تۇركىستان, تۇلە! شىمكەنت, شىرايلان!
بيىلعى جىلدىڭ ەرەكشە ەستە قالار جاڭالىقتارىنىڭ ءبىرى – تۇركى جۇرتىنا ورتاق تۇركىستان قالاسىنىڭ وبلىس ورتالىعى بولۋى, وڭتۇستىك قازاقستان وبلىسىنىڭ تۇركىستان وبلىسى دەپ اتاۋىن وزگەرتۋى, سونىمەن بىرگە بۇرىن وبلىس ورتالىعى بولعان شىمكەنتتىڭ رەسپۋبليكالىق ماڭىزى بار قالا مارتەبەسىن يەلەنۋى.
تۇركىستان قالاسىن وبلىس ورتالىعىنا اينالدىرۋدى كەزىندە ۇلت قايراتكەرى وزبەكالى جانىبەكوۆ تە ارمانداپ وتكەن ەكەن. سول ارمان, مىنە, قازاقستان تاۋەلسىزدىگىنىڭ 27-ءشى جىلىندا جۇزەگە اسىپ وتىر. 2018 جىلدىڭ 19 ماۋسىمى كۇنى پرەزيدەنت نۇرسۇلتان نازارباەۆ «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسىنىڭ كەيبىر ماسەلەلەرى تۋرالى» جارلىققا قول قويىپ, وتكەن عاسىردا-اق اعالار اڭساعان ارماندى ورىنداپ, ايدى اسپانعا شىعاردى.
«بۇل اكىمشىلىكتىڭ اۋماقتىڭ قۇرىلىمدىق وزگەرىستەرى وسى ءوڭىردىڭ وركەندەۋىنە تىڭ سەرپىن بەرۋىن كوزدەگەن تاريحي قۇجات بولادى. وڭتۇستىك قازاقستان – ەلىمىزدەگى ەكونوميكالىق, كولىك, لوگيستيكالىق, دەموگرافيالىق الەۋەتى زور ايماق. بيىل حالقىنىڭ سانى ميلليونعا جەتكەن شىمكەنت قازاقستاننىڭ ەڭ ءىرى ءۇش مەگاپوليسىنىڭ قاتارىنا قوسىلدى» دەپ مالىمدەدى سول جولى ەلباسى.
استانا, الماتى شاھارلارى سەكىلدى شىرايلى شىمكەنت تە ءوز الدىنا دەربەس, ەرەكشە مارتەبەلى قالاعا اينالدى. ءسويتىپ اكىمشىلىك بىرلىك ەلىمىزدىڭ ون جەتىنشى ايماعى اتاندى.
بۇل وقيعا الاش رۋحىن اسپانداتقانداي بولدى. ويتكەنى تۇركىستاندى تۇلەتۋ – رۋحانياتىمىزدى, تاريحىمىزدى, رۋحىمىزدى تۇلەتۋ. سونىمەن قاتار بۇل رەسپۋبليكالىق دەڭگەيدە ەرەكشە نازار اۋدارىپ, دامىتۋ نىساندارىن ءارتاراپتاندىرۋدىڭ دا ءبىر كورىنىسى ەدى. الماتى مەن استانا قالالارىنا عانا ەمەس, شىمكەنت قالاسىنا كوڭىل ءبولۋ ارقىلى, ءبىز ەلىمىزدىڭ دامۋ لوكوموتيۆىن ءار ايماقتان ىسكە قوسقالى وتىرمىز. اسىرەسە, وبلىس ورتالىعىنا اينالعان تۇركىستاندى دامىتۋ ارقىلى حالقى كوپ وڭتۇستىك ايماقتىڭ دامىپ, وركەندەۋىنە زور سەرپىن بەرەتىنى ءسوزسىز.