ۇيلەردى كۇردەلى جوندەۋدەن وتكىزۋ تۇرعىندار ءۇشىن وتە ءتيىمدى بولىپ وتىر. بۇل پاتەر يەلەرى كووپەراتيۆىنىڭ شىعىندارىن ازايتۋعا مۇمكىندىك بەرەدى. وسى رەتتە قالا اكىمى التاي كولگىنوۆ ءوزىنىڭ Instagram پاراقشاسىندا بيىل 50-دەن استام كوپپاتەرلى تۇرعىن ءۇي كەشەنى جوندەلەتىنىن, 130-دان استام ءليفتىنى جوندەۋ جانە اۋىستىرۋ باستالعانىن جازدى.
«بۇۇ دامۋ باعدارلاماسىنىڭ اياسىندا كوپپاتەرلى بەس تۇرعىن ۇيگە كۇردەلى جوندەۋ جۇمىستارى جۇرگىزىلىپ جاتىر. ونىڭ ۇشەۋىندە جوندەۋ اياقتالدى. بۇۇ دب جۇمىستارىن قانداي دا ءبىر تولەمسىز جۇزەگە اسىرادى. پيلوتتىق جوبامەن پۋشكين-جۇبانوۆ كوشەلەرىنىڭ قيىلىسىندا ورنالاسقان ۇيلەر جوندەلۋدە.
وسىلايشا, ءۇيدى جىلىتۋ, قاسبەتىن جوندەۋ, تەرەزە, ەسىكتەردى اۋىستىرۋ, LED-جارىقتاندىرۋ, كىرەبەرىستەردى جوندەۋ, جىلىتۋ جۇيەلەرىنىڭ قۇبىرىن جاڭارتۋ بويىنشا جۇمىستار جۇرگىزىلىپ, اۆتوماتتاندىرىلعان جىلۋ پۋنكتتەرى ورناتىلادى.
بۇل جۇمىستار ءۇيدىڭ جىلۋ شىعىنىن ەداۋىر ازايتادى. تۇرعىندار ءۇشىن جىلۋدىڭ ورتاشا جىلدىق شىعىنى شامامەن 2 ەسە ازايادى. ويتكەنى سىرتقى اۋا داتچيكتەرىنىڭ ارقاسىندا اۆتوماتتاندىرىلعان جىلۋ پۋنكتتەرى اۋا رايىنا بايلانىستى رەتتەلىپ وتىرادى. ال تۇرعىندار پايدالانىلعان جىلۋ ەنەرگياسىنىڭ اۋقىمىنا بايلانىستى تولەيدى. سونىمەن قاتار, جۇرگىزىلگەن جوندەۋ جۇمىستارى تۇرعىندارعا قىزمەت كورسەتەتىن ۇيىمنىڭ شىعىندارىن ازايتۋعا مۇمكىندىك بەرەدى.
تۇرعىن ۇيلەرگە كۇردەلى جوندەۋ جۇمىستارىن «نۇرلى جەر» تۇرعىن ءۇي-كوممۋنالدىق دامۋ مەملەكەتتىك باعدارلاماسى مەن «جۇمىسپەن قامتۋدىڭ جول كارتاسى» بويىنشا جۇرگىزەمىز. بيىل 50-دەن استام كوپپاتەرلى تۇرعىن ءۇي كەشەنى جوندەلەدى, 130-دان استام ءليفتىنى جوندەۋ جانە اۋىستىرۋ باستالدى. بۇل جۇمىستار تۇرعىندار ءۇشىن ءتيىمدى بولماق» دەپ ناقتىلاپ جازدى ءوز پاراقشاسىندا قالا اكىمى التاي كولگىنوۆ.
