ءسوز ونەرى مەن ساز ونەرى – ەگىز. بۇل, اسىرەسە, قازاق جازبا ادەبيەتىنىڭ نەگىزىن قالاعان ۇلى ابايدىڭ شىعارماشىلىعىنان انىق كورىنەدى. «ۇيىقتاپ جاتقان جۇرەكتى ءان وياتار» دەيدى حاكىم. «استانا وپەرا» تەاترىندا وسىنداي اتاۋمەن وتكەن كونتسەرتتە ۇلتتىق مۋزىكانىڭ جاۋھارلارى, اباي ايتپاقشى, كىلەڭ ەستى اندەر شىرقالدى.
قازاقتىڭ حالىق اندەرى, حالىق كومپوزيتورلارىنىڭ تۋىندىلارى, كەڭەس زامانىندا قازاق مۋزىكا ونەرىنىڭ دامۋىنا ۇلەس قوسقان كومپوزيتورلاردىڭ شىعارمالارى ورىندالعان كەشتە ۇستاز بەن شاكىرت – قازاقستاننىڭ ەڭبەك سىڭىرگەن ءارتىسى شاحيماردان ءابىلوۆ پەن «استانا وپەرانىڭ» جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى جۇپار عابدۋللينا ونەر كورسەتتى.
ەلوردا تۇرعىندارى مەن قالا قوناقتارى «ياپىراي», «ءبىر بيداي ارپا», «ءشاپيباۋ», «تىلەۋقاباق», «ەكى جيرەن», «اق قۋراي», «باياناۋىل», «سۇرجەكەي» سىندى حالىق اندەرىنە, اقان سەرىنىڭ «سىرىمبەت», سەگىز سەرىنىڭ «قارعاش», ءمادي ءباپيۇلىنىڭ «قاراكەسەك», ەستايدىڭ «قۇسني-قورلان», جاياۋ مۇسانىڭ «اق سيسا», اباي قۇنانبايۇلىنىڭ «كوزىمنىڭ قاراسى», مۇحيت مەرالىۇلىنىڭ «اينامكوز», زىلقارا بايتوقاۇلىنىڭ «جيىرما بەس» اندەرىنە قۇلاق قۇرىشىن قاندىردى.
بۇل كونتسەرتكە قاتىسقان قازاقستاننىڭ ەڭبەك سىڭىرگەن ءارتىسى ماقپال بەكماعامبەتوۆا (سكريپكا), اسقار مۇقانوۆ (ۆيولونچەل), راۋشان بەسكەمپىروۆا (فورتەپيانو) مۇقان تولەباەۆتىڭ سكريپكاعا ارنالعان پوەماسىن, كەنجەبەك كۇمىسبەكوۆتىڭ ۆيولونچەلگە ارنالعان پوەماسىن, ءالىبي مامبەتوۆتىڭ «تريو – ەلەگياسىنىڭ» ءبىرىنشى جانە ەكىنشى بولىمدەرىن ورىندادى.
– قازاقتىڭ كلاسسيكالىق ءاندەرى ەرەكشە اسەم ءارى كۇشتى داۋىس پەن باي تەمبرلىك بوياۋلاردى عانا تالاپ ەتىپ قويماي, ناقىشپەن ورىنداۋ مانەرىن, كلاسسيكالىق ارياداعىداي ەكىگە جۋىق وكتاۆالى كەڭ دياپازوندى قاجەت ەتەدى. جاس بۋىن سال-سەرىلەرىمىزدىڭ جاۋھار تۋىندىلارىن, حالىق اندەرىن ءجيى تىڭداۋ مۇمكىندىگىنە يە بولعانى اسا ماڭىزدى, – دەدى جۇپار عابدۋللينا كونتسەرتتەن سوڭ سوزگە تارتقانىمىزدا. انشىمەن كەلىسپەسكە بولمايدى. سەبەبى تاربيە ۇلتتىق ونەردە جاتىر.
