تۋريستەرگە ەلوردا تارتىمدى ما؟

استانانىڭ الەۋمەتتىك-ەكونوميكالىق ءومىرىن­دەگى سوڭعى جىلدارداعى وزگەرىستەر تۋريزم
سالاسىن شاپشاڭ دامىتۋعا مۇمكىندىك بەردى. تۋريس­تەردىڭ ەلوردامىزعا دەگەن قىزىعۋ­شىلىعى وسى سالانىڭ جاقسى كورسەتكىشتەرىمەن دالەلدەندى. 2023 جىلدىڭ ءبىرىنشى جارتىجىلدىعىندا تۋريستەر سانى 29%-عا ارتىپ, باس قالاعا 600 مىڭنان استام ادام كەلگەن.

باس قالاعا ين­ۆەستيتسيالار تارتۋ جانە ەلوردا ءتۋريزمىن دامىتۋ سالاسىندا «استانا دامۋ ورتالىعى» جشس جۇيەلى جۇمىس ىستەيدى. ەلورداعا تۋريستەردىڭ كەلۋى ءۇشىن بارلىق ينفراقۇرىلىمدىق مۇمكىندىك جاسالعان. اتاپ ايتقاندا, ورتالىق ازيادا ەڭ قۋاتتى بولىپ تانىلعان زاماناۋي اۋەجاي, ەكى تەمىرجول ۆوكزالى مەن ساپارجاي بار. قالاداعى حالىقارالىق اۋەجايدا 29 باعىت بويىنشا الەمنىڭ 15 ەلىنە تىكەلەي رەيستەر اشىق. سول ارقىلى تۋريستەردى قابىلداۋدىڭ نەگىزگى ورتالىعى سانالادى. وسى جىلدىڭ 9 ايىندا ۇشاقپەن قاتىناعان جولاۋشىلار قاتارى 28%-عا, ال تەمىرجولدا جولاۋ­شى اعىنى 17%-عا ۇلعايدى. تۋريستەردىڭ جايلى تۇراقتاۋى ءۇشىن قالادا ءارتۇرلى كاتەگوريا­لى 229 قوناقۇي بار. سونىڭ ىشىندە الەمدىك برەند سانالاتىن ءىرى قوناقۇيلەرگە سۇرانىس كوپ.

قولايلى جاعداي جاسالعان با؟

ەلوردانىڭ پايدالى ينفراقۇرىلىمى تۋرالى ايتاتىن بولساق, قالادا قۇرىلعان جاياۋ جۇرگىنشىلەرگە باعدارلاۋدىڭ بىرىڭعاي جۇيەسى – نەگىزگى ەلەمەنتتەردىڭ ءبىرى. قالا قوناقتارى مەن تۇرعىندارى 105 ناۆيگاتسيا­لىق تىرەك پەن 138 بەلگى ارقىلى ەلوردا بويىنشا مارشرۋتتاردى وڭاي قۇراستىرا الادى جانە قالانىڭ كورىكتى جەرلەرى, سونداي-اق قالالىق قىزمەتتەردىڭ بارلىق قاجەتتى بايلانىستارى تۋرالى ءۇش تىلدە اقپارات الادى.

قانداي دا ءبىر ەلگە بارعاندا, كوپتەگەن تۋريست قىزىقتى مارشرۋت جاساۋعا, قاراجات ۇنەمدەۋ­گە, باراتىن جەرلەرى تۋرالى پايدالى ماعلۇماتپەن قانىعۋعا مۇمكىندىك بەرەتىن ءموبيلدى قوسىمشالاردى ورناتىپ جاتادى. ال استانادا ساياحاتتاۋعا ءتيىمدى ءموبيلدى قوسىمشالاردىڭ ءبىرى – izi.TRAVEL. وعان كەز كەلگەن تۋريست قالانىڭ بىرقاتار كورىكتى جەرلەرىنىڭ ماڭدايشالارىندا كورسەتىلگەن QR كودىن پايدالانىپ كىرە الادى. حالىقارالىق پلاتفورمادا ورنالاستىرىلعان 167-دەن استام اۋديوەكسكۋرسيا كوپشىلىككە قولجەتىمدى. ەلوردانىڭ تاريحي-مادەني وبەكتىلەرى تۋرالى اقپارات قوسىمشادا 6 تىلدە (قازاق, ورىس, اعىلشىن, قىتاي جانە تۇرىك) بەرىلەدى. سونىمەن قاتار CityPass تۋريستەرگە ارنالعان بىرىڭعاي كارتاسى ارقىلى استانانىڭ 11-دەن استام نىسانىنا ارنايى بەلگىلەنگەن باعا بويىنشا ەركىن كىرۋگە بولادى.

