كۇزدىڭ قارا سۋىعى كەلگەندە تۇماۋ دا ءورشيدى. اسىرەسە, يممۋندىق جۇيەسى ءالسىز ادامدار ءجىتى رەسپيراتورلىق ۆيرۋستى ينفەكتسياسىنا ءجيى شالدىعادى. وسى جۇقپالى سىرقاتتان ساقتانۋدىڭ جولى قانداي, تۇماۋعا قارسى ەكپە جونىندە نە بىلەمىز, ۆاكتسينا كىمدەرگە تەگىن سالىنادى؟
جۇرتشىلىقتىڭ كوبى تۇماۋدىڭ قاراپايىم بەلگىلەرىن ەلەي بەرمەيدى. كوزى جاساۋراپ, مۇرنى بىتەلسە, «جاي عانا تۇماۋ عوي» دەپ جۇرە بەرەدى. شىنتۋايتىندا, جۇقپالى اۋرۋلاردىڭ ىشىندە قاۋىپتىسى – وسى ءجىتى رەسپيراتورلىق ۆيرۋستى ينفەكتسيا. بۇل سىرقات ادام بويىنداعى سوزىلمالى اۋرۋلاردىڭ ءبارىن اسقىنتىپ جىبەرەدى. سوندىقتان تۇماۋدىڭ العاشقى بەلگىلەرىن, قالاي ءورشيتىنىن, الدىن الۋ جولدارىن بىلگەن ابزال.
استانا قالاسى №10 قالالىق ەمحانانىڭ ينفەكتسيونيست-دارىگەرى ەلەنا بيكباەۆانىڭ ايتۋىنشا, تۇماۋ جەڭىل, ورتاشا جانە اۋىر تۇرگە بولىنەدى.
نەگىزگى بەلگىلەرى: تاماقتىڭ اۋرۋى, قۇرعاق جوتەل مەن مۇرىننىڭ بىتەلۋى. جرۆي كەزىندە دەنە قىزۋى بىرنەشە كۇنگە سوزىلۋى مۇمكىن. كوپ جاعدايدا قىزۋ تۇسىرەتىن دارىلەر كومەكتەسە قويمايدى. «وسى اتالعان بەلگىلەر بايقالىسىمەن, بىردەن دارىگەرگە كورىنگەن ءجون.
سەبەبى, تۇماۋ اسقىنسا, وعان باكتەريالىق ينفەكتسيا قوسىلىپ, برونحيت, پنەۆمونيا, وتيت, گايموريت, سينۋسيت جانە باسقا دا كوپتەگەن اۋرۋلاردىڭ دامۋىنا اكەپ سوعۋى مۇمكىن. ءتىپتى ميدىڭ شىرىشتى قاباتىن زاقىمداپ, ادامدى مەنينگيتكە ۇشىراتۋى ىقتيمال. سوندىقتان اۋرۋدى ەمدەگەننەن گورى ونىڭ الدىن العان الدەقايدا جاقسى» دەيدى ەلەنا نيكولاەۆنا.
تۇماۋدان ساقتانۋدىڭ ەڭ ءتيىمدى جولى – جىل بويى يممۋنيتەتتى قالپىنا كەلتىرۋ. ول ءۇشىن سالاۋاتتى ءومىر سالتىن ۇستانىپ, سپورتپەن شۇعىلدانىپ, دۇرىس تاماقتانۋ كەرەك. ماماندار كۇندەلىكتى تاعام راتسيونىندا مىندەتتى تۇردە جەمىس-جيدەكتەر بولعانى دۇرىس دەيدى. سونداي-اق, تازا اۋادا ءجيى سەرۋەندەپ, ۇيدەگى تەرەزە, بالكوندى كۇنىنە كەمى 3-4 رەت جەلدەتىپ العان ءجون. «ادام سىرتتان كەلگەندە مىندەتتى تۇردە قول جۋ كەرەك. قولمەن بىرگە نەبىر باكتەريالار ەرە كەلەتىنىن ايتۋدىڭ ءوزى ارتىق. سونىمەن قاتار, سارىمساق كوپ جەگەن ادام تۇماۋعا شالدىعا بەرمەيتىنىن ەسىڭىزگە ۇستاڭىز. كۇز ايلارىندا تۇماۋ ءورشيدى. وسىنى ەسكەرىپ, دالاعا شىققاندا مىندەتتى تۇردە «وكسولين» ءمازىن نەمەسە «ۆيفەروندى» مۇرىنعا جاعۋ قاجەت. بۇل مايلار تۇماۋ جۇقتىرۋدىڭ الدىن الادى» دەيدى دارىگەر.
جالپى, تۇماۋدان قورعانۋدىڭ ەڭ ءتيىمدى ءتاسىلى – وعان قارسى ەكپە سالدىرتۋ. ءجىتى ۆيرۋستىق ينفەكتسياعا قارسى ۆاكتسيناتسيا مەديتسينا قىزمەتكەرلەرىنە, اۋرۋشاڭ, ءالجۋاز بالالارعا مۇگەدەكتەر مەن جۇكتى ايەلدەرگە تەگىن جۇرگىزىلەدى. «28 قىركۇيەكتەن باستاپ قالالىق ەمحانالاردا تۇماۋعا قارسى ۆاكتسينا سالۋ باستالدى. رەسەي وندىرىسىنەن شىققان ەكپە ساپا جونىندەگى بارلىق تالاپتان وتكەن. «گريپپول پليۋس» ۆاكتسيناسىندا ا, H1N1, H3N2 جانە ۆ تيپتەگى تۇماۋ ۆيرۋسىنا قارسى انتيگەن بار. بۇل ەكپەنى ەمحانادا اقىلى نەگىزدە دە الۋعا بولادى. باعاسى – 3 مىڭ تەڭگە. ۆاكتسيناتسيا تەراپەۆت نەمەسە پەدياتر ماماندارعا تەكسەرىلگەننەن كەيىن عانا جۇرگىزىلەدى» دەيدى ەلەنا بيكباەۆا.
قىمبات نۇرعالي
