كەشە بۋرابايدا قازاقستاننىڭ توراعالىعىمەن تمد مەملەكەت باسشىلارىنىڭ كەڭەسى ءوتتى.
اۋەلى شاعىن, كەيىن كەڭەيتىلگەن قۇرامدا وتكەن القالى جيىندا تمد احۋالى مەن دامۋ كەلەشەگىنىڭ ماسەلەلەرى ەگجەي-تەگجەيلى تالقىلاندى. كەڭەس وتىرىسىنا ەلباسى نۇرسۇلتان نازارباەۆ جانە ازەربايجان رەسپۋبليكاسىنىڭ پرەزيدەنتى ي.اليەۆ, ارمەنيا رەسپۋبليكاسىنىڭ پرەزيدەنتى س.سارگسيان, بەلارۋس رەسپۋبليكاسىنىڭ پرەزيدەنتى ا.لۋكاشەنكو, قىرعىز رەسپۋبليكاسىنىڭ پرەزيدەنتى ا.اتامباەۆ, رەسەي فەدەراتسياسىنىڭ پرەزيدەنتى ۆ.پۋتين, تاجىكستان رەسپۋبليكاسىنىڭ پرەزيدەنتى ە.راحمون, وزبەكستان رەسپۋبليكاسىنىڭ پرەزيدەنتى ي.كارىموۆ, تۇركىمەنستان مينيسترلەر كابينەتى توراعاسىنىڭ ورىنباسارى س.ساتلىكوۆ, مولدوۆا رەسپۋبليكاسىنىڭ سىرتقى ىستەر جانە ەۋروپالىق ينتەگراتسيا ءمينيسترىنىڭ ورىنباسارى ا.گالبۋر قاتىستى.
ءماجىلىستى اشقان قازاقستان پرەزيدەنتى كەڭەسكە قاتىسۋشىلار اتىنان ا.لۋكاشەنكونى وتكەن سايلاۋداعى جەڭىسىمەن, سونداي-اق ا.اتامباەۆتى قىرعىزستاندا پارلامەنتتىك سايلاۋدىڭ تابىستى وتۋىمەن قۇتتىقتادى.
نۇرسۇلتان نازارباەۆ قازاقستان تمد قۇرىلعالى بەرى ەلدەر اراسىنداعى كوپجاقتى ىنتىماقتاستىقتى جانداندىرۋدى, ءىس-قيمىلدىڭ نەگىزگى باعىتتارى بويىنشا ينتەگراتسيانى تەرەڭدەتە ءتۇسۋدى دايەكتىلىكپەن جاقتاپ كەلە جاتقانىن ايتتى.
شاعىن قۇرامدا وتكەن كەڭەس وتىرىسىندا تمد ەلدەرىنىڭ جاڭا جاعدايلارعا ىڭعايلانۋى, سوعان بايلانىستى ءىس-شارالار تالقىلانۋمەن قاتار, حالىقارالىق قاۋىپسىزدىك ماسەلەسى دە ءسوز بولدى.
جيىندا تمد مەملەكەتتەرى باسشىلارىنىڭ بىرىككەن ۇلتتار ۇيىمىنىڭ 70 جىلدىعىنا بايلانىستى, حالىقارالىق تەرروريزمگە قارسى كۇرەس تۋرالى مالىمدەمەسى, چەرنوبىل اەس-ىندەگى اپاتتىڭ 30 جىلدىعىنا بايلانىستى ۇندەۋى, تمد-عا مۇشە مەملەكەتتەردىڭ توتەنشە جاعدايلاردى ەسكەرتۋ جانە جويۋ سالاسىنداعى ىنتىماقتاستىق تۋرالى كەلىسىمى, 2020 جىلعا دەيىنگى اسكەري ىنتىماقتاستىق تۇجىرىمداماسى, تمد-عا مۇشە مەملەكەتتەردىڭ 2016 – 2020 جىلدارعا ارنالعان سىرتقى شەكارالارداعى قاۋىپسىزدىكتى نىعايتۋ سالاسىنداعى ىنتىماقتاستىق باعدارلاماسى تۋرالى قۇجاتتارعا قول قويىلدى.
ەلباسى قازاقستاننىڭ تمد-عا توراعالىعى ەكونوميكالىق تۇرعىدان كۇردەلى كەزەڭگە تاپ كەلگەنىن, بىراق بارلىق قاجەتتى تالاپتاردىڭ ءبارى ورىندالعانىن ايتا كەلىپ, ەلىمىزدىڭ بۇل ۇيىمعا توراعالىعى اياقتالاتىندىعىن مالىمدەدى.
ەندى, تمد-عا توراعالىق قازاقستاننان قىرعىزستانعا اۋىسادى. ال, مەملەكەت باسشىلارى كەڭەسىنىڭ كەلەسى وتىرىسى 2016 جىلدىڭ 16 قىركۇيەگىندە قىرعىز ەلىندە وتەتىن بولادى.
