تۇرالاپ قالعان قۇرىلىس اياقتالدى
«ەلوردا قۇرىلىس كومپانياسى» جشس وكىلەتتى ۇيىمى «گارانت» تۇرعىن ءۇي كەشەنى نىسانىنىڭ قۇرىلىسىن اياقتاۋعا كونكۋرس جاريالاۋعا دايىن. بۇل تۋرالى ۆەدومستۆوارالىق كوميسسيانىڭ تۇرعىن ءۇي قۇرىلىسىنا ۇلەستىك قاتىسۋ ماسەلەسى جونىندەگى كەزەكتى وتىرىسىندا بەلگىلى بولدى.
بۇگىنگە دەيىن «ەلوردا قۇرىلىس كومپانياسى» جشس نىسانىنىڭ رەنتابەلدىلىگىن ورناتۋ بويىنشا ۇسىنعان بارلىق ماتەريالدارى زەرتتەلىپ, رەسمي سايتتا قۇرىلىستى اياقتاۋ تۋرالى بىرلەسكەن كەلىسىمشارت جاريالانعان بولاتىن.
– سىزدەردىڭ نىساندارىڭىز بويىنشا بارلىق ماسەلە شەشىلدى. ءبىز قۇرىلىستى اياقتايتىن كونكۋرستى جاريالاۋعا دايىنبىز. ول نىساندى اياقتايتىن قارجى دا بار, – دەدى كوميسسيا توراعاسى سەرگەي حوروشۋن.
سونىمەن قاتار, كوميسسيا مۇشەلەرى «ارابي-2», «اكەركە-2», «PARASAT», «ستوليچنىي-2» سياقتى 8 پروبلەمالى ۇلەستىك قۇرىلىس نىسانىنىڭ ماسەلەسىن قارادى.
«PARASAT» جانە «كوكتال» تۇرعىن ءۇي كەشەنى سياقتى اياقتالماي قالعان نىساندارعا قاتىستى ينۆەستورلاردى تارتۋ جارمەڭكەسى ءساتتى اياقتالعان. قازىرگى تاڭدا جارمەڭكەنىڭ قورىتىندىسى بويىنشا «ADS ستروي+» جشس جانە «Tau project» جشس اتالمىش نىسانداردىڭ قۇرىلىسىن اياقتاۋدى قولعا العان. ۆەدومستۆوارالىق كوميسسيا مۇشەلەرى جوبالاۋشى كومپانيامەن بىرگە «Tau project» جشس-پەن كەلىسىمشارت قورىتىندىسىن بەكىتىپ, 15 تامىزعا دەيىن تولەم جاساۋدى شەشتى.
سونداي-اق, قالالىق ورتا ساپاسى جانە باقىلاۋ باسقارماسىنىڭ مالىمەتىنشە, «انيسا-2» نىسانىندا 5 قاباتتى كىرەبەرىسكە ەكى كاركاس 3-قابات دەڭگەيىنە دەيىن ورناتىلعان. ال «PARASAT» تۇرعىن ءۇي كەشەنىنىڭ قۇرىلىسى 2020 جىلى اياقتالادى دەپ كۇتىلۋدە.
ايتا كەتۋ كەرەك, جيىندا باسقا دا پروبلەمالى نىساندارعا قاتىستى ماسەلەلەر قارالدى. قۇرىلىس قۇجاتتارىن راسىمدەۋدى دايىنداۋ, نىساندى اباتتاندىرۋ سياقتى جۇمىستار جوسپارعا ساي جۇرگىزىلىپ جاتقانىن ايتادى ماماندار.