مەرەكە كۇندەرى استانادا تسيرك ونەرىنىڭ بىرەگەي شاراسىنا اينالعان ءداستۇرلى «ازيا جاڭعىرىعى» فەستيۆالىنىڭ جالاۋى جەلبىرەدى.
بيىلعى بايقاۋعا 12 مەملەكەتتەن, ياعني فرانتسيا, كانادا, نيكاراگۋا, ەفيوپيا جانە ۆەنگريا, قىرعىزستان, وزبەكستان, تۇرىكمەنستان, ۆەتنام, رەسەي, بەلارۋستەن جانە وتاندىق 60-تان اسا تسيرك ونەرىنىڭ سەركەلەرى ەلوردالىقتاردى ءتورت كۇن بويى قىزىق دۋمانعا بولەدى. ولاردىڭ ونەرىن وسى سالانىڭ مايىن ءىشىپ, جىلىگىن شاققان قايراتكەرلەرى مەن حالىقارالىق تورەشىلەر ساراپتايدى.
فەستيۆال بارىسىندا كورەرمەندەر تسيرك الىپتارىنىڭ تاڭعاجايىپ ونەرىن تاماشالادى. قولعا ۇيرەتىلگەن ايۋ مەن مايمىلدىڭ ويىندارى بالالاردى قىزىققا كەنەلتتى. اكروباتتاردىڭ اۋادا تارتىلعان ءجىپ ۇستىندەگى كوز ىلەسپەس قيمىلدارى اسەرلى شىقتى. موتوتسيكل مىنگەن ەكۆيليبريستەر مەن ەفيوپيالىق ارىستەردىڭ يكاريلىك ويىندارى دا كەرەمەت.
سونداي-اق, ايتۋلى شاراعا قوناق رەتىندە شاقىرىلعان ۆەنگريالىق تانىمال ءپىل ۇيرەتۋشى ريچارد تاكاس پەن ۋكراينادان كەلگەن شوۋ-باعدارلامالاردىڭ جەتەكشىسى ۆيكتوريا گريتسەنكو ءوز ونەرلەرىمەن جۇرتشىلىقتىڭ ىستىق ىقىلاسىنا بولەندى. ايتا كەتەيىك, بايقاۋ 8 شىلدە كۇنى اياقتالادى.
يسانىڭ شاپانى, جۇسىپبەكتىڭ كىلەمى
استانا كۇنى مەرەكەسىنە وراي ۇلتتىق ارحيۆ عيماراتىندا «قولجازبالار مەن سيرەك كىتاپتار ۇلتتىق ورتالىعى» رەسپۋبليكالىق مەملەكەتتىك مەكەمەسى ۇيىمداستىرعان «استانا – الاش ارمانى» اتتى تاقىرىپتىق كورمە ءوز جۇمىسىن باستادى. مادەني شاراعا پاۆلودار وبلىستىق بۇقار جىراۋ اتىنداعى ادەبيەت جانە ونەر مۋزەيى دە اتسالىستى.
«رۋحاني جاڭعىرۋ» اياسىندا وتكەن كورمە سورەلەرىنە كوپتەگەن قۇندى جادىگەرلەر قويىلعان. اتاپ ايتقاندا, ءماشھۇر ءجۇسىپ كوپەەۆ, جۇسىپبەك ايماۋىتوۆ, سۇلتانماحمۇت تورايعىروۆتىڭ باعالى زاتتارى,
يسا بايزاقوۆتىڭ شاپانى مەن جەكە تۇتىنعان دۇنيەلەرى, جاياۋ مۇسانىڭ قوبىزى, شاكەن ايمانوۆتىڭ بوركى جانە باسقا دا دۇنيەلەر بار.
كورمە 30 كۇن بويى استانالىقتار مەن قالا قوناقتارىنا تەگىن جۇمىس ىستەيدى. كورەرمەندەر اتالعان جادىگەرلەر جونىندە ارحيۆيست مامانداردىڭ پىكىرىن دە تىڭداي الادى. تاعى ءبىر قوسارىمىز, كورمەدەن سۇلتانماحمۇت تورايعىروۆتىڭ 1933 جىلى باسىلىم كورگەن شىعارمالارىن دا كورۋگە بولادى. سونداي-اق, اراب جانە لاتىن قارپىندەگى سيرەك كەزدەسەتىن تاريحي كىتاپتار دا كەلۋشىلەر نازارىنا ۇسىنىلىپ وتىر.
ورىس سۋرەتشىلەرىنىڭ جاۋھارى
استانا كۇنى مەرەكەسىندە ۇلتتىق مۋزەيدە قر مادەنيەت جانە سپورت مينيسترلىگى جانە ورىس-امەريكان قورى, سونداي-اق, «The SonMar Group» امەريكان كومپانياسىنىڭ ۇيىمداستىرۋىمەن «اقش كوللەكتسيالارىنداعى XIX-XX عاسىرداعى ورىس سۋرەتشىلەرى» اتتى كورمە اشىلدى.
شارانىڭ سالتاناتتى اشىلۋىندا قر مادەنيەت جانە سپورت ءمينيسترى ارىستانبەك مۇحامەديۇلى مينيسترلىكتىڭ ورىس-امەريكان قورى مەن «The SonMar Group» امەريكان كومپانياسىنىڭ بىرلەسىپ وتكىزىپ وتىرعان ءىرى ءۇشىنشى جوبا ەكەندىگىن ايتىپ ءوتتى. پارلامەنت سەناتىنىڭ دەپۋتاتى بىرعانىم ءايتىموۆا جينالعانداردى ەلوردا كۇنىمەن قۇتتىقتاپ, وسى كورمەنى ۇيىمداستىرۋعا ۇيىتقى بولىپ جۇرگەن قازاقستانداعى اقش ەلشىسىنە ريزاشىلىعىن ءبىلدىردى.
