ەلىمىزدە 25-29 تامىز كۇندەرى ارالىعىندا «قۇقىقتىق ءتارتىپ» جەدەل الدىن الۋ شاراسى وتكىزىلىپ جاتىر. سول ارقىلى ەلوردادا تۇنگى ۋاقىتتاردا كارانتين تالاپتارى قانشالىقتى ساقتالاتىندىعىن تەكسەرىپ, ايىپتىلارعا جاۋاپكەرشىلىك جۇكتەۋ قاراستىرىلعان.
وسىعان وراي وتكەن سەيسەنبىدە تۇنگى ساعات 22.00-دە پوليتسيا قىزمەتكەرلەرى بۇقارالىق اقپارات قۇرالدارىنىڭ وكىلدەرىمەن بىرگە قالانىڭ سول جاعالاۋىنداعى ويىن-ساۋىق ورتالىقتارىن, كوڭىل كوتەرۋ ورىندارىن ارالاۋعا شىقتى.
نۇر-سۇلتان قالاسى ەسىل اۋداندىق پوليتسيا باسقارماسىنىڭ باستىعى, پوليتسيا پودپولكوۆنيگى ماديار ايتۋعانوۆ رەيد بارىسىندا قوعامدىق ورىندار, ءدامحانا, مەيرامحانا سىندى نىساندار تەكسەرىلەتىندىگىن ايتتى.
«ىشكى ىستەر ءمينيسترىنىڭ نۇسقاۋلىعىنا سايكەس, تامىزدىڭ 25-29 ارالىعىندا «قۇقىقتىق ءتارتىپ» جەدەل الدىن الۋ شاراسى باستالدى. وسىعان وراي نۇر-سۇلتان قالالىق پوليتسيا دەپارتامەنتى ۇلتتىق ۇلان جاساقتارىمەن بىرىگىپ جانە قوعامدىق ۇيىم وكىلدەرىنىڭ قاتىسۋىمەن ەلوردادا تۇنگى رەيدتەرگە شىعىپ تۇراتىن بولادى. باستى ماقسات – قالاداعى ەپيدەميولوگيالىق احۋالدى ساۋىقتىرۋ, قۇقىق بۇزۋشىلىق پەن قىلمىستىڭ الدىن الۋ, جول ءجۇرىسى ءتارتىبىن قاتاڭ ساقتاۋ جانە كارانتين تالاپتارىنىڭ ساقتالۋىن قامتاماسىز ەتۋ» دەدى ماديار ايتۋعانوۆ.
ەستەرىڭىزگە سالا كەتەيىك, نۇر-سۇلتان قالاسىنىڭ بۇرىنعى باس سانيتارلىق دارىگەرى جاننا پراليەۆا وتكەن مالىمدەلەرىنىڭ بىرىندە كوپتەگەن قالا تۇرعىندارى مەن ۇيىمداردىڭ سانيتارلىق-ەپيدەميولوگيالىق تالاپتاردى ساقتامايتىنىن, ول باسقا ادامداردىڭ ۆيرۋس جۇقتىرۋ قاۋىپىن ۇدەتە تۇسەتىنىن ايتقان بولاتىن.
