نۇر-سۇلتان قالاسى ءماسليحاتىنىڭ كەزەكتەن تىس سەسسياسىندا شاھاردىڭ بىرقاتار باسقارمالارىنا قوسىمشا قارجى ءبولۋ, ورتا مەكتەپتەر مەن بالاباقشالار قۇرىلىسى ماسەلەلەرى قارالدى. ءماسليحات حاتشىسى ەرلان كاناليموۆتىڭ توراعالىعىمەن وتكەن سەسسياعا پارلامەنت ءماجىلىسىنىڭ دەپۋتاتى لاريسا پاۆلوۆەتس جانە ەلوردا اكىمىنىڭ ورىنباسارى اسقار امرين قاتىستى.
قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆ جەرگىلىكتى بيۋدجەت كىرىستەرىنە سۇيەنە وتىرىپ, قالا بيۋدجەتىنىڭ شىعىس بولىگى قالىپتاستىرىلعانىن باياندادى. قالا تۇرعىندارى ءۇشىن قىزمەتتەردىڭ ساپاسى مەن قولجەتىمدىلىگىن قامتاماسىز ەتۋدى ەسكەرە وتىرىپ, قوسىمشا قارجىنى الەۋمەتتىك سالاعا, ءبىلىم بەرۋگە, دەنساۋلىق ساقتاۋعا باعىتتاۋ جوسپارلاعانىن ايتتى.
قوعامدىق دەنساۋلىق ساقتاۋ باسقارماسىنا كوروناۆيرۋسقا قارسى ۆاكتسيناتسيا جانە رەۆاكتسيناتسيا بويىنشا اقپاراتتىق-ءتۇسىندىرۋ ماتەريالدارىن ازىرلەۋگە, دەربەس جىلىتۋ بويىنشا شىعىستارعا, ۆەدومستۆولىق باعىنىستى ۇيىمداردى كۇردەلى جوندەۋگە قوسىمشا قاراجات كوزدەلگەن.
ءبىلىم باسقارماسىنا مۇعالىمدەردىڭ جالاقىسىنا, 1-4 سىنىپ وقۋشىلارىن ىستىق تاماقپەن قامتاماسىز ەتۋگە, مەكتەپكە دەيىنگى ءبىلىم بەرۋ ۇيىمدارىندا مەملەكەتتىك ءبىلىم بەرۋ تاپسىرىسىن ورنالاستىرۋعا قاراستىرىلعان. مادەنيەت باسقارماسىنا ۇيىرمەلەرگە قاتىساتىن بالالاردىڭ سانىن ارتتىرۋ, م.گوركي اتىنداعى مەملەكەتتىك اكادەميالىق ورىس دراما تەاترىنىڭ عيماراتىن جوندەۋگە جانە رەستاۆراتسيالاۋعا بولىنبەك.
دەنە شىنىقتىرۋ جانە سپورت باسقارماسىنا سپورتشىلاردىڭ ءىسساپار شىعىستارىنا, جان باسىنا قارجىلاندىرۋ بويىنشا مەملەكەتتىك تاپسىرىستى ىسكە اسىرۋعا, سپورتتىق ءىس-شارالاردى وتكىزۋگە كوزدەلگەن. ال كولىك جانە جول-كولىك ينفراقۇرىلىمىن دامىتۋ باسقارماسىنا الەۋمەتتىك ماڭىزى بار ىشكى قاتىناستار بويىنشا جولاۋشىلار تاسىمالىن سۋبسيديالاۋعا قوسىمشا قارجى قاراستىرىلعان. ساۋلەت, قالا قۇرىلىسى جانە جەر قاتىناستارى باسقارماسىنا ەلوردانىڭ 2025 جىلعا دەيىنگى باس جوسپارىن ازىرلەۋگە, قالانىڭ گەولوكاتسيالىق پورتالىن سۇيەمەلدەۋگە, قۇرىلىس باسقارماسىنا كوپپاتەرلى تۇرعىن ءۇي كەشەنى قۇرىلىسىن اياقتاۋعا قوسىمشا قاراجات كوزدەلگەن.
مەكتەپتەر مەن بالاباقشالار قۇرىلىسى بويىنشا ءبىلىم باسقارماسى باسشىسىنىڭ مىندەتىن اتقارۋشى ناريمان ەلامانوۆ بايانداما جاسادى. ءماسليحات دەپۋتاتتارى سۇراقتار قويدى. قالا اكىمىنىڭ ورىنباسارى اسقار امرين كەيبىر ماسەلەلەردى ءتۇسىندىردى.
