استانالىق ءماسليحاتتا قالالىق قوعامدىق كەڭەستىڭ وتىرىسى ءوتىپ, وعان ەلوردا اكىمىنىڭ ورىنباسارى اندرەي لۋكين قاتىستى.
الدىمەن جيىندا قوعامدىق كەڭەستىڭ وتىرىسىندا قارالاتىن ماسەلەلەر ايقىندالدى. ودان كەيىن ەلور-دالىق ءماسليحاتتىڭ 2015 جىلعى 11 جەلتوقسانداعى «استانا قالاسىنىڭ 2016-2018 جىلدارعا ارنالعان بيۋدجەتى تۋرالى» شەشىمىنە وزگەرىستەر ەنگىزۋ جانە باس قالانىڭ 2017-2019 جىلدارعا ارنالعان بيۋدجەتىنىڭ جوباسى جايىنداعى ەكى ماسەلەگە وراي اندرەي لۋكين بايانداما جاسادى.
قالا اكىمىنىڭ ورىنباسارى ءوز بايانداماسىندا الداعى ءۇش جىلعا ارنالعان بيۋدجەت جوباسى قازاقستان رەسپۋبليكاسىنىڭ بيۋدجەت كودەكسىنە, جەرگىلىكتى بيۋدجەتتەردى ازىرلەۋ ەرەجەسىنە سايكەس ازىرلەنىپ, دايىندالعاندىعىن جەتكىزدى. ودان كەيىن ەلوردانىڭ بيىلعى الەۋمەتتىك-ەكونوميكالىق كورسەتكىشتەرى جايىندا قىسقاشا ءسوز قوزعادى. «بيىلعى تاريحي جىل دا اياقتالىپ قالدى. سوڭعى توعىز ايداعى ەسەپ بويىنشا استانانىڭ ەكونوميكالىق قۋاتى ەسەلەنىپ, سالىق تۇسىمدەرى دە جوعارىلادى. شاعىن جانە ورتا بيزنەستىڭ دە دامۋى ەرەكشە ءرول اتقارىپ وتىر» دەدى ول. سودان سوڭ بايانداماشى قوعامدىق كەڭەس مۇشەلەرىنە الداعى ءۇش جىلعا ارنالعان بيۋدجەتتىڭ جوباسىن تانىستىردى. وندا الەۋمەتتىك سالاعا بولىنگەن قارجى كولەمى دە ايتىلدى. سالىق تۇسىمدەرى دە ءسوز بولدى. تازالىق جۇمىستارىنا دا ەرەكشە ءمان بەرىلىپ وتىرعانى باياندالدى. قىسقاسى, وتىرىستا ءۇش جىلعا ارنالعان بيۋدجەت جوباسى كەڭىرەك ساراپقا سالىندى. كەڭەس مۇشەلەرى دە ەلوردا اكىمىنىڭ ورىنباسارىنا بيۋدجەت جوباسىنا قاتىستى سۇراقتارىن قويىپ, ناقتى جاۋاپتار الدى.
سونىمەن بىرگە قوعامدىق كەڭەستە استانا قالاسىنىڭ مەكتەپكە دەيىنگى ۇيىمدارىنداعى 2017 جىلعا ءبىر ءتاربيەلەنۋشىگە مەكتەپكە دەيىنگى تاربيەلەۋ مەن وقىتۋعا مەملەكەتتىك ءبىلىم بەرۋ تاپسىرىسىن, جان باسىنا شاققانداعى قارجىلاندىرۋدى جانە اتا-انانىڭ اقى تولەۋ كولەمىن بەكىتۋ جانە «استانانىڭ ساۋلەت جانە قالا قۇرىلىسى باسقارماسى كورسەتەتىن مەملەكەتتىك قىزمەتتەردىڭ رەگلامەنتتەرىن بەكىتۋ تۋرالى»
استانا اكىمدىگىنىڭ 2015 جىلعى 19 قاراشاداعى №120-2110 قاۋلىسىنا وزگەرىستەر ەنگىزۋگە بايلانىستى وسى باسقارمانىڭ جاۋاپتى تۇلعالارى قىسقاشا بايانداپ ءوتتى. سونداي-اق, وتىرىستا استانا ازاماتتارىنىڭ جەكەلەگەن ساناتتارىنا قالالىق باعدارلاردىڭ جولاۋشىلار كولىگىندە جول ءجۇرۋگە تولەم تولەۋدەن بوساتۋ ءتۇرىندە الەۋمەتتىك كومەك كورسەتۋ ءتارتىبى مەن «استانانىڭ كوممۋنالدىق مۇلىك جانە مەملەكەتتىك ساتىپ الۋلار باسقارماسى تۋرالى ەرەجەنى بەكىتۋ تۋرالى» ەلوردا اكىمدىگىنىڭ 2015 جىلعى 9 قىركۇيەكتەگى №10-1568 قاۋلىسىنا وزگەرىستەر ەنگىزۋ جايىندا دا ماسەلە قوزعالدى.
ازامات ەسەنجول
