تۇماۋدان ساقتانىڭىز!

تۇماۋعا, سونداي-اق سۋىق تيۋ اۋرۋلارىنىڭ باسقا دا تۇرلەرىنە قارسى جاپپاي ەكپە ەگۋ جۇمىستارى 1 قازاننان باستالادى.

بۇل تۋرالى كەشە استانادا قو­عامدىق دەنساۋلىق ساقتاۋ كومي­تەتىنىڭ توراعاسى جانداربەك بەك­شيننىڭ قاتىسۋىمەن وتكەن بريفينگتە ءمالىم بولدى.
– قازىرگى ۋاقىتتا ەلىمىزدىڭ بارلىق وبلىسىنا ۆاكتسينا جەتكىزىلدى. ەكپە ەگۋ ۋاقىتى قاراشا, ءتىپتى جەلتوقسان ايىنا دەيىن جالعاسۋى مۇمكىن. وسى ۋاقىت ارالىعىندا ەل تۇرعىندارىنىڭ 10 پايىزىنا تەگىن ەكپە ەگىلەدى. ۆاكتسيناتسيالاۋ جۇ­مىس­تارى الدىمەن ءجيى اۋىراتىن, سوزىلمالى, جۇرەك, وكپە, تىنىس جولدارى دەرتىنە شالدىققان بالالارعا جۇرگىزىلەدى. سونىمەن قاتار, مەديتسينا ۇيىمدارىندا جۇمىس ىستەيتىندەرگە جانە بالالار ۇيىمدارى, مۇگەدەكتەر ءۇيى سەكىلدى الەۋمەتتىك مەكەمەدە تۇراتىن ادامدارعا تەگىن جاسايمىز, – دەگەن جانداربەك بەكشين 2018 جىلى بيۋدجەت قاراجاتىنا رەسەيدە وندىرىلگەن «گريپپول+» ۆاكتسيناسىنىڭ 1,5 ملن دوزاسى 1 ملرد 200 ملن تەڭگەگە ساتىپ الىنعانىن ايتىپ ءوتتى.
ۆاكتسينالار بيىل كەزدەسەتىن شتامدارعا قارسى ارەكەت ەتپەك. بۇعان قوسا, ەلىمىزدە 3 ءوندىرۋشىنىڭ تۇماۋعا قارسى تاعى 4 ۆاكتسيناسى تىركەلگەن. بۇل «ۆاكسيگريپ», «ۆاكسيگريپ تەترا» (فرانتسيا), «ينفليۋۆاك» (نيدەرلاند) جانە تۇماۋعا قارسى ۆاكتسينا (قىتاي).
دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسى بويىنشا 2018-2019 ەپيدماۋسىمىندا ەلىمىزدە ءۇش ۆالەنتتى ۆاكتسينانىڭ قۇرامىنا ەنگىزىلگەن تۇماۋدىڭ ءۇش شتامى بولادى. ولار – ميچيگان, سينگاپۋر جانە كولورادو شتامدارى.
تۇماۋدىڭ الدىن الۋ ماقساتىندا ءاربىر ادام قالاۋى بويىنشا اقىلى تۇردە ەكپە جاساتا الادى. ۆاكتسينانىڭ قۇنى 1600-3500 تەڭگە ارالىعىندا بولاتىنى ءمالىم بولدى. جيىن سوڭىندا جانداربەك بەكشين «گريپپول+» ۆاكتسيناسىن سالدىردى.

ايان ءابدۋالي