استانا قالاسى ءماسليحاتىنىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيانىڭ وتىرىسى ءوتتى.
جيىنعا «استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى» مم باسشىسىنىڭ ورىنباسارى گۇلميرا ەرمولدينا, قالالىق «كولىك جانە جول-كولىك ينفراقۇرىلىمىن دامىتۋ باسقارماسى» مم باسشىسىنىڭ ورىنباسارى ءاليحان قۋاتبەكوۆ, قالالىق «قوعامدىق دامۋ ىستەرى جونىندەگى باسقارماسى» مم باسشىسى دانيار ەسين قاتىستى.
ءىس-شارا بارىسىندا ءسوز العان گۇلميرا ەرمولدينا قازىرگى ۋاقىتتا جالپى سوماسى 2,9 ترلن تەڭگەنى قۇرايتىن 190 جوبا جۇزەگە اسىرىلىپ جاتقانىن ءمالىم ەتتى. بەلگىلى بولعانداي, ونىڭ ىشىندە 44 جوباعا شەتەلدىك ينۆەستورلار مەن ترانسۇلتتىق كومپانيالار اتسالىسۋدا.
– جۇيەلى جۇمىستىڭ ناتيجەسىندە 192 ملرد تەڭگەنى قۇرايتىن 52 جوبا پايدالانۋعا بەرىلىپ, 4100 جۇمىس ورنى اشىلدى. سونداي-اق, قۇنى 2,3 ترلن تەڭگە بولاتىن 121 جوبانىڭ قۇرىلىسى ءجۇرىپ جاتىر. مۇندا 12 مىڭ تۇراقتى جۇمىس ورنىن اشۋ جوسپارلانىپ وتىر. ال قالعانى ازىرگە جوبالانۋ ساتىسىندا, – دەدى «استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى» مم باسشىسىنىڭ ورىنباسارى.
كەزدەسۋ بارىسىندا ءسوز العان دانيار ەسين ءوزى جەتەكشىلىك ەتىپ وتىرعان باسقارمانىڭ جۇمىسى مەملەكەتتىك ساياساتتىڭ نەگىزگى باعىتتارىن قامتۋعا باعىتتالعانىن ايتىپ ءوتتى. ال نەگىزگى باعىتتاردىڭ ءبىرى استانادا شاعىن جانە ورتا بيزنەستى دامىتۋ بولىپ وتىر ەكەن. وسى رەتتە قوعامدىق دامۋ ىستەرى جونىندەگى باسقارمانىڭ باستاماسىمەن ەلىمىزدەگى باق بەتتەرىندە بيزنەستى ناسيحاتتاۋعا بايلانىستى 76 ماتەريال جاريالانىپتى. ءسوز اراسىندا ول سوڭعى ۋاقىتتا ەلوردالىقتاردىڭ ءوز كاسىبىن اشۋعا دەگەن قىزىعۋشىلىقتارى ارتىپ كەلە جاتقانىن ەرەكشە اتاپ ءوتتى.
