بيىل – ءال-فارابي بابامىزدىڭ 1150 جىلدىق مەرەيتويى. وسىعان وراي, سىبايلاس جەمقورلىققا قارسى قىزمەتتىڭ باستاماسىمەن «استانا – ادالدىق الاڭى» جوباسى اياسىندا قالا اكىمدىگىمەن بىرلەسىپ ۇلى فيلوسوفتىڭ اكادەميك قانىش ساتباەۆ كوشەسىندەگى كوپقاباتتى تۇرعىن ءۇيدىڭ قابىرعاسىنا بەينەسى سالىندى.
بۇل مۋرالعا كەمەڭگەر تۇلعانىڭ «قايىرىمدى قالا تۇرعىندارى» تراكتاتىنداعى ادامداردى مەيىرىمدىلىككە, ادەپتىلىككە جانە ادىلەتتىلىككە شاقىرعان ناقىل ءسوزى جازىلدى. وسى جوبانى جۇزەگە اسىرۋعا ەسكيز اۆتورلارى الي زاكير, ەرجان تاناەۆ, بەينەسىن سالعان جاس سۋرەتشىلەر ورتالىعىنىڭ رەزيدەنتتەرى بەكبولات مۇراتبەكۇلى مەن بولد داۋلەت, كۋراتور كريستينا بەكمۋرزاەۆا زور ۇلەس قوستى.
ايتپاقشى, «ادالدىق الاڭى» جوباسى اياسىندا رۋحاني قۇندىلىقتار مەن سىبايلاس جەمقورلىققا قارسى مادەنيەتتى ناسيحاتتاۋ بارىسىندا باس شاھار كوشەلەرىنە, ايالدامالارعا, اۋەجايعا ءال-فارابي, اباي, شوقان بابالارىمىزدان باستاپ, احمەت بايتۇرسىنوۆ, مۇحتار اۋەزوۆ, باۋىرجان مومىشۇلى سەكىلدى تۇعىرلى تۇلعالاردىڭ ناقىل سوزدەرى جازىلعان بيلبوردتار ورناتىلعان.
