استانادا كۇرەس تۇرلەرىنەن وتكەن ازيالىق وليمپيادالىق ىرىكتەۋ تۋرنيرىندە بالۋاندارىمىز قازاقستان ۇلتتىق قۇراماسىنىڭ قورجىنىن توعىز ليتسەنزيامەن تولىقتىردى.
ازيا ەلدەرىنىڭ ەڭ ۇزدىك بالۋاندارى سىنعا تۇسكەن جارىس بارىسىندا ريو-دە-جانەيرو ويىندارىنا 36 ليتسەنزيا ۇلەستىرىلدى. ەركىن كۇرەس, گرەك-ريم كۇرەسى جانە ايەلدەر كۇرەسىنەن ءۇش كۇنگە جالعاسقان جارىستا قازاقستان بالۋاندارى جاقسى كورسەتكىشكە قول جەتكىزدى دەۋگە نەگىز بار. اتاپ ايتقاندا, توعىز بالۋانىمىز باستى ماقساتتى ورىنداپ, وليمپيادا ويىندارىنا جولداما الدى.
ەركىن كۇرەستە داۋلەت شابانباي (125 كەلى), مامەد يبراگيموۆ (97 كەلى), عالىمجان وسەرباەۆ (74 كەلى), اسلان كاحيدزە (86 كەلى), گرەك-ريم كۇرەسىندە نۇرماحان تىناليەۆ (130 كەلى), ايەلدەر كۇرەسىندە گيۋزەل مانيۋروۆا (75 كەلى), جۇلدىز ەشيموۆا (48 كەلى), ەلميرا سىزدىقوۆا (69 كەلى), ەكاتەرينا لاريونوۆا (63 كەلى) ليتسەنزيا يەگەرلەرى اتاندى.
وسىعان دەيىن الەم چەمپيوناتىندا جۇلدەگەر اتانعان گرەك-ريم كۇرەسى شەبەرلەرى الماس كەبىسباەۆ (59 كەلى), دوسجان كارتيكوۆ (75 كەلى) جانە ارتاس سانا (57 كەلى) ريو ويىندارىنا جولداما الىپ قويعان بولاتىن. وسىلايشا قازاقستان بالۋاندارى ازىرگە 12 ليتسەنزيا الىپ وتىر.
بالۋاندار ءۇشىن وليمپيادا ويىندارىنا ليتسەنزيا بەرەتىن تاعى ەكى تۋرنير بار. ازىرگە جولداماسىز قالعان قازاق بالۋاندارى الداعى ۋاقىتتا ۇلان-باتور جانە ستامبۇل قالالارىندا وتەتىن جارىستاردا باقتارىن سىناۋعا ءمۇمكىندىك الادى.
عالىم قوجابەكوۆ
astana-akshamy.kz
