ەلوردانىڭ 20 جىلدىعى مەرەكەسىنىڭ اياسىندا سارىارقا اۋدانىندا بىرنەشە ساياباقتار سالتاناتتى تۇردە اشىلدى. سولاردىڭ ءبىرى – رەسپۋبليكا داڭعىلى مەن ىقىلاس دۇكەنۇلى كوشەسىنىڭ قيىلىسىندا, ەكىنشىسى ءبىرجان سال كوشەسىندەگى №5 ءۇيدىڭ جانىندا ورنالاسقان. ەلوردا اكىمدىگىنىڭ رەسمي سايتى حابارلاعانداي, بايقوڭىر اۋدانىندا دا ءبىر ساياباقتىڭ قۇرىلىسى اياقتالىپ, پايدالانۋعا بەرىلدى.
اتاپ ايتارلىعى, ءاربىر ساياباقتىڭ اۋماعى اباتتاندىرىلعان, بالالار وينايتىن جانە سپورتتىق الاڭدار بار. بارلىق ساياباقتار بۇزىلعان جانە اپاتتى ۇيلەردىڭ ورنىنا سالىنعان. ساۋلەتتىك قۇرىلىمىنا سايكەس, ءار ساياباقتىڭ قايتالانباس ءستيلى بار. مىسالى, ولارعا «قيال ساياباعى», «شابادان ساياباعى» دەگەن اتاۋلار بەرىلگەن. العاشقىسىندا سكەيتدروم, ەيمس بولمەسى, بالالار سىرعاناعى, ويىن الاڭى كوزدىڭ جاۋىن الادى. «شابادان ساياباعى» تەمىرجول ۆوكزالىنا جاقىن ورنالاسقان, سول سەبەپتەن شاعىن ساۋلەتتىك فورمالار شابادان ۇلگىسىندە جاسالعان. سول جەردە بالالار تەمىرجولى دا بار.
سونداي-اق, پۋشكين كوشەسىندە بالالار الاڭقايى, سپورتتىق جابدىقتارى ورناتىلعان ساياباق اشىلدى. جەرگىلىكتى تۇرعىندار اسىق اتۋدان جارىس وتكىزەمىز دەپ ءماز بولۋدا. بۇدان بولەك, استانا كۇنىندە تاعى 5 ساياباق اشىلدى. ولار ءاليا مولداعۇلوۆا كوشەسىندەگى №19, 21 ۇيلەردىڭ اۋدانىندا پايدا بولدى. «اۋىل شارۋاشىلىعى ساياباعى» دەپ اتالعان نىسانداعى بالالار ويىن الاڭى, شاعىن ساۋلەتتىك فورمالار جانۋارلار مەن وسىمدىكتەر كەيپىندە بەينەلەنگەن. باسقا ساياباقتار جەڭىس داڭعىلىنداعى №36/1, ءىلياس ەسەنبەرلين كوشەسىندەگى №36 ءۇيدىڭ, جەلتوقسان كوشەسىندەگى №2 ءۇيدىڭ جانىنان بوي كوتەردى. بارلىق ساياباقتارعا كاناليزاتسيالىق, ينجەنەرلىك جانە سۋ قۇبىرى جەلىلەرى تارتىلعان. كەيبىر ساياباقتاردا فۋتبول, باسكەتبول الاڭدارى قوسا سالىنعان.
