جۋىردا ەلوردادا جىل سايىن وتەتىن «قازاقستاننىڭ ۇزدىك تاۋارى» بايقاۋ-كورمەسىنىڭ وڭىرلىك ىرىكتەۋى ءوتتى. وڭىرلىك تۋر بارىسىندا ساراپشىلار كوميسسياسى باس قالادا وندىرىلەتىن ۇزدىك تاۋارلاردى ءۇش اتالىم بويىنشا انىقتادى. ولار – «وندىرىستىك ماقساتتاعى ۇزدىك تاۋارلار», «حالىق تۇتىناتىن ۇزدىك تاۋارلار», «ۇزدىك ازىق-تۇلىك تاۋارلارى» دەپ اتالادى.
سالتاناتتى راسىمگە قاتىسقان استانا اكىمىنىڭ ورىنباسارى باقتيار ماكەن جىل سايىن وتەتىن بايقاۋدىڭ وتاندىق تاۋارلار ءوندىرىسىن, شاعىن جانە ورتا بيزنەستى دامىتۋداعى ماڭىزدىلىعىن اتاپ ءوتتى. «ءبىز جىل سايىن ءوزىنىڭ تابان اقى, ماڭداي تەرىمەن بيزنەسىن دامىتىپ جۇرگەن ادامداردى كورىپ, كوڭىلىمىز مارقايادى. بۇل – اسا ماڭىزدى ءىس, سەبەبى ەلوردامىز قارقىندى دامىپ كەلەدى, ونىڭ كەلەشەگى دە زور. قالا باسشىلىعى ءبىزدىڭ تاۋار وندىرۋشىلەرىمىزدىڭ دەڭگەيىن وسىرۋگە ەرەكشە كوڭىل بولەدى. بايقاۋعا قاتىسۋشىلاردىڭ بارلىعىن, ۇيىمداستىرۋشىلاردى, قالا تۇرعىندارىن اكىمدىكتىڭ اتىنان قۇتتىقتايمىن! بارلىق جەڭىمپازداردى جەڭىسىمەن قۇتتىقتايمىن! بارىڭىزگە تابىس تىلەيمىن!» دەدى باقتيار ماكەن.
نۇر-سۇلتان قالالىق كاسىپكەرلەر پالاتاسىنىڭ ديرەكتورى المات ءجۇنىسوۆ بيىل بايقاۋ-كورمەگە قاتىسۋشى كومپانيالاردىڭ سانى رەكوردتىق دەڭگەيگە جەتكەنىن ءمالىم ەتتى. «بۇل جولى كورمەلىك بايقاۋعا ەلوردانىڭ 100-دەن اسا كومپانيالارى قاتىستى, سونىڭ ىشىندە 70 پايىزى – جاڭادان قاتىسۋشىلار. ۇزدىك دەگەن اتاققا تەلەكوممۋنيكاتسيالىق جابدىق, اۆتوكولىك جانە ۆاگوندار, قۇرعاق قۇرىلىس قوسپالارى, سپورتتىق تاماقتار, سونداي-اق ءتىس پاستاسى, بالالار كيىمى مەن ويىنشىقتار, جارتىلاي فابريكاتتار جانە كونديتەرلىك بۇيىمدار شىعاراتىن وندىرۋشىلەر تالاستى. وڭىرلىك بايقاۋ-كورمەنى ەلوردا اكىمدىگىنىڭ قولداۋىمەن نۇر-سۇلتان قالالىق كاسىپكەرلەر پالاتاسى ۇيىمداستىردى» دەدى پالاتا ديرەكتورى.
باسەكە ناتيجەسىندە «زگم پەنەترون-قازاقستان» جشس, «تسەلينگيدروماش» جشس, «ۆەلس كومپانياسى» جشس, «DANMARD» جشس, «قازاق ويۋلارى» جشس, «Digital System Servis» جشس, «Kazak House» جك, «Golfen Rill Group» جشس, «الاۋ تم» جشس جەڭىمپاز اتاندى.