كورمەگە XIX-XX عاسىرداعى بەينەلەۋ ونەرىندە قولتاڭبالارىن وشپەستەي قاشاپ قالدىرعان ورىستىڭ قىلقالام شەبەرلەرىنىڭ تۋىندىلارى قويىلدى. ولاردىڭ اراسىندا ورىس كەسكىندەمەسىنە تىڭ ءورىس اكەلگەن يليا رەپين, الەكسەي ساۆراسوۆ, ۆلاديمير ماكوۆسكي, كونستانتين كوروۆين, پەتر ترۋبەتسكوي, بوريس گريگورەۆ, ناتاليا گونچاروۆا, روبەرت فالك سەكىلدى ايگىلى سۋرەتشىلەردىڭ بىرەگەي جۇمىستارى بار. اسىرەسە, يۆان ءپۋنيننىڭ كەنەپ, مايلى بوياۋمەن كوركەمدەگەن «امبەباپ دۇكەن», كونستانتين كوروۆيننىڭ «تۇندەگى ۆيشي», داۆيد بۋرليۋكتىڭ «كۇنباعىسپەن ناتيۋرمورت» سەكىلدى كارتينالارىنا ەرىكسىز تاڭداي قاعاسىز. ونەردىڭ شىنايى قۇدىرەتى دەگەن وسى بولار.
ايتپاقشى, ەلوردانىڭ 20 جىلدىق تويى اياسىندا نيۋ-يوركتەگى ۇلتتىق ونەر كلۋبىندا ءابىلحان قاستەەۆ اتىنداعى ونەر مۇراجايىنىڭ كوللەكتسيالارىنان قامتىلعان «حح عاسىردىڭ جاۋھارلارى» اتتى كورمەسى ءوتىپ جاتىر. قىسقاسى, مۇنىڭ بارىنەن قازاقستان مەن اقش اراسىنداعى مادەني الماسۋ داڭعىل جولعا اينالعاندىعىن كورەمىز.
استانادا – كومەديا تەاترى
استانادا مەرەكە كۇندەرى العاشقى كومەديا تەاترى اشىلدى. ەلوردا اكىمدىگىنىڭ قولداۋىمەن جۇمىسىن باستاعان ونەر وشاعى شاھاردىڭ 20 جىلدىق مەرەيتويىنا كوپ تارتۋدىڭ ءبىرى بولدى. كومەديا تەاترىنىڭ ديرەكتورى-كوركەمدىك جەتەكشىسى قىزمەتىنە بەلگىلى ازىلكەش تۇرسىنبەك قاباتوۆ تاعايىندالدى. NOMAD CITY HALL اتاۋى بەرىلگەن تەاتر ەكسپو كورمەسى اۋماعىنداعى «ەنەرگيا حولىندا» ورنالاستى.
تەاتر رەپەرتۋارىنا بارشا الەمگە تانىمال كومەديالىق سپەكتاكلدەر ەنگىزىلمەك. كورەرمەندەر ولاردى قازاق ءتىلىندە تاماشالايدى.«استانادا كومەديا تەاترى اشىلۋىنىڭ قالامىزدىڭ مادەني دامۋىنا وڭ ىقپالىن تيگىزەرى ءسوزسىز. ونىڭ قاناتىنىڭ استىنا بۇكىل قازاقستاننان تالانتتى جاستار جينالادى. تەاتر جاس ازىلكەشتەرگە ءوزىن-ءوزى تانىتۋعا جانە ءوز ونەرىن پاش ەتۋگە ءمۇمكىندىك بەرەتىن بىرەگەي الاڭعا اينالماق» دەيدى استانانىڭ مادەنيەت جانە سپورت باسقارماسىنىڭ باسشىسى بولات ماجاعۇلوۆ.
تەاتر بازاسىندا «ءازىل الەمى», «نازار اۋدار», «كتا» ويىندارى باعدارلامالارى مەن ازىلكەشتەردىڭ اۆتورلىق ونەرى كورسەتىلەدى. بۇعان قوسا, مەكتەپتەر, كوللەدجدەر, جوعارى وقۋ ورىندارى اراسىندا تۋرنيرلەر وتكىزىلەدى.
«ەلىمىزدە دارىندى جاستار كوپ. ءازىل-قالجىڭ ونەرى قازاققا جات ەمەس. بۇرىن ءازىل-سىقاق كەشتەرىن وتكىزۋ ءۇشىن زالداردى جالدايتىنبىز. ال ەندى ءوز عيماراتىمىز بار. بۇل جاعداي ءبىزدىڭ شىعارماشىلىعىمىزعا وڭ اسەر ەتىپ, جاقىن ارادا كورەرمەندەرىمىزدى تەاتر ءارتىستەرىنىڭ ورىنداۋىنداعى الەمگە تانىمال قويىلىمدارىمىزبەن جانە پرەمەرالارمەن قۋانتامىز دەپ ويلايمىن» دەيدى كومەديا تەاترىنىڭ ديرەكتورى-كوركەمدىك جەتەكشىسى تۇرسىنبەك قاباتوۆ.
بەتتى دايىنداعان
امانعالي قالجانوۆ, ازامات ەسەنجول
