بيىل استانا اكىمدىگى ەلىمىزدىڭ باس قالاسىندا ءتۋريزمدى دامىتۋدىڭ جاڭا تۇجىرىمداماسىن قابىلداپ, وندا وقيعالىق, ىسكەرلىك جانە مەديتسينالىق تۋريزمگە ايرىقشا نازار اۋدارىپ وتىر. وسى باعدارلامانىڭ جۇمىسى مەن استانانىڭ ەكسپو حالىقارالىق كورمەسىنە دايىندىعى تۋرالى ەلوردا اكىمدىگىندە وتكەن بريفينگتە تولىعىراق ايتىلدى.
جيىندا الدىمەن ءسوز كەزەگىن العان قر ينۆەستيتسيالار جانە دامۋ مينيسترلىگىنىڭ تۋريزم يندۋستريا دەپارتامەنتىنىڭ ديرەكتورى مارات يگاليەۆ باس قالادا تۋريستىك كلاستەردى دامىتۋدىڭ كەلەشەگى مول ەكەندىگىن بايانداپ ءوتتى.
«2013 جىلى استانادا ەكسپو-2017 كورمەسىن وتكىزۋدى ەسكەرە وتىرىپ, 2017 جىلعا دەيىن تۋريزم سالاسىن دامىتۋدىڭ شەبەرلىك جوسپارى ازىرلەندى. سونىمەن بىرگە, ءبىز ەلوردادا 2020 جىلعا دەيىنگى ءتۋريزمدى دامىتۋ تۇجىرىمداماسىن تانىستىردىق, كەلەسى جىلى قالانىڭ برەندى تاڭدالادى» دەدى مارات يگاليەۆ.
شىندىعىندا, استانا ەلىمىزدىڭ باس قالاسى اتالعاننان بەرى ونىڭ دامۋىمەن بىرگە, تۋريزم سالاسى دا كەڭ قانات جايىپ كەلە جاتقانىن بايقاۋعا بولادى. ەلوردادا 18 جىل ىشىندە قوناق ۇيلەر سانى 40 ەسەگە ارتىپ, شەتەلدىكتەردىڭ ەلورداعا كەلۋى 50 پايىزعا كوبەيىپ, ال ىشكى تۋريزيم 43 ەسەگە وسكەن.
– بۇگىندە استانانى 1000 تۇرعىنعا شاققاندا كەلەتىن تۋريستەر سانى بويىنشا سالىستىراتىن بولساق, ءبىز سەۋل, ستامبۋل سياقتى قالالارمەن ءبىر قاتاردا تۇرمىز. ەلوردادا بولاشاقتا ءتۋريزمدى دامىتۋعا كومەكتەسەتىن ماڭىزدى العىشارتتار قالىپتاستى. ءبىز ەندى ىسكەرلىك, وقيعالىق جانە مەديتسينالىق ءتۋريزمدى دامىتۋعا باسىمدىق بەرمەكپىز. قازىر قالادا كەڭ اۋقىمدى وقيعالاردى وتكىزۋ ءۇشىن سىيىمدىلىعى ءارتۇرلى قۇرىلىستار جەتەرلىك. وقيعالىق ءتۋريزمدى دامىتۋ ءۇشىن قاجەت نەگىزگى جانە باسىمدىقتى قادامداردىڭ ءبىرى – MICE تۋريزم بويىنشا ءىرى حالىقارالىق قاۋىمداستىقتارعا كىرۋ بولىپ سانالادى, – دەدى استانا قالالىق ينۆەستيتسيالار جانە دامۋ باسقارماسىنىڭ باسشىسى الىشەر ابدىقادىروۆ.
