «ءشامشى» ەلەگياسى (رەجيسسەرى قر ەڭبەك سىڭىرگەن قايراتكەرى بولات ۇزاقوۆ), ايدىن سالباننىڭ «ويىنشىقتار ويانعاندا» ەرتەگىسى (فارحات مولداعالي), ۋيليام شەكسپيردىڭ «وتەللو» تراگەدياسى (قازاقستاننىڭ حالىق ءارتىسى تالعات تەمەنوۆ) جانە كەن كيزيدىڭ «7+1» دراماسى (قازاقستاننىڭ ەڭبەك سىڭىرگەن قايراتكەرى الىمبەك ورازبەكوۆ) سىندى ءتورت پرەمەرا وتكىزدى.
جاڭا ماۋسىمدا دا بۇل ۇجىم قىزىقتى پرەمەرالار ۇسىنباق.
