«استانا – ادالدىق الاڭى» جوباسى اياسىندا قر سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن رەسپۋبليكالىق ۇگىت-ناسيحات توبى قۇرىلدى.
بۇل تۋرالى كەشە نۇر-سۇلتان قالاسى اكىمدىگىنىڭ ءباسپاسوز ورتالىعىندا وتكەن باسقوسۋدا ايتىلدى. ۇگىت-ناسيحات توبىنىڭ ماقساتى – وڭىرلەردى, اۋىل-ايماقتاردى ارالاپ, حالىقپەن تىلدەسۋ, قوعامدا بەدەلى بار بەلسەندى جەرگىلىكتى تۇرعىنداردىڭ ۇسىنىستارى مەن وتىنىشتەرىن نازارعا الا وتىرىپ, ماسەلەلەردى جەدەل شەشۋ. قوعام مەن مەملەكەتتىك اپپارات اراسىندا تىعىز بايلانىس ورناتىپ, بۇدان بولەك, ادالدىق, ادىلدىك, پاراساتتىلىق قاسيەتتەردى ناسيحاتتاۋ. اتا-بابادان قالعان اسىل مۇرا مەن سالت-ءداستۇردى كەڭىنەن تاراتۋ بويىنشا جۇمىستار جاسايدى.
بۇل توپتىڭ جەتەكشىسى بولىپ بەلگىلى ەتنوديزاينەر, «قۇرمەت» وردەنىنىڭ جانە «التىن ساپا» سىيلىعىنىڭ يەگەرى رزا تۇرسىنزاداقىزى تاعايىندالدى. توپتىڭ قۇرامىنا رەجيسسەر ەرمەك تۇرسىنوۆ, ءماجىلىس دەپۋتاتى يرينا سميرنوۆا, قازاقستانداعى پارلامەنتاريزم قورىنىڭ باسقارما توراعاسى زاۋرەش باتتالوۆا, سىبايلاس جەمقورلىققا قارسى قىزمەتتىڭ اقمولا وبلىسى بويىنشا دەپارتامەنتى باستىعىنىڭ ورىنباسارى, بەلگىلى اقىن ارمان بەردالين سياقتى تانىمال تۇلعالار, قوعام قايراتكەرلەرى كىرگەن.
وسى جوبا اياسىندا ەلوردادا اتقارىلعان جۇمىستار جونىندە نۇر-سۇلتان قالاسى ءماسليحاتىنىڭ دەپۋتاتى, «استانا – ادالدىق الاڭى» جوباسىنىڭ جەتەكشىسى ميراس شەكەنوۆ بايانداپ بەردى. «بۇل جوبانىڭ نەگىزگى ماقساتى – وزىنە ادىلدىك, ادەپتىلىك, ساتىلمايتىندىق سياقتى قۇندىلىقتاردى بىرىكتىرگەن ادالدىق يدەولوگياسىن ناسيحاتتاۋ. جوبا ىسكە اسىرىلعاننان بەرى الەۋمەتتىك قورعاۋ, ءبىلىم بەرۋ, دەنساۋلىق ساقتاۋ, ساۋلەت جانە قالا قۇرىلىسى سالالارىنداعى جەمقورلىق تاۋەكەلدەرىن جويۋ باعىتىندا قىرۋار جۇمىس اتقارىلدى. مىسالى, دەنساۋلىق ساقتاۋ سالاسىندا بيزنەس ۇدەرىستەردى تسيفرلاندىرۋ جۇمىسى جولعا قويىلدى. سونىڭ ناتيجەسىندە ۋاقىتشا ەڭبەككە جارامسىزدىعى جونىندەگى پاراقشالارعا شتريح-كود سالىندى. ياعني جۇمىس بەرۋشى وسى شتريح-كود ارقىلى ناۋقاس پاراقشاسىنىڭ شىنايىلىعىن تەكسەرەدى. دەمەك, ناۋقاس پاراقشاسىنا قاتىستى زاڭسىز بيزنەس جويىلدى» دەدى ميراس ەرعاليۇلى.
«ءبىز تازا ەلدى تاڭدايمىز!» اتتى ەكولوگيالىق قوزعالىسىنىڭ ۇيىمداستىرۋشىسى شاساليم شاگاليموۆ ەلوردالىق «استانا – ادالدىق الاڭى» جوباسىنىڭ كومەگىمەن رەيدتەر جۇرگىزۋ بارىسىندا انىقتالعان ەكولوگيالىق ماسەلەلەردى تىلگە تيەك ەتتى.
