استانا قالاسىنىڭ ءماسليحاتىندا «ادىلەت» تۇتىنۋشىلاردىڭ قۇقىقتارىن قورعاۋ قوعامدىق بىرلەستىگىنىڭ توراعاسى ەركىن تومپيەۆتىڭ 70 جىلدىق مەرەيتويىنا ارنالعان سالتاناتتى جيىن ءوتتى.
قوعامدىق بىرلەستىك ءتوراعاسى, اكادەميك, مەديتسينا عىلىمدارىنىڭ كانديداتى, بىرنەشە مەملەكەتتىك ناگرادا يەسى ەركىن تومپيەۆتىڭ قۇرمەتىنە ۇيىمداستىرىلعان سالتاناتتى جينالىسقا قر ساۋدا جانە ينتەگراتسيا مينيسترلىگى تۇتىنۋشىلاردىڭ قۇقىقتارىن قورعاۋ كوميتەتىنىڭ توراعاسى اسقار تىنىسبەكوۆ, استانا قالاسى اكىمىنىڭ ورىنباسارى ەۆگەني گلوتوۆ, استانا قالاسى ءماسليحاتىنىڭ توراعاسى ەرلان كاناليموۆ, ءماسليحات دەپۋتاتتارى, استانا قالاسىنىڭ ارداگەرلەر كەڭەسى جانە باسقا دا قوعامدىق بىرلەستىك وكىلدەرى مەن ۇجىمداس ارىپتەستەرى شاقىرىلدى. مەرەيتوي يەسىنە جينالعاندار جىلى لەبىزىن ءبىلدىردى.
«يگىلىكتى ىستەردىڭ ۇيىتقىسى بولىپ جۇرگەن, قىزمەت جولىن ومىرلىك ۇستانىمىنا اينالدىرعان ەركىن قاليۇلىنىڭ ومىرلىك جولى – كوپكە ۇلگى, ونىڭ جاستارعا ايتارى دا جوق ەمەس. ءالى كۇنگە دەيىن قالا ومىرىنە بەلسەنە ارالاسىپ, تاجىريبەسىمەن ءبولىسىپ ءجۇر» دەدى قالالىق ءماسليحات توراعاسى ەرلان كاناليموۆ.
ول مەرەيتوي يەسىن وسى اتاۋلى كۇنمەن قۇتتىقتاپ, ەلوردالىق حالىق قالاۋلىلارى اتىنان العىسىن ءبىلدىردى.
استانا قالاسىنىڭ اكىمىنىڭ ورىنباسارى ەۆگەني گلوتوۆ ۋاقىتپەن ساناسپاي دەنساۋلىق كۇزەتىندە ءجۇرىپ, دەرتىنە شيپا ىزدەپ كەلگەن ناۋقاستاردى دەرتىنەن ايىقتىرىپ, حالىقتىڭ العىسىن ارقالاپ كەلە جاتقان مارتەبەلى ماماندىق يەسى ەكەنىن اتاپ ءوتىپ, قالا اكىمى اتىنان العىس حاتپەن ماراپاتتادى. ساۋدا سالاسىندا حالىقتى الداۋ نە الاياقتىق سىندى ءالى دە شەشىلمەگەن ماسەلەلەر بار. وعان قاتىستى تۇتىنۋشىلاردان كەلگەن مىڭداعان ءوتىنىش پەن شاعىمدى استانا قالاسى «ادىلەت» تۇتىنۋشىلاردىڭ قۇقىقتارىن قورعاۋ قوعامى قوعامدىق بىرلەستىگىنىڭ توراعاسى ەركىن تومپيەۆ ۇزاق جىلدار بويى ايانباي ەڭبەك ەتىپ, قوعامنىڭ قۇقىقتىق ساۋاتىنىڭ ارتۋىنا اۋقىمدى ۇلەس قوستى. جەتىستىكتەرى مەن ادالدىعى ءۇشىن لايىقتى مەملەكەتتىك ناگرادالارمەن ماراپاتتالعان. ونىڭ بەدەلى مىڭداعان تۇتىنۋشىلاردىڭ قۇرمەتىنە جانە سەنىمىنە يە بولدى. بىرلەستىك باستاۋىمەن 30 جىلدا 100 مىڭنان استام ازاماتقا كومەك كورسەتىلىپ, جالپى سوماسى 1 ملرد تەڭگە كولەمىندەگى قارجى استانالىق تۇتىنۋشىلارعا قايتارىلدى. ول تۋرالى قر سيم تۇتىنۋشىلاردىڭ قۇقىقتارىن قورعاۋ كوميتەتىنىڭ توراعاسى ا.تىنىسبەكوۆ:
«باي تاجىريبەمەن ءسىز ازاماتتاردىڭ ءاربىر وتىنىشىنە نازار اۋدارا وتىرىپ, قوعامعا زور كومەك كورسەتىپ كەلەسىز. جالپى 48 جىلدىق ەڭبەك جولىندا ءسىز تۇتىنۋشىلاردىڭ قۇقىعىن قورعاۋ سالاسىنا 30 جىل ارنادىڭىز. قىزمەت بارىسىندا دەنساۋلىق ساقتاۋ مينيسترلىگىنە تۇتىنۋشىلاردىڭ قۇقىعىن قورعاۋ بويىنشا جوبالاردى ەنگىزىپ, ۇسىنىستار ەنگىزدىڭىز, كاسىبيلىگىڭىز ءۇشىن وردەنمەن جانە «ەڭبەك ارداگەرى» مەدالىمەن ماراپاتتالدىڭىز. سونداي-اق قازىر قر تۇتىنۋشىلاردىڭ قۇقىعىن قورعاۋ جونىندەگى زاڭ جوباسىن ازىرلەۋ جونىندەگى جۇمىس توبىنىڭ مۇشەسىسىز. ءسىزدىڭ ادىلدىك پەن تۇتىنۋشىلارعا دەگەن قامقورلىققا تولى جۇمىسىڭىز ءبارىمىزدى ۇلكەن جەتىستىكتەرگە جەتۋگە شابىتتاندىرادى. ءبىز ءسىزدىڭ ءىس-ارەكەتىڭىزدى جۇزەگە اسىرعان كاسىبيلىگىڭىز بەن جانقيارلىعىڭىز ءۇشىن شىن جۇرەكتەن العىس ايتامىز. كوشباسشىلىعىڭىز كوپشىلىككە ۇلگى, ادامدارعا دەگەن شىنايى مەيىرىم مەن قامقورلىق ءسىز كومەكتەسكەن مىڭداعان تۇتىنۋشىنىڭ جۇرەگىندە قالدى» دەدى.
قۇتتىقتاۋ ءسوز بارىسىندا ول قر سيم ءمينيسترى ا.شاكقاليۆتىڭ تۇتىنۋشىلاردىڭ قۇقىعىن ۇزاق جىل بويى ساۋاتتى قورعاپ جۇرگەن قوعامدىق بىرلەستىك توراعاسىنا العىسىن جەتكىزىپ, قازاقستان رەسپۋبليكاسى ساۋدا جانە ينتەگراتسيا مينيسترلىگىنىڭ 02.04.2024 جىلعى №162-نق بۇيرىعىنا سايكەس, ەركىن قاليۇلىن تۇتىنۋشىلاردىڭ قۇقىعىن قورعاۋ سالاسى مەن ساۋدا سالاسىنداعى كورسەتكەن كاسىبيلىگى ءۇشىن «ەڭبەك سىڭىرگەن ساۋدا قىزمەتكەرى» توسبەلگىسىمەن ماراپاتتادى.