باس شاھارعا كەلگەن ءاربىر تۋريستكە ىڭعايلى بولۋى ءۇشىن قالادا تۋريستىك اقپاراتتىق دۇڭگىرشەكتەر (حالىقارالىق اۋەجاي جانە «بايتەرەك» مونۋمەنتىندە) جۇمىس ىستەيدى. اقپاراتتىق دۇڭگىرشەكتەردە Z-كارتانى, «AstanaOfficial Guide» بويىنشا نۇسقاۋلىقتى تەگىن الۋعا جانە ەلوردا قوناقتارىن قىزىقتىراتىن كورىكتى جەرلەر, ءىس-شارالار, ەكسكۋرسيالىق مارشرۋتتار, ويىن-ساۋىق ورىندارى, قوناقۇيلەر تۋرالى بارلىق قاجەتتى اقپاراتتى الۋعا بولادى.

ىسكەرلىك تۋريزم الەۋەتى قانداي؟

قاي جاعىنان الىپ قاراساڭىز دا, استانانىڭ ىسكەرلىك ءتۋريزمدى دامىتۋعا قاجەتتى مۇمكىندىگى بار. ەلوردانىڭ اۋقىمدى الەمدىك شارالار مەن كورمەلەر وتكىزەتىن ىسكەرلىك ورتالىق رەتىندەگى كەلبەتى جىل وتكەن سايىن نىعايىپ, مىڭداعان ادام استاناعا ءارتۇرلى كورمەگە, كونفەرەنتسيا مەن سەمينارعا قاتىسۋ ءۇشىن, ياعني ىسكەرلىك ماقساتپەن كەلەدى. جاھاندىق دەڭگەيدە «meetings, incentives, conferences, exhibitions» دەگەن ۇعىمدار بار, بىرىگىپ ولار MICE دەپ اتالىپ, ىسكەرلىك تۋريزم باعىتى بولىپ تانىلادى.

«استانا دامۋ ورتالىعى» جشس – كونگرەستەر مەن كونفە­رەنتسيالاردىڭ حالىقارالىق اسسوتسياتسياسىنىڭ (ICCA) مۇشەسى. حالىقارالىق ۇيىمداردىڭ ءىس-شارالارى ەلىمىزگە بيددينگ ارقىلى تارتىلادى. وعان قاتىسۋ ارقىلى ەلوردادا INQAAHE Conference 2023, THE BIZZ  Eurasia2023, 17th Asian Regional Geotechnical Engineering Conference  سەكىلدى ماڭىزدى ءىس-شارالار وتكىزىلدى.  بۇگىندە ءتۋريزمنىڭ ءيميدجىن قالىپتاستىرۋدا تسيفرلى تەحنولوگيالار, ناقتىراق ايتساق, الەۋمەتتىك جەلىلەر قارقىندى دامىپ جاتىر. تۋريستەردىڭ ءتۇرلى اگەنتتىكتەرگە نازارىن اۋدارتۋدا ءارى مەديا ارقىلى كوپشىلىكتى قىزىقتىرۋدا بۇل قۇرال تيىمدىلىگىن كورسەتىپ وتىر. «Visit Astana» – تۋريستىك برەند. قازىرگى ۋاقىتتا تسيفرلىق كەڭىستىكتە 10 ميلليوننان استام ادامدى قامتيتىن 5 اقپارات ارنالارى قىزمەت ەتەدى. ولاردىڭ قاتارىنا تۋريستەرگە ارنالعان «Visit Astana» ەلەكتروندى سايتى جاتادى. سايتتا تۋريست وزىنە قاجەتتى بارلىق اقپاراتتى تاۋىپ, سونىمەن قاتار بوس ۋاقىتىن جوسپارلاي الادى.

سونداي-اق جاقىندا ەلوردادا كوميكستەر, كينو, بەينە ويىندار, انيمە جانە زاماناۋي پوپ-مادەنيەت يندۋسترياسىنىڭ وكىلدەرى باس قوسقان Comic Con Astana 2023 حالىقارالىق فەستيۆالى ءوتتى. بۇل ءىس-شارا 81 مىڭنان استام كەلۋشىلەردىڭ, سونىڭ ىشىندە رەسەي, ازەربايجان, كورەيا, قىتاي جانە باسقا ەلدەردەن كەلگەن 3 مىڭنان استام شەتەلدىك قوناقتاردى بىرىكتىردى. ولاردىڭ باسىم بولىگى – جاستار. وسىلايشا حالىقارالىق فەس­تيۆال ەلوردانىڭ وقيعالى ءتۋريزمدى دامىتۋ سالاسىندا ناتيجە كورسەتتى.