سونىمەن بىرگە, باس قالاعا تۋريستەردىڭ تۇراقتى اعىمىن قالىپتاستىرۋ ءۇشىن ماۋسىمدىق شارالار وتكىزۋ جوسپارلانعان. ايتالىق, قىس مەزگىلىندە قار جانە مۇز فەستيۆالى نەمەسە كوكتەمدە كۆادروكوپتەرلەر جارىسى بويىنشا اشىق چەمپيونات جانە تاعى باسقا شارالار جوبالانىپ وتىرعان كورىنەدى. سونداي-اق, «استانا» حالىقارالىق قارجى ورتالىعىن قۇرۋ مەن مەديتسينالىق كلاستەردى دامىتۋ تۋريستەر اعىنىن ارتتىرۋعا دا سەرپىن بەرمەك.
وسى جەردە ەرەكشە سالماق سالىپ ايتاتىن ءبىر دۇنيە بار. بۇگىندە استانادا ەڭ وزىق مەديتسينالىق قۇرال-جابدىقتارمەن جاراقتالعان زاماناۋي مەديتسينالىق ورتالىقتاردىڭ جەلىسى قۇرىلىپ, ول جوعارعى دەڭگەيدە دامىپ كەلەدى, ونىڭ بازاسىندا شەتەلدىك پاتسيەنتتەردى تارتىپ, ولارعا قىزمەت كورسەتۋ جۇيەسى دە قالىپتاسقان. قازىرگى كۇنى ەلوردانىڭ بىرنەشە كارديولوگيالىق كلينيكاسىندا 17 مىڭنان اسا كۇردەلى جانە بىرەگەي وپەراتسيا جاسالعان. وسى باعىتتى ودان ءارى دامىتۋعا بىرقاتار شارالار جوسپارلانىپ وتىر.
ءدال بۇگىندە استانادا ەكسپو-2017 كورمەسىنە دايىندىق جۇمىستارى قارقىندى جۇرگىزىلۋدە. ول جايىندا «استانا كونۆەنشن بيۋرو» جشس-ءىنىڭ ديرەكتورى سانيار ايتەكەنوۆ باياندادى.
قازىرگى ۋاقىتتا باس قالادا جاياۋ ءجۇرگىنشىلەردى باعدارلاۋ جۇيەلەرى – پيلون نۇسقاعىشتار قۇرىلىپ, قىزىل ءتۇستى تۋريستىك اۆتوبۋستار باعىتى اشىلىپ, اقپاراتتىق دۇڭگىرشەكتەر ىسكە قوسىلعان. قىزمەت كورسەتۋ سالاسىنىڭ ساپاسىن كوتەرۋ ماقساتىندا «Recommended by EXPO-2017» استانا قالاسىنىڭ ارىپتەستىك باعدارلاماسى جۇمىس ىستەيدى, وعان قوناق ۇيلەر, حوستەلدەر, قوعامدىق تاماقتانۋ نىساندارى, قىزمەت كورسەتۋشى كاسىپورىندار جانە كولىك كومپانيالارى قاتىسۋدا ەكەن.
– بۇگىندە اعىلشىن ءتىلىن وقىتۋعا ەرەكشە كوڭىل بولىنگەن. وسى باعدارلاماعا قاتىسقان جۇزگە جۋىق ادامنىڭ 50 پايىزى كۋرستان ءوتتى, سونداي-اق اعىلشىن تىلىنەن دايىندىقتان وتۋگە ارنالعان اقپاراتتىق ورتالىقتار بار, ولار ءبىزدىڭ قىزمەتكەرلەردى اقىسىز نەگىزدە وقىتۋعا دايىن. سونداي-اق, ەگەر ادام تاكسي شاقىرىپ, وعان تۇسىنىكسىز تىلدە سويلەسە, تۋريست call-ورتالىققا حابارلاسسا, وپەراتورلار وعان سوزدەردى اۋدارىپ بەرەدى, – دەدى سانيار ايتەكەنوۆ.
قىسقاسى, الەم كوز تىگىپ وتىرعان ارۋ استانامىز تۋريستىك دەستيناتسيا رەتىندە عانا ەمەس, تۇرعىندار ءۇشىن جايلى, تازا قالا رەتىندە دامىپ, كوركەيىپ كەلە جاتقانى قۋانتادى.
ازامات ەسەنجول
