استانا كۇنىندە قالا باسشىسى اسەت يسەكەشەۆ توموتەراپيا جانە يادرولىق مەديتسينا ورتالىعىن ارالاپ, ونىڭ جۇمىسىمەن تانىستى. «ۇلتتىق عىلىمي مەديتسينالىق ورتالىق» اق جانىنان اشىلاتىن جاڭا بۋىننىڭ ونكولوگيالىق ورتالىعى 2018 جىلى قاراشا ايىندا پايدالانۋعا بەرىلەدى.
جوبانىڭ بىرەگەيلىگى اتالعان ورتالىقتا «توموتەراپيا» جاڭا تەحنولوگياسى قولدانىلادى. بۇل ونكولوگيالىق اۋرۋلاردى ەمدەۋدەگى جاڭا فورمالاردىڭ ءبىرى بولىپ تابىلادى. اتاپ ايتارلىعى, ەم-دوم جاساۋ دالمە-ءدال كومپيۋتەرلىك توموگرافيا تاسىلىنە نەگىزدەلگەن. مامانداردىڭ ايتۋىنشا, بۇگىنگە دەيىن مۇنداي ورتالىق ءالى ازيادا سالىنباعان. دەمەك, جاڭا ورتالىق ىسىك اۋرۋىمەن اۋىرعان كوپتەگەن جانداردىڭ ساۋىعىپ كەتۋىنە ءۇمىت سىيلايتىنى انىق.
«اتالعان جوبانىڭ باستى ماقساتى – حالىقارالىق ستاندارتتارعا سايكەس, ونكولوگيالىق اۋرۋلارمەن اۋىرعان ادامدارعا ساۋلەلىك تەراپيانىڭ قولجەتىمدىلىگىن ارتتىرۋ باعىتىنداعى كەشەندى شارالاردى ىسكە اسىرۋ. مۇنداي شارالار ونكولوگيالىق اۋرۋلاردىڭ الۋان تۇرلەرىن ەمدەۋگە, ناۋقاس ۇلكەندەر مەن بالالاردى وقشاۋلاۋدىڭ تيىمدىلىگىن ارتتىرۋعا مۇمكىندىك بەرەدى» دەپ حابارلادى ەمحانانىڭ ءباسپاسوز قىزمەتىنەن.
