2030 جىلعا قاراي استانا قالاسىنىڭ تۇرعىن ءۇي قورى 37 ميلليون شارشى مەترگە جەتۋى كەرەك. قر پارلامەنتى ماجىلىسىندە «نۇرلى جول» باعدارلاماسىن ىسكە اسىرۋ شەڭبەرىندە جالعا بەرىلەتىن تۇرعىن ءۇي قۇرىلىسىنىڭ بارىسى مەن تۇرعىن ءۇي ينفراقۇرىلىمىن نىعايتۋ شارالارى تاقىرىبىنداعى دوڭگەلەك ۇستەلدە استانا قالاسى اكىمىنىڭ ءبىرىنشى ورىنباسارى سەرگەي حوروشۋن وسىلاي ءمالىم ەتتى.
– 2030 جىلعا قاراي استانا قالاسىنىڭ حالىق سانى 1 ميلليون 220 مىڭ بولعاندا, ەلورداداعى تۇرعىن ءۇي قورىنىڭ جالپى اۋدانى 37 ميلليون شارشى مەترگە جەتۋى ءتيىس. بۇل رەتتە ءبىر تۇرعىنعا 30 شارشى مەتردەن كەلەتىن نورما قاراستىرىلىپ وتىر. بۇگىنگى تاڭدا استانانىڭ تۇرعىن ءۇي قورى 19 ميلليون شارشى مەتردى قۇرايدى. سوڭعى 18 جىلدا 15,5 ميلليون شارشى مەتر پايدالانۋعا بەرىلگەن. ياعني, ءبىز 2030 جىلعا دەيىن بەلگىلەنگەن مەجەگە جەتۋ ءۇشىن جىل سايىن 1 ميلليون 100 مىڭ شارشى مەتر تۇرعىن ءۇي سالىنۋى قاجەت, – دەدى شاھار باسشىسىنىڭ ورىنباسارى.
ونىڭ ايتۋىنشا, 2015 جىلى قالادا 1 ميلليون 759 مىڭ شارشى مەتر تۇرعىن ءۇي پايدالانۋعا بەرىلدى. جوسپار بويىنشا بۇل كورسەتكىش اعىمداعى جىلى 2 ميلليون شارشى مەترگە جەتكىزىلمەك.