الەمدە ءتۋريزمنىڭ وسى تۇرىنەن قىرۋار تابىس تاۋىپ, ۇلتتىق ەكونوميكاسىن وركەندەتكەن ەلدەر مەن قالالار كوپ. سوندىقتان قازىردەن باستاپ باس قالادا حالىقارالىق اۆيارەيستەردىڭ سانىن ارتتىرۋ, ءىرى حالىقارالىق فەستيۆالدەر مەن جارىستار وتكىزۋدى جوسپارلاۋ, قالانى تۋريستەر ءۇشىن تارتىمدى جانە جايلى ەتۋ كەزەك كۇتتىرمەيتىن مىندەتتەردىڭ ءبىرى بولماق.

مەديتسينالىق تۋريزمگە ءمان بەرىلەدى

ەلوردانىڭ مەديتسينالىق ءتۋريزمدى دامىتۋدا ارتىق­شىلىعى باسىم. باس قالادا الەمنىڭ سوڭعى تەحنولوگيالىق جەتىستىكتەرىمەن جابدىقتالعان مەديتسينالىق مەكەمە كوپ, سونىڭ ارقاسىندا اسىرەسە كارديو, ونكولوگيا جانە نەيروحيرۋرگيالىق كومەك كورسەتۋ ءىسى قارقىندى دامىپ كەلەدى. بۇگىنگى تاڭدا قازاقستاندا مەديتسينادا «التىن ستاندارت» سانالاتىن JCI (Joint Commission International) حالىقارالىق اككرەديتاتسياسىن العان 9 ەمحانا بار بولسا, سونىڭ 7-ەۋى استانا قالاسىندا ورنالاسقان. مىسالى, باس قالامىزداعى رەسپۋبليكالىق دياگنوستيكالىق ورتالىق, انا مەن بالا ۇلتتىق عىلىمي ورتالىعى, بالالاردى وڭالتۋ ۇلتتىق ورتالىعى, ونكولوگيا, ترانسپلانتولوگيا ۇلتتىق عىلىمي ورتالىعى سەكىلدى ەمدەۋ مەكە­مەلەرىنە مەديتسينالىق ءتۋريزمدى دامىتۋ بويىنشا ۇلكەن ءۇمىت ارتىلىپ وتىر. رەس­پۋبلي­­كالىق دياگنوستيكالىق ورتا­لىقتا قازاقستانداعى جالعىز پەت ورتالىق جۇمىس ىستەيدى. قازاقستانداعى ەڭ ءىرى مەدي­تسينالىق زەرتحانا دا وسىندا. ال بالالاردى وڭالتۋ ۇلتتىق ورتالىعىندا كەشەندى تۇردە مەديتسينالىق, الەۋمەتتىك جانە پەداگوگيكالىق وڭالتۋ قىزمەتتەرى ۇسىنىلادى. استانا قالاسى مەن جالپى قازاقستان ءۇشىن مەديتسينالىق تۋريزم دونورلارى – تمد ەلدەرى جانە قىتاي مەملەكەتىنىڭ وكىلدەرى.

مەديتسينالىق مەكەمەلەردە باعا ساياساتى بويىنشا باسەكەگە قابىلەتتى قىزمەتتىڭ الۋان تۇرلىلىگى ۇسىنىلادى, سەبەبى ول الەمدەگى ەڭ تومەنگى كورسەتكىشتەردىڭ ءبىرى.

مەديتسينالىق ۇيىمداردا شەتەلدىك ازاماتتارعا دياگنوس­تيكادان (check-up – اعزانى تولىق تەكسەرۋ) باستاپ, جۇرەككە, ومىرتقاعا جانە ميعا جاسالاتىن وپەراتسيالار سياقتى جوعارى تەحنولوگيالىق مەديتسينالىق قىزمەتتەردى قوسا العاندا, كۇردەلى وپەراتسيالاردى جۇرگىزۋگە دەيىنگى قىزمەتتەر ۇسىنىلادى. باس قالادا ەكستراكورپورالدى ۇرىقتاندىرۋ (ەكۇ) قىزمەتىنە شەتەلدىكتەر تاراپىنان سۇرانىس­تىڭ ارتا تۇسكەنى بايقالادى. ماسەلەن, 2022 جىلى ەلوردانىڭ مەديتسينالىق ۇيىمدارىنا قىرعىزستاننان 900-دەن استام ادام, وزبەكستاننان 254 ادام, رەسەيدەن 92 ادام, اقش, كانادا, قىتاي, تۇركيا جانە ت.ب. ەلدەردەن 41 ادام وسى ەكۇ بويىنشا جۇگىندى. تسيفرلى كەڭىستىكتە مەديتسينالىق ءتۋريزمدى ىلگەرىلەتۋ ءۇشىن Med-Tourism.kz العاشقى مەديتسينالىق نۇسقاۋلىق سايتى ىسكە قوسىلدى. سونداي-اق استانانىڭ العاشقى مەديتسينالىق كاتالوگى شىعارىلىپ, ول رەسپۋبليكادان تىس جەرلەردە تاراتىلادى.