6 شىلدە كۇنى ەلىمىزدىڭ باس قالاسى – استانانىڭ 20 جىلدىق مەرەيتويى اتاپ وتىلەدى. بۇل مەرەكەگە وراي ەلوردامىز شەتەلدەن جانە وڭىرلەردەن 1 ميلليوننان اسا تۋريستەردى قابىلداۋعا دايىن.
استانا – بەيبىتشىلىك قالاسى
سىرتقى ىستەر مينيسترلىگىندە استانانىڭ 20 جىلدىعىنا ارنالعان ءىس-شارالار تانىستىرىلدى. جيىنعا قالا اكىمى اسەت يسەكەشەۆ, سىرتقى ىستەر ءمينيسترى قايرات ءابدىراحمانوۆ, G-Global باسشىسىنىڭ ورىنباسارى مۇرات قارىمساقوۆ قاتىستى.
قايرات ءابدىراحمانوۆتىڭ ايتۋىنشا, مەملەكەت باسشىسى نۇرسۇلتان نازارباەۆ استانانىڭ حالىقارالىق ستاتۋسىنا ەرەكشە ءمان بەرەدى. «ەلوردانىڭ جاھاندىق ديپلوماتياداعى ميسسياسى, قازىرگى كۇردەلى ماسەلەلەردى رەتتەۋدەگى ماڭىزى مەن ۇستانىمى, ارىپتەستىك بايلانىس ورناتۋداعى ءرولى اسا ماڭىزدى. استانا مەرەيتويى – ۇلتتىق ءارى حالىقارالىق اۋقىمدى وقيعا. سىرتقى ىستەر مينيسترلىگى ەلوردانىڭ 20 جىلدىعىنا دايىندىقتى باستادى» دەي كەلە, مينيستر مىرزا جينالعان قاۋىمدى مەرەكەگە بەلسەنە اتسالىسۋعا شاقىردى.
5 ماۋسىمدا مينيسترلىك قر تۇڭعىش پرەزيدەنتى – ەلباسىنىڭ كىتاپحاناسىمەن جانە قورىمەن بىرلەسىپ, «استانا – بەيبىتشىلىك قالاسى» اتتى حالىقارالىق كونفەرەنتسيا ۇيىمداستىرۋدى جوسپارلاۋدا.
بۇل شارا – تەك استانا ءۇشىن ماڭىزدى ەمەس, ءوز مەملەكەتىمىزدى تانىستىرۋعا تاماشا مۇمكىندىك. كەلەلى جيىندا وڭىردەگى جانە الەمدەگى قاۋىپسىزدىك جانە دامۋ ماسەلەلەرى تالقىلانىپ, قالاعا «اقىلدى» تەحنولوگيالاردى ەنگىزۋ مەن ەلوردانىڭ قارجى, ساۋدا جانە كولىك يننوۆاتسيالىق حابى رەتىندەگى دامۋ جوسپارى ءسوز بولادى.
سونداي-اق, مينيستر شەتەلدەگى قازاقستاندىق ەلشىلەر ەلىمىزدىڭ ونەر مايتالماندارىنىڭ قاتىسۋىمەن كونتسەرتتەر, فوتوكورمەلەر, ءتۇرلى كونفەرەنتسيالار, استاناعا ارنالعان وزگە دە ءىس-شارالار وتكىزىپ جاتقانىن ايتتى.
ميلليون تۋريست كەلەدى
ءسوز كەزەگى تيگەن استانا اكىمى ەلوردا مەرەيتويىنا ورتالىق مەملەكەتتىك ورگاندار مەن وبلىس اكىمدىكتەرىنىڭ قولداۋىمەن 600-دەن استام اۋقىمدى مەرەكەلىك باعدارلاما دايىندالعانىن ايتتى.
اسەت يسەكەشەۆ ەلوردا 2018 جىلى شەتەلدەن جانە ايماقتاردان كەلەتىن 1 ميلليوننان استام تۋريستەردى قابىلداۋعا دايىن ەكەنىن مالىمدەدى. «قوناقتاردى قارسى الۋعا قالادا 200 قوناقۇي مەن 1100 قوعامدىق تاماقتانۋ ورنى ازىرلەنگەن. اۋەجايدىڭ جاڭا تەرمينالى مەن جاڭا تەمىرجول ۆوكزالى قابىلداۋعا دايىن. نەگىزگى شارالار وتەتىن ورىندارعا شاتتل اۆتوبۋستارى قاتىنايدى. 1-10 شىلدە ارالىعىندا قۇقىق قورعاۋ ورگاندارىنىڭ 2,5 مىڭ قىزمەتكەرى كۇشەيتىلگەن رەجىمدە جۇمىس ىستەپ, قاۋىپسىزدىك ءجىتى قاداعالانادى. ودان باسقا, ۇلتتىق ۇلان ساربازدارى جۇمىلدىرىلادى. قاجەت بولعان جاعدايدا, 13 مەديتسينالىق مەكەمەنىڭ كومەگىنە جۇگىنۋگە بولادى» دەدى قالا باسشىسى.
