ەلورداداعى وقۋشىلار اراسىندا «ROBOARENA–2024» روبوتوتەحنيكادان قالالىق جارىس ءوتتى. وعان جالپى ءبىلىم بەرەتىن 83 مەكەمەدەن 84 كوماندا, 84 تالاپكەر قاتىستى.
سايىس استانا قالالىق اكىمدىگىنىڭ ءبىلىم باسقارماسى, «تەحنيكالىق شىعارماشىلىق ورتالىعى» ۇيىمداستىرۋىمەن ء“بىلىم پارك” عيماراتىندا وتكىزىلدى. جارىس دەمەۋشىسى – “اتامنىڭ اماناتى” قوعامدىق قورى.وقۋشىلار «لابيرينت»,«ينتەللەكتۋالدى سۋمو», «سىزىق بويىمەن ءجۇرۋ», «روبوگەومەتريا» باعىتتارى بويىنشا باق سىنادى.
– ROBOARENA–2024» قالالىق جارىسى بيىل ءتورتىنشى رەت وسىنداي اتاۋمەن ۇيىمداستىرىلدى, وسى سايىس قازاقستان رەسپۋبليكاسى ءماجىلىسىنىڭ 30 جىلدىعىنا ارنالىپ وتىر. مۇنداي جارىس, دودالار روبوتوتەحنيكا, ينجەنەريا جانە باعدارلامالاۋ سالالارىندا دارىندى بالالاردى انىقتاۋ جانە ولاردى قولداۋ ءۇشىن قاجەت. جاستار اراسىندا تەحنيكالىق ماماندىقتاردى تانىمال ەتۋ, بولاشاق وندىرىسكە قاجەت مامانداردىڭ نەگىزىن جاسايتىن داعدىنى قالىپتاستىرادى, سول ارقىلى ەڭبەك نارىعىندا جوعارى سۇرانىسقا يە, كەرەك مامان يەسى بولا الادى, – دەيدى جارىستى ۇيىمداستىرۋشىنىڭ ءبىرى, وسى كاسىپتىك ءبىلىم بەرۋ سالاسىندا 40 جىلداي ەڭبەك ەتكەن پەداگوگ, استانا قالاسى اكىمدىگىنىڭ تەحنيكالىق جانە كوركەم شىعارماشىلىق ورتالىعىنىڭ ديرەكتورى قاناعات چاراحمەتوۆ.
– روبوتوتەحنيكا ءارتۇرلى كوپتەگەن باعىتتاردى قامتيدى. جاساندى ينتەللەكت جانە روبوتوتەحنيكا سالاسىنداعى جىلدام جەتىستىكتەر ارقىلى ماشينالار ادام جۇمىسىنىڭ كوبىنىڭ ورنىنا ءوتۋى مۇمكىن. وسىنداي جاڭا تەحنولوگيامەن اينالىسقان جاستار تەحنيكانى جاساپ كورىپ, قولدانىپ كورىپ, جارىسقا قاتىسۋى كەرەمەت اسەر سىيلاپ, بالانىڭ بولاشاعىنا قىزمەت ەتەدى. شامامەن 6-7 سىنىپتاردا وقۋشىلار روبوتوتەحنيكادا جاقسى ناتيجە كورسەتەدى,-دەيدى «Astana Polytechnic» جوعارى كوللەدجى ديرەكتورىنىڭ ورىنباسارى سامير كاريموۆ.
كاسىپتىك ءبىلىم بەرەتىن كوللەدجدە ەڭ جوعارى سۇرانىسقا يە ماماندىقتار: «اقپاراتتىق قاۋىپسىزدىك جۇيەلەرى», «مەحاترونيكا», IT, «ديزاين, ازاماتتىق عيماراتتاردى جوبالاۋ, قالپىنا كەلتىرۋ, قايتا قۇرۋ», «باعدارلامالىق قامتاماسىز ەتۋ», «اۆتوموبيل كولىگىنە تەحنيكالىق قىزمەت كورسەتۋ, جوندەۋ جانە پايدالانۋ» ەكەنى تۇسىنىكتى.
روبوتوتەحنيكا – بۇل زامان تالابى. قازىر ەلدە 3000-عا جۋىق مەكتەپ روبوتوتەحنيكا كابينەتتەرىمەن جابدىقتالعان. استانا مەكتەپتەرىنىڭ وقۋشىلارى دا قالالىق, رەسپۋبليكالىق, حالىقارالىق بايقاۋلاردا توپ جارىپ ءجۇر.
