باس قالادا كارانتين شارالارىن ساقتاۋدى قاداعالايتىن ءموبيلدى توپتاردىڭ جۇمىسى كۇشەيتىلۋدە. بۇل تۋرالى جاقىندا نۇر-سۇلتان قالاسى اكىمىنىڭ ورىنباسارى باقتيار ماكەننىڭ توراعالىعىمەن وتكەن كوروناۆيرۋس ينفەكتسياسىمەن كۇرەس جونىندەگى جەدەل شتاب وتىرىسىندا ايتىلدى.
كۇن تارتىبىندە قالاداعى ەپيدەميولوگيالىق جاعداي جانە ءموبيلدى توپتاردىڭ جۇمىسىن كۇشەيتۋدەن باسقا جىلىتۋ ماۋسىمى كەزەڭىندە ءورت قاۋىپسىزدىگى ماسەلەلەرى تالقىلاندى. جالپى, ەلوردا كوروناۆيرۋس ينفەكتسياسى بويىنشا سارى, قاۋىپتى ايماققا كىرەدى. سوندىقتان بۇل احۋال ەرەكشە نازار اۋدارۋدى تالاپ ەتەدى. ونىڭ ۇستىنە جۇرگىزىلگەن تەكسەرىس ناتيجەسىندە شوب سۋبەكتىلەرى تاراپىنان كارانتين شارالارى مەن سانيتارلىق ەرەجەلەر بىرنەشە رەت ساقتالماعاندىعى بەلگىلى بولعان.
«وسىعان بايلانىستى, قۇقىق قولدانۋ پراكتيكاسى جانە ەسكەرتۋدى ازايتۋ ماقساتىندا كارانتين شارالارىن ۇنەمى بۇزاتىن كاسىپكەرلىك سۋبەكتىلەرىنىڭ قىزمەتىن ۋاقىتشا توقتاتا تۇرۋ ماسەلەسى قارالاتىن بولادى» دەپ اتاپ ءوتتى باقتيار ماكەن. ونىڭ ايتۋىنشا, تىيىمعا قاراماستان, كەيبىر ويىن-ساۋىق مەكەمەلەرى قىزمەتىن جالعاستىرۋدا. ال ءموبيلدى توپتار وكىلدەرى وبەكتىگە كىرىپ, بۇزۋشىلىقتاردى تىركەي المايدى, ويتكەنى كۇزەت كىرۋگە كەدەرگى كەلتىرەدى نەمەسە وبەكت ءوز قىزمەتىن جابىق ەسىك رەجيمىندە جۇزەگە اسىرادى.
اكىمدىك وكىلدەرى دەرتتىڭ تارالۋىن تەجەۋ ءۇشىن بۇرىنعىداي شەتەلدەن جانە باسقا وبلىستاردان كەلۋشىلەردى پتر-تەستىلەۋدەن وتكىزۋ قاجەت دەپ سانايدى. سونىمەن قاتار الەۋمەتتىك نىسانداردى, كاسىپكەرلىك سۋبەكتىلەرىن جانە ت.ب. دەزينفەكتسيالاۋدى ۇنەمى جۇرگىزۋ ماڭىزدى. حالىق قاراپايىم ەرەجەلەردى ەلەمەسە, ءوز ومىرىنە عانا ەمەس, وتانداستارىنا دا قاۋىپ توندىرەتىنىن ەستە ۇستاپ, ۇنەمى ماسكا تاعۋى كەرەك.
