بايقوڭىر اۋدانىنا قاراستى «جاستار» ىقشام اۋدانىندا «اقىلدى اۋدان» جوباسى اياسىندا «Astana Clean Time» كومپانياسىنىڭ تۇرمىستىق قاتتى قالدىقتاردى قابىلدايتىن العاشقى «GreenStation» پۋنكتى اشىلدى. مۇندا قاعاز, پوليەتيلەن, پلاستيك جانە اينەك قالدىقتارىن وتكىزسەڭىز, ونىڭ كەلىسىنە قاراي اقشاسى تولەنەدى.
جالپى, قالادا قالدىقتى اقشاعا ايىرباستايتىن مۇنداي 10 ورىن بار ەكەن. مىسالى, «سەۆەرنوە سيانيە», «ارمان قالا» تۇرعىن ءۇي كەشەندەرىندە دە تۇرمىستىق قالدىقتاردى قابىلدايدى. بىراق ولار باسقا كومپانيالاردىڭ قاراماعىندا كورىنەدى. ال «جاستار» ىقشام اۋدانىنداعى كراۆتسوۆ كوشەسىنىڭ بويىنان اشىلىپ جاتقان پۋنكتتىڭ كولەمى – 30 شارشى مەتر. ونىڭ قويماسىنا 5 تسەنتنەرگە دەيىن قالدىق سىيىپ كەتەدى. مۇندا كەلۋشىلەر ءۇشىن ۇستەل مەن ورىندىق تا قاراستىرىلىپتى. قىستىڭ كەزىندە ءىشى جىلىتىلاتىنىن ايتادى ماماندار. «Astana Clean Time» كومپانياسىنىڭ باس ديرەكتورى تيمۋر ىسماعۇلوۆتىڭ مالىمەتىنشە, بۇل پۋنكتى سالۋعا 5,5 ملن تەڭگە جۇمسالعان. جىل سوڭىنا دەيىن وسىنداي پۋنكتىڭ تاعى 22-ءسىن اشپاق.
– قالا اكىمدىگى مەن «Astana Innovations» كومپانياسىنىڭ قولداۋىمەن وسى جوبانى جۇزەگە اسىرىپ جاتىرمىز. تۇرعىندار مۇندا قالدىقتى سۇرىپتاپ, ءبولىپ اكەلىپ وتكىزەدى. ازىرگە قالدىقتىڭ 11 ءتۇرى قابىلدانادى. ولاردىڭ باعاسى شيكىزاتقا بايلانىستى 3 تەڭگەدەن باستالىپ, 100 تەڭگەگە دەيىن بارادى. مىسالى, پوليەتيلەندەردىڭ كەلىسى 70 تەڭگە بولسا, پلاستيكتەردىڭ كەلىسى – 40 تەڭگە. ال جينالعان قالدىقتاردى ءبىز «اعايىندار Kz», «Kagazy Recycling» سياقتى شيكىزاتتان ءونىم جاساپ شىعاراتىن تەك قازاقستاندىق كومپانيالارعا جونەلتەمىز. پوليەتيلەندەر 500 جىلعا دەيىن شىرىمەيدى. سوندىقتان ونىڭ ەكولوگياعا زيانى كوپ. ال ەگەر ونى قايتا وڭدەيتىن بولسا, ءۇش رەت پايداعا جاراتۋعا بولادى. پلاستيكتەردى اسفالت توسەگەندە دە قولدانادى, – دەيدى كومپانيا مەنەدجەرى اسەت اباەۆ تىلشىلەرگە بەرگەن سۇحباتىندا.
ايتا كەتۋ كەرەك, اتالمىش كومپانيادا 100-دەن اسا ادام جۇمىسپەن قامتىلعان. سونىڭ ءبىرى – قالدىق قابىلداۋشى تۇمارشى باتىربەكوۆا. ول بۇعان دەيىن «سەۆەرنوە سيانيە» تۇرعىن ءۇي كەشەنىندەگى پۋنكتە جۇمىس ىستەپتى. ايتۋىنشا, ەلوردالىقتاردىڭ بۇعان قىزىعۋشىلىقتارى زور. تەك تۇرعىنداردىڭ باسىم كوپشىلىگى مۇنداي ورىنداردىڭ بار ەكەنىنەن حابارسىز كورىنەدى. بىلەتىندەر قاتتى قالدىقتى تۇراقتى تۇردە وتكىزىپ تۇراتىنىن ايتادى. ال مۇنداعى ەڭ العاشقى كليەنتتەردىڭ ءبىرى – 10 جاستاعى ادىلقازى الياسقار. ول پلاستيك بوتەلكەلەر مەن كارتون قاعاز وتكىزىپ, ازداعان تيىن-تەبەنىن العانىنا ءماز. «قالدىقتى قابىلداۋ پۋنكتتەرىنىڭ پايداسى مول. بىرىنشىدەن, قايتا وڭدەۋگە ءتيىمدى. ەكىنشىدەن, قوقىس پوليگونىندا دا ورىن كوبىرەك بولادى. سونداي-اق اتا-انالارى بالالارىنىڭ كۇندەلىكتى ءجۇرىس-تۇرىسىن وسىدان دا شىعارۋعا بولادى. ويتكەنى ءار ۇيدەن قالدىق ءبارىبىر شىعادى. ال ونى بوستان-بوسقا تاستاعانشا, اقشاعا ايىرباستاعانى قانداي جاقسى» دەيدى ماماندار.
اتالمىش پۋنكتتىڭ اشىلۋ سالتاناتىنا بايقوڭىر اۋدانى اكىمىنىڭ ورىنباسارى رۋسلان ورالوۆ پەن ەنەرگەتيكا مينيسترلىگىنىڭ جانە «Astana Innovations» اق كومپانياسىنىڭ وكىلدەرى, شيكىزاتتى وڭدەۋ كاسىپورىندارىنىڭ باسشىلارى قاتىسىپ, يگىلىكتى ىسكە ساتتىلىك تىلەدى.
