قوس كورەيا وليمپيادانى بىرگە وتكىزۋى مۇمكىن
سەۋل مەن پحەنيان 2032 جىلى وتەتىن وليمپيادا ويىندارىن بىرىگىپ وتكىزۋى مۇمكىن.
Yonhap اگەنتتىگىنىڭ حابارلاۋىنشا, وڭتۇستىك كورەيا تاراپى ءسولتۇستىكتەگى كورشىلەرىنە وليمپيادا ويىندارىن بىرىگىپ وتكىزۋ تۋرالى ۇسىنىس جاساماق. بۇل تۋرالى وڭتۇستىك كورەيانىڭ سپورت ءمينيسترى دو چون حۆان مالىمدەدى.
– مەن بۇل ۇسىنىستى كورەي تۇبەگىندەگى جاعدايدى رەتتەۋ ءۇشىن ۇسىنعالى وتىرمىن. سەۋل مەن پحەنيان بۇل ويىنداردى بىرىگىپ وتكىزۋى مۇمكىن, – دەدى مينيستر.
ونىڭ ايتۋىنشا, بيىلعى پحەنچحاندا ۇيىمداستىرىلعان قىسقى ويىندارعا كحدر-دىڭ قاتىسۋى كورەي تۇبەگىندەگى شيەلەنىستى ازايتتى. ءبىر ايتارلىعى, وسى جىلى قىسقى وليمپياداعا حوككەيدەن قوس ەلدىڭ قىزدار قۇراماسى بىرىگىپ شىققان بولاتىن.
دو چون حۆان تەك قىسقى ويىندارمەن شەكتەلمەيتىنىن, 2030 جىلى فۋتبولدان وتەتىن الەم چەمپيوناتىن قىتاي, جاپونيا جانە سولتۇستىك كورەيا ەلدەرىمەن بىرىگىپ وتكىزۋ جوسپاردا بارىن ايتتى. وسىعان دەيىن سپورت ءمينيسترى توكيودا ۇيىمداستىرىلعالى وتىرعان جازعى وليمپياداعا سولتۇستىكتەگى كورشىلەرىمەن ءبىر كوماندا شىعارۋدى ۇسىنعان بولاتىن.
بالانى قۇتقارىپ, ازاماتتىق الدى
فرانتسياعا مالي ەلىنەن قونىس اۋدارعان مامۋدۋ گاسساما ەسىمدى بوسقىن جۇرتتىڭ ىستىق ىقىلاسىنا بولەندى. ول وسىدان بىرنەشە اي بۇرىن كوپ قاباتتى تۇرعىن ۇيلەردىڭ بىرىنە ورمەلەپ شىعىپ, بالكوننان قۇلايىن دەپ تۇرعان ءبۇلدىرشىندى قۇتقارىپ قالعان بولاتىن.
وسى وقيعادان كەيىن ەل پرەزيدەنتى ەممانۋەل ماكرون «ورمەكشى» جىگىتتى ەليسەي سارايىندا قابىلداپ, بۇكىل فرانتسيا حالقىنىڭ اتىنان العىس ايتقان. جاقىندا مامۋدۋ گاسساماعا فرانتسيا ازاماتتىعى بەرىلدى.
– ول باتىلدىعىنىڭ, ەرجۇرەكتىلىگىنىڭ ارقاسىندا ۇلگى بولارلىق قادامعا باردى, – دەدى فرانتسيانىڭ پرەمەر-ءمينيسترى ەدۋارد فيليپپ.
ايتا كەتەيىك, 22 جاستاعى بوسقىن وتكەن جىلدىڭ قىركۇيەك ايىندا مالي ەلىنەن زاڭسىز كوشىپ كەلگەن.
ەڭ كونە سۋرەت تابىلدى
عالىمدار الەمدەگى ەڭ كونە سۋرەتتى انىقتادى. ول وڭتۇستىك افريكا رەسپۋبليكاسىنداعى بلومبوس ۇڭگىرىندە 73 مىڭ جىل بۇرىن سالىنعان ەكەن.
ارحەولوگتار ميكروسكوپيالىق جانە حيميالىق زەرتتەۋ جۇرگىزىپ, ناتيجەسىندە سۋرەتتىڭ ارنايى ازىرلەنگەن بوياۋمەن دايىندالعانىن انىقتادى. بۇعان قوسا, سۋرەتتىڭ تولىق كۇيدە ساقتالماعانى دا بەلگىلى بولدى.
– بۇل سۋرەت سول كەزەڭدەگى حالىقتىڭ تۇرمىسىنان سىر شەرتىپ تۇر. تۋىندىعا ءمان بەرىپ قاراساق, بارىنە تۇسىنىكتى بەلگىنى بايقاۋعا بولادى. سونداي-اق, سۋرەتتىڭ كەلەسى ءبىر تۇسى ءۇزىلىپ قالعانىنا قاراپ, تولىق ساقتالماعانىن انىقتاپ وتىرمىز, – دەدى ارحەولوگ كريستوفەر حەنشيلۆۋد.
ايان ءابدۋالي
