جۋىردا ءبىزدىڭ كوشەنىڭ بويىنا, ياعني, قوسشىعۇلۇلى, 20 مەكەنجايىنا قاز-قاتار اعاشتار ەگىلدى. اراسىندا شىرشا مەن تەرەكتەر دە بار. وكىنىشكە قاراي, جايقالىپ تۇرعان اعاشتار كوپ ۇزاماي سارعايىپ, شارۋانىڭ ەڭبەگى دالاعا كەتتى. مۇنىڭ سەبەبىن سول ماڭايدا جۇرگەن جۇمىسشىلاردىڭ وزىنەن سۇرادىم.
ءشولدى جەرگە باق ورناتقان جالعىز ءبىزدىڭ ەل ەمەس ەكەنىن تالاي جازدىق. قالامىزدا اعاش ءوسىرۋدىڭ الەمدىك تاجىريبەسى مەن ءتۇرلى تاسىلدەرى دە جەتكىلىكتى ەكەنىن بىلەمىز. قاراعاي, شىرشا سەكىلدى اعاشتاردىڭ قامىن ويلاپ, قالا بيۋدجەتىنەن قىرۋار قاراجات بولىنەتىنىن دە ەستيمىز. دەسەك تە, قاز-قاتار وتىرعىزىلعان اعاشتار نەگە كوكتەمەي قالدى؟ اراسىندا بۇرشىكتەۋگە بەيىم تۇرعان ەكى-ءۇش شىبىقتىڭ ودان ءارى جايقالىپ كەتۋى مۇمكىن بە؟
توپىراقتىڭ ءتۇبىن قوپسىتىپ جۇرگەن جاسى ۇلكەندەۋ كىسىنىڭ جانىنا كەلىپ اڭگىمەلەسكىم كەلدى. باستاپقىدا قويعان ساۋالدارىما ءۇن قاتپادى. جاي عانا وسى ءۇيدىڭ تۇرعىنى ەكەنىمدى ەستىگەننەن كەيىن «بارىنە تەندەر كىنالى عوي» دەپ قولىن ءبىر سىلتەدى. ءجۇزى جابىرقاۋلى. ايتۋىنشا, وسى جولى اعاشتار مەرزىمىنەن كەشىكتىرىلىپ وتىرعىزىلعان سىڭايلى.
«جوسپار بويىنشا اعاش ەگىلەتىن مەرزىمدە مەكەمەگە اۋدارىلۋى ءتيىس قاراجات قولعا تيمەدى. تەندەر دەگەن بالە كوپ ۋاقىتتى الادى ەكەن. ناقتى ىسكە كىرىسكەنشە ۋاقىت جاعىنان ۇتىلامىز. مىنە, ناتيجەسىن ءوزىڭىز كورىپ وتىرسىز. جوعارىدا وتىرعان باسشىلار مۇنى تۇسىنە بەرمەيتىن شىعار. بىراق, شارۋانىڭ ەڭبەگى دالاعا كەتپەس ءۇشىن ءبارىن ءوز ۋاقىتىندا جاساعان دۇرىس. كەشىكتىرىلىپ وتىرعىزىلعان تەرەكتىڭ دە كوكتەۋى قيىن. كۇننىڭ قىزۋى دا كەرى اسەرىن بەرەدى. بىراق ەككەنىمىز قۋراپ, ەڭبەگىمىز ەش كەتسە, ءبىزدىڭ باسشىلار جەردىڭ قۇنارسىزدىعىنان كورەتىنى تاعى بار» دەيدى ول.
بۇل تۋرالى الداعى ۋاقىتتا كوگالداندىرۋ مەكەمەسىنە حابارلاسىپ, ماسەلەنىڭ ءمانىسىن سۇراۋ كەرەك. ويتكەنى استانادا وسىرىلگەن ءاربىر اعاشتىڭ ەسەبى دە, سۇراۋى دا بولۋى كەرەك ەمەس پە؟
