كەشە نۇر-سۇلتان قالاسىنداعى دوستىق ۇيىندە قازاقستان حالقى اسسامبلەياسىنىڭ 25 جىلدىعىنا وراي «ءتىل – دوستىقتىڭ التىن كوپىرى» بايقاۋى ءوتتى. سايىسقا قاتىسۋشى ەتنومادەني بىرلەستىك وكىلدەرى بارلىق سانيتارلىق ەرەجەلەردى قاتاڭ ساقتادى.
«ەلباسىنىڭ «قازاق ەلىنىڭ پاتريوتى بولۋ قازاق ەلىن ءوز جۇرەگىڭدە ۇيالاتۋ» دەگەن قاناتتى ءسوزى بار. مەملەكەت بار جەردە ءتىل بولۋ كەرەك. بۇل بايقاۋ «رۋحاني جاڭعىرۋ» باعدارلاماسىن جۇزەگە اسىرۋ ماقساتىندا جىل سايىن وتكىزىلىپ كەلەدى. سايىستىڭ نەگىزگى ماقساتى – مەملەكەتتىك ءتىلدىڭ مارتەبەسى مەن ماڭىزىن ناسيحاتتاۋ قازاق حالقىنىڭ مادەنيەتىن تانىتۋ» دەدى نۇر-سۇلتان قالاسى اكىمدىگىنىڭ ىشكى ساياسات باسقارماسىنىڭ باسشىسى تالعات راحمانبەردى.
بايقاۋ شارتىنا ساي قاتىسۋشىلار 3 كەزەڭنەن تۇراتىن اينالىمدا باق سىنادى. ءبىرىنشى كەزەڭدە قازاق حالقىنىڭ سالت-داستۇرلەرىنەن كورىنىس قويسا, ەكىنشى اينالىمدا ءۇي تاپسىرماسىنا دايىنداپ كەلگەن «قازاقستان حالقى اسسامبلەياسىنداعى ەتنومادەني ورتالىقتىڭ ماڭىزدىلىعى» نەمەسە «ءتىل – دوستىقتىڭ كوپىرى» تاقىرىپتارىندا بەينەروليك كورسەتتى. ءۇشىنشى كەزەڭدە ۇلى اقىن اباي قۇنانباەۆتىڭ شىعارمالارىن مانەرلەپ وقىدى.
«ءبىز اسسامبلەيا ۇيىمداستىرعان بارلىق شارالارعا بەلسەنە قاتىسامىز. مۇنداي شارالار ەتنوستار اراسىنداعى دوستىق پەن جىلىلىقتى, تاتۋلىقتى نىعايتادى. وسى جولعى بايقاۋعا قاتىسۋ بارىسىندا قازاق سالت-ءداستۇرىن تەرەڭىنەن زەرتتەدىك» دەدى «تاڭ» تاتار-باشقۇرت ەتنومادەني ورتالىعىنىڭ مۇشەسى يسلامبەك وماروۆ.
تارتىسقا تولى بايقاۋدىڭ ناتيجەسى بويىنشا 1-ورىندى «جايحۋن» قاراقالپاق ەتنومادەني بىرلەستىگى, 2-ورىندى «يۋنچي» دۇنگەن ەتنومادەني ورتالىعى, ال 3-ورىندى قازاقستان ۇيعىرلارى رەسپۋبليكالىق ەتنومادەني ورتالىعى فيليالى يەلەندى. كورەرمەنسىز وتكەن كەشتى قازاقستان حالقى اسسامبلەياسىنىڭ الەۋمەتتىك جەلىدەگى پاراقشالارىنان تاماشالاۋعا بولادى.
كوكتەم قارقىن
