استانا اكىمدىگىندە شاھار باسشىسى اسەت يسەكەشەۆتىڭ توراعالىعىمەن قالا ءومىرىنىڭ وزەكتى ماسەلەلەرىن تالقىلاعان كەڭەس ءوتتى. وندا قۇرىلىس, جىلىتۋ ماۋسىمىنا دايىندىق جانە ۇلەسكەرلەر جاعدايى ءسوز بولدى.
اكىم ورىنباسارى سەرگەي حوروشۋن تۇرعىن ءۇي قۇرىلىسىنداعى ۇلەسكەرلەردىڭ ماسەلەلەرى بويىنشا بايانداما جاسادى. ونىڭ ايتۋىنشا, سوڭعى اپتادا ۆەدومستۆوارالىق كوميسسيا وتىرىسىندا 24 نىسان قارالعان. كەيبىر تۇرعىن ءۇي قۇرىلىس كووپەراتيۆتەرىنە بارىپ كەزدەسۋلەر وتكىزگەن. سونداي-اق, «ازبۋكا جيليا» كومپانياسىنىڭ پروبلەماسىن شەشۋ جۇمىستارى قولعا الىنعان. «وردا ينجينيرينگ» جشس باسقارۋشى