قازاقستان رەسپۋبليكاسى كونستيتۋتسياسىنىڭ 27-بابىندا: «نەكە مەن وتباسى, انا مەن بالا مەملەكەتتىڭ قورعاۋىندا بولادى. بالالارىنا قامقورلىق جاساۋ جانە ولاردى تاربيەلەۋ – اتا-انانىڭ ەتەنە قۇقىعى ءارى مىندەتى» دەلىنگەن.
الميساقتان اقيقات: اتا-اناعا, وتانعا, قورشاعان ورتاعا دەگەن سۇيىسپەنشىلىك وتباسىنان باستالادى. تۋعان شاڭىراقتان العان تاربيە – بۇل بارشا حالقىمىزدىڭ باقۋاتتى دا تابىستى بولاشاعىنىڭ كەپىلى. سوندىقتان, وتباسى قۇقىنىڭ ماڭىزى زور. ءار شاڭىراق بەلگىلى داستۇرلەردىڭ, جاعىمدى ونەگەلەردىڭ, مۇرالار مەن مەن سالت-داستۇرلەردىڭ ساقتاۋشىسى دەيتىن بولساق, ونداعى ءتالىم-تاربيە – جالپى مادەنيەتتىڭ, ەتيكانىڭ باستاۋ بولىگى.
قازاقستان رەسپۋبليكاسىنىڭ نەكە جانە وتباسىنا قاتىستى قۇقىقتىق ۇستانىمىنىڭ نەگىزدەرى مەن كوزقاراسى قازاقستان رەسپۋبليكاسىنىڭ كونستيتۋتسياسىنا, «نەكە (ەرلى-زايىپتىلىق) جانە وتباسى» تۋرالى كودەكسكە جانە وزگە دە نورماتيۆتىك-قۇقىقتىق اكتىلەرگە نەگىزدەلەدى. وسى ورايدا ەلوردا ازاماتتارىنىڭ زاڭدى قۇجاتتارىنىڭ بولۋىن قامتاماسىز ەتۋگە, ولاردىڭ كونستيتۋتسيالىق قۇقىلارى مەن بوستاندىقتارىن قورعاۋدا نەگىزگى جاۋاپكەرشىلىك اۋداندىق ازاماتتىق حال اكتىلەرىن تىركەۋ ورگاندارىنا جۇكتەلەدى. سەبەبى, ادام بالاسى جارىق دۇنيە ەسىگىن اشقان ساتتەن باستاپ ونىڭ ازاماتتىق قۇقى قۇجات الۋدان باستالادى. ازاماتتىق حال اكتىلەرى جازبالارى – قۇزىرەتتى ورگاننىڭ ۋاقيعالار مەن ارەكەتتەر تۇپنۇسقاسىن كۋالاندىرۋ ماقساتىنداعى جازباشا ماعلۇماتتار. وتباسىلىق قۇندىلىقتاردى, ەگىز, ۇشەم بالالاردى تىركەۋ, ۇلتتىق ءداستۇر بويىنشا تەگىن اۋىستىرۋ, ۇلتتىق ءداستۇر بويىنشا جاڭا تۋعان بالاعا اكەسىنىڭ نە اتاسىنىڭ اتىن بەرۋ, سالتاناتتى تۇردە جاس-جۇبايلاردىڭ نەكەسىن قيۋدى ناسيحاتتاۋ – ءبىزدىڭ باستى مىندەتتەرىمىزدىڭ ءبىرى.
ەلىمىزدە وتباسى كۇنى بەكىتىلگەننەن بەرى ەلوردامىزدا جيىرما ءۇش مىڭنان استام بالا دۇنيەگە كەلىپ, توعىز مىڭنان استام نەكە تىركەلىپتى. بۇل دەگەنىمىز – وتباسىلىق دەموگرافيالىق ساياساتتىڭ دۇرىستىعىنىڭ, حالقىمىزدىڭ ءال-اۋقاتىنىڭ ارتقاندىعىنىڭ دالەلى.
باقىتجامال بازارباەۆا,
ەسىل اۋداندىق ادىلەت باسقارماسى احات ءبولىمىنىڭ باسشىسى