– ەلوردا كۇنىنە وراي 7 جاڭا ساياباق پەن گۇلزار اشىلىپ, 40 مىڭنان استام اعاش وتىرعىزىلىپ, 157 مىڭ شارشى مەتر الاڭعا گۇل ەگىلەدى. اۋلا ايماقتارىن, قوعامدىق الاڭداردى اباتتاندىرۋ بويىنشا اۋقىمدى جۇمىس جۇرگىزىلىپ جاتىر. 20 جىلدىق قارساڭىندا 100-دەن استام اۋلا تاپسىرىلسا, جىل سوڭىندا اۋلا سانى 400-گە دەيىن جەتەدى. مۇنىڭ بارلىعى «رۋحاني جاڭعىرۋ» باعدارلاماسى اياسىندا جەكە ينۆەستورلاردىڭ قاراجاتىمەن اباتتاندىرىلماق. ەلوردانىڭ ءبىر توپ ونەرپازى ەل ايماقتارىنا ارناپ «استانادان اق تىلەك» مەرەكەلىك باعدارلاماسىن ۇسىنادى, – دەپ جوسپارلارمەن ءبولىستى اسەت يسەكەشەۆ.
شاھار باسشىسى شەتەلدىك ديپلوماتتاردى 2-3 شىلدەدە مەملەكەت باسشىسىنىڭ باستاماسىمەن وتەتىن «Global Silk Road» جىبەك جولى ەلدەرىنىڭ قالا اكىمدەرى
فورۋمىنا شاقىردى. بۇگىندە وعان 51 ەلدەن 1500 قاتىسۋشى تىركەلدى. فورۋمعا الەمنىڭ تۇكپىر-تۇكپىرىنەن ساياسي, عىلىمي جانە ىسكەرلىك توپتاردىڭ وكىلدەرى, ءارتۇرلى قالالاردىڭ اكىمدەرى باس قوسپاق. Astana Finance Days اياسىندا «استانا» حالىقارالىق قارجى ورتالىعىنىڭ تۇساۋكەسەر ءراسىمى بولادى.
استانا قالاسى اكىمدىگى مادەنيەت باسقارماسىنىڭ باستىعى بولات ماجاعۇلوۆ 600-دەن استام مادەني-سپورتتىق شارالار تۋرالى كەڭىنەن مالىمەت بەردى. «استانانىڭ 20 جىلدىعىن اتاپ وتۋدە ۇلتتىق بولمىستى ساقتاۋعا باعىتتالعان شارالار كوپتەپ ۇيىمداستىرىلماق. اكىمدىك 1 شىلدەدە «قازاق ەلى» مونۋمەنتى الاڭىندا ۇلتتىق دومبىرا كۇنىن اتاپ وتەدى. «كوشپەندىلەر الەمى» ەتنوفەستيۆالىنە تۇركيا, بولگاريا, ۆەنگريا, باشقۇرتستان, قىرعىزستان ەلدەرى قاتىسادى. ودان باسقا, «استانا ارقاۋ», «Spirit of Astana» مۋزىكالىق فەستيۆالدەرى, «قازاقستان بارىسى» ءتۋرنيرى سياقتى ءداستۇرلى شارالار بولادى. شەت ايماقتا ورنالاسقان 10 تۇرعىن ءۇي الابى دا مەرەكەلىك شارالاردان قالىس قالمايدى.
تولىق مالىمەت 21 مامىردان باستاپ www.astanaday.kz سايتىندا جاريالانادى» دەدى ول.
ساۋد ارابيا سوفياسى – استانادا
ال G-Global باسشىسىنىڭ ورىنباسارى مۇرات قارىمساقوۆ ساۋد ارابياسى ازاماتشاسى اتانعان سوفيا روبوتى استاناعا ارنايى كەلەتىنىن مالىمدەدى. ول جىبەك جولى ەلدەرى قالالارىنىڭ مەرلەر فورۋمىنا قاتىسادى. «روبوتتى قۇراستىرۋشى بەن گەرتسەل فورۋمعا سپيكەر رەتىندە قاتىسۋعا كەلىسىمىن بەردى. مەنىڭشە, گينويد سوفيانىڭ ەلورداعا كەلۋى ەڭ قىزىقتى شارالاردىڭ ءبىرى بولادى» دەدى G-Global وكىلى. بۇگىندە J.P. Morgan Chase كورپوراتسيانىڭ ديرەكتورلار كەڭەسىنىڭ توراعاسى دجەيكوب فرەنكەل, بولگاريانىڭ بۇرىنعى پرەزيدەنتى پەتر ستويانوۆ, قىتايدىڭ AngelVest قورىنىڭ ورتاق قۇرىلتايشىسى دەۆيد چەننىڭ فورۋمعا قاتىساتىندارى بەلگىلى دەدى ول.
ۇيىمداستىرۋشىلاردىڭ ايتۋىنشا, فورۋم جۇمىسى جەمىستى بولعان جاعدايدا, جىبەك جولى ەلدەرى قالالارى مەرلەرىنىڭ كلۋبى اشىلادى. عىلىم, ءبىلىم بەرۋ, ادەبيەت, تۋريزم, سپورت, بيزنەس, مەملەكەتتىك ەمەس ۇيىمداردىڭ قاۋىمداستىعى دا وسى الاڭدا قۇرىلادى.
