تەگىن ءدارى كىمگە تيەسىلى؟
قازاقستاندا 2019 جىلعا تەگىن مەديتسينالىق كومەكتىڭ كەپىلدىك بەرىلگەن كولەمىن قامتاماسىز ەتۋ ءۇشىن دارىلەردى ساتىپ الۋ باستالدى. الداعى ۋاقىتتا ءدارى-دارمەكتەر ديسپانسەرلىك ەسەپتە تۇرعان, سونىمەن قاتار ستاتسيونارلاردا تەگىن ەم قابىلدايتىن پاتسيەنتتەر ءۇشىن ساتىپ الىنادى.
ساتىپ الىناتىن تىزىمگە 1144 پرەپارات كىرەدى, ولاردىڭ 829-ى – دارىلىك زاتتار جانە 315-ءى – مەديتسينالىق ماقساتتاعى بۇيىمدار.
تەگىن ءدارى-دارمەكتەردى جىبەرۋگە ارنالعان رەتسەپتىنى ۋچاسكەلىك نەمەسە مامانداندىرىلعان دارىگەر نۇسقاۋ بويىنشا بەرەدى. ارنايى فورمانى تولتىرۋ ءۇشىن پاتسيەنتتىڭ جەكە قۇجاتى كەرەك. ءدارى-دارمەكتەر مەملەكەت ەسەبىنەن ناقتى رەتسەپت بويىنشا بەلگىلى ءدارىحانادا بەرىلەدى. ءدارىحانانىڭ مەكەنجايىن ازامات ءوزى تىركەلگەن ەمحانادان الا الادى. بارلىق ءدارى-دارمەك تەگىن بەرىلمەيتىنىن اتاپ ءوتۋ كەرەك. ەگەر دە ناۋقاسقا قاجەت ءدارى-دارمەك تىزىمدە بولماسا, ونى ول اقىلى تۇردە الۋعا ءتيىس.
كەپىلدەندىرىلگەن تەگىن مەديتسينالىق كومەك كولەمى شەڭبەرىندە ءدارى-دارمەكتەردى الۋ بارىسىندا سىزدەن پرەپاراتتى اقىلى تۇردە الۋدى تالاپ ەتسە نەمەسە ءدارىنى بەرۋدەن باس تارتسا, ءوزىڭىز تىركەلگەن ەمحانانىڭ باسشىلىعىنا, تۇرعىلىقتى مەكەنجايىڭىز بويىنشا جەرگىلىكتى ۋاكىلەتتى مەملەكەتتىك ورگاندارعا نەمەسە دەنساۋلىق ساقتاۋ مينيسترلىگىنىڭ فارماتسيا كوميتەتىنىڭ دەپارتامەنتىنە ءوتىنىش بەرە الاسىز.
بۇگىنگى كۇندە وسى جۇيەنىڭ قارجى وپەراتورى بولىپ سانالاتىن الەۋمەتتىك مەديتسينالىق ساقتاندىرۋ قورى ەلوردانىڭ 79 مەديتسينالىق مەكەمەسىمەن كەلىسىمشارت بەكىتتى. ولاردىڭ 36-سى – مەملەكەتتىك جانە 43-ءى – جەكە مەنشىكتەگى مەكەمە.