«ROBOARENA–2024» قالالىق جالپى ءبىلىم بەرۋ مەكەمەلەرىنىڭ وقۋشىلارى اراسىندا روبوتوتەحنيكادان جارىس عىلىمي-زەرتتەۋ جۇمىستارىن دامىتۋ, جاستار مەن جاسوسپىرىمدەر اراسىندا تەحنيكالىق شىعارماشىلىق جانە ينجەنەرلىك كاسىپتىڭ بەدەلىن ارتتىرۋ, سونىمەن قاتار سپورتتىق جانە روبوتوتەحنيكا سالاسىن كەڭىنەن ناسيحاتتاۋ بولسا, جارىسقا قاتىسۋشى وقۋشىلاردىڭ پىكىرىن سۇراعان ەدىك.
– مەن بىلتىردان بەرى وسى روبوتوتەحنيكادان جارىستارعا قاتىسىپ ءجۇرمىن. «سىزىق بويىنشا ءجۇرۋ» باعىتى بويىنشا باق سىناماقپىن. ۇستازىم – كوركەم ەڭبەك ءپانىنىڭ مۇعالىمى اباي قازىمبەك اعايىم. وتكەن جىلى وقۋشىلار سارايىندا مەكتەپتەر اراسىندا وتكەن بايقاۋدىڭ ديپلومانتى اتاندىم,-دەيدى ءنازىر تورەقۇلوۆ اتىنداعى № 35 مەكتەپ-ليتسەيىنىڭ 5-سىنىپ وقۋشىسى قايسار قۋانىشباي.
مۇحتار اۋەزوۆ اتىنداعى № 86 مەكتەپ-گيمنازياسىنىڭ 9-سىنىپ وقۋشىسى نۇرداۋلەت اۋەزحان بيىل جارىسقا ءتورتىنشى رەت قاتىسىپ وتىر ەكەن. 2022 جىلى ەلوردادا وتكەن STEAM وليمپياداسىندا I ورىندى جەڭىپ العان ەكەن. نقرداۋلەت بولاشاقتا IT مامانى بولعىسى كەلەدى, بولاشاقتا وقيتىن جوعارى وقۋ ورنىن دا تاڭداپ قويىپتى – Astana IT University ستۋدەنتى اتانسام دەيدى. شەتەلدە ءبىلىمىن جەتىلدىرۋدى دە ارماندايدى.
– نەگىزىنەن ءوز بەتىممەن دايىندالدىم, YouTube-تان تەوريا جيناقتاسام, پراكتيكا جۇزىندە تەحنيكانى بارىنشا مەڭگەرۋگە تىرىستىم, – دەيدى ول.
– جاسىم 10-دا, 8 جاسىمنان باستاپ وسى روبوتوتەحنيكامەن اينالىسىپ كەلەمىن. بيىلعى ناۋرىزدا نازارباەۆ مەكتەپتەرىندە وتكەن رەسپۋبليكالىق جارىستا جۇلدەلى II ورىندى جەڭىپ الدىم. مەكتەپتە باعىت بەرگەن اعايىم – سەرىك رازرەدينۇلى, – دەيدى استاناداعى «الپامىس» جەكە مەكتەبىنىڭ 5 سىنىپ وقۋشىسى نۇرىم قالاباەۆ.
– وقۋشىلاردىڭ بيىلعى ناتيجەلەرى وتە قوماقتى, جوعارى دەپ ايتۋعا بولادى. اسىرەسە, ماعان ۇناعانى – نۇرىم قالاباەۆتىڭ ناتيجەلەرى, وتە جوعارى دەپ اتاپ وتۋگە بولادى, – دەيدى قازىلار القاسىنىڭ مۇشەسى لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتى كيبەرقاۋىپسىزدىك ماماندىعى بويىنشا وقىپ جاتقان ستۋدەنت مەيرامبەك رىسبەك.
«ROBOARENA–2024» قالالىق جالپى ءبىلىم بەرۋ مەكەمەلەرىنىڭ وقۋشىلارى اراسىندا روبوتوتەحنيكادان جارىس قورىتىندىسى بويىنشا ورىن العاندار ديپلومدارمەن ماراپاتتالىپ, جەڭىمپازدارعا ارنايى جۇلدەلەر تاپسىرىلدى.
