دەنساۋلىق ساقتاۋ مينيسترلىگىنە قاراستى مەديتسينالىق قىزمەتتەرگە تولەم جاساۋ كوميتەتى تاراتىلادى. بۇل تۋرالى پارلامەنت ءماجىلىسىنىڭ الەۋمەتتىك-مادەني دامۋ كوميتەتىنىڭ وتىرىسىندا دەنساۋلىق ساقتاۋ ۆيتسە-ءمينيسترى ءلاززات اقتاەۆا مالىمدەدى.
«2018 جىلدىڭ 1 قاڭتارىنان باستاپ الەۋمەتتىك مەديتسينالىق ساقتاندىرۋ قورى تەگىن مەديتسينالىق كومەكتىڭ كەپىلدەندىرىلگەن كولەمىنىڭ وپەراتورىنا اينالادى. مەديتسينالىق قىزمەتتەرگە تولەم جاساۋ كوميتەتى جويىلادى» دەدى ۆيتسە-مينيستر.
ونىڭ ايتۋىنشا, وسىعان بايلانىستى 2020 جىلدىڭ 1 قاڭتارىنا دەيىن مەديتسينالىق قىزمەتتەردى جوسپارلاۋ, ساتىپ الۋ, ساپاسىن باقىلاۋ بولىگىندە بارلىق بيزنەس-پروتسەستەردى ۇيلەستىرۋ, دەنساۋلىق ساقتاۋ سۋبەكتىلەرىنە مەديتسينالىق قىزمەت ءۇشىن تولەمدەر جاساۋ ماسەلەلەرى ازىرلەنەتىن بولادى.
«بۇگىنگى كۇنى دەنساۋلىق ساقتاۋ سۋبەكتىلەرىنىڭ بازاسى قۇرىلدى جانە قور تەگىن مەديتسينالىق كومەكتىڭ كەپىلدەندىرىلگەن كولەمىن كورسەتەتىن دەنساۋلىق ساقتاۋ سۋبەكتىلەرىنەن قىزمەتتەردى ساتىپ الۋ پروتسەدۋراسىنا كىرىسەتىن بولادى» دەدى ل.اقتاەۆا.