«شەكتەۋ شارالارىن ساقتاۋ قانشالىقتى ايتىلىپ جاتسا دا, تۇرعىنداردىڭ باسىم بولىگى كورونوۆيرۋس ىندەتىنىڭ بارلىعىنا سەنبەيدى جانە ەسكەرتۋگە قۇلاق اسپايدى. ءتىپتى قاراپايىم قورعانىس تالاپتارىن ورىنداعىسى كەلمەيدى: بەتتۇمشا تاعۋ, ارالىق قاشىقتىقتى ساقتاۋ, قولدى انتيسەپتيكتەرمەن جۋ. ءبىز ىندەت قاۋپى تولىق قايتپاسا دا, بىرقاتار شەكتەۋ شارتتارىن تالاپ ەتە وتىرىپ, قالاداعى كاسىپورىنداردىڭ, ۇيىمداردىڭ جۇمىستارىن قايتادان جالعاستىرۋىنا مۇمكىندىك بەردىك. بىراق جاڭادان كۆي تىركەلۋ تەجەلەتىن ەمەس, بۇل كەيبىر مەكەمە-ۇجىمداردىڭ ساقتاندىرۋ شارالارىن ورىندامايتىندىعىن بىلدىرەدى» دەگەن ەدى باس سانيتارلىق دارىگەر. ونىڭ ايتۋىنشا, ەگەر قالادا سانيتارلىق-ەپيدەميولوگيالىق جاعداي ۋشىعىپ كەتەتىن بولسا, شەكتەۋ شارالارى قازىرگى كەزگە قاراعاندا كۇشەيتىلۋى دە مۇمكىن.
بۇگىندە كارانتين تالاپتارى جەڭىلدەتىلگەنىمەن تۇنگى ساعات 23.00-دە قالادا بارلىق ءدامحانالار, مەيرامحانالار, بارلار جابىلۋى ءتيىس. بىراق سوعان قاراماستان تۇنگى ۋاقىتتاردا جاسىرىن جۇمىس ىستەيتىن ساۋىق ورىندارى بار. سوندىقتان رەسمي توپ ساعات 23.00-دەن كەيىن ەسىل اۋداندىق پوليتسيا باسقارماسىنىڭ عيماراتىنان تۇنگى رەيدكە اتتاندى. الدىمەن ات باسىن تىرەگەن ورىن – تۇران داڭعىلى بويىنداعى «استانالىق ساياباقتا» ورنالاسقان قوناق ءۇي. پوليتسيا قىزمەتكەرلەرى كەلگەندە قوناق ءۇيدىڭ اشىق دالاداعى ءدامحاناسىندا وتىرعان جاستاردىڭ قاراسى قالىڭ ەدى. الايدا ولار پوليتسيا قىزمەتكەرلەرىن كورگەندە جىلدام تارالۋعا ءماجبۇر بولدى. تەك پوليتسيانىڭ قولىنا مەيرامحانانىڭ ءۇش ۆيپ-زالىندا تۋعان كۇن تويلاعان جاستار ءتۇستى.
بۇدان كەيىن تەكسەرۋ توبى ساۋران كوشەسى بويىندا ورنالاسقان بارلارعا باس سۇقتى. سولاردىڭ بىرىندە دە ءدال وسىنداي جاعداي قايتالاندى. پوليتسيا تۇنگى قىدىرىستى ۇناتاتىن جاستار ەمىن-ەركىن كاليان شەگىپ, كوڭىل كوتەرىپ وتىرعاندا ۇستەرىنەن ءتۇستى.
پوليتسيا قىزمەتكەرلەرى اتالعان ساۋىق ورىندارىندا بولعان كليەنتتەرگە كوروناۆيرۋس ىندەتى تولىق جويىلماعاندىعىن, ونىڭ تارالۋ قاۋپى ءالى دە جوعارى ەكەنىن ءتۇسىندىرىپ, اكىمشىلىك ايىپپۇل سالدى. ساۋىق ورىنداردىڭ باسشىلارى دا ايىپپۇل ارقالادى. ايتا كەتەرلىگى, كارانتيندىك رەجيم مەن سانيتارلىق-ەپيدەميولوگيالىق تالاپتاردى بۇزعانى ءۇشىن جەكە تۇلعالارعا 30 ايلىق ەسەپتىك كورسەتكىش (1 اەك – 2778 تەڭگە / 30 اەك – 83 340 تەڭگە), ال كاسىپكەرلىك سۋبەكتىلەرىنە 230 اەك-تەن (638 940 تەڭگە) جوعارى سومادا ايىپپۇل سالىنادى.
نايما نۇرالىقىزى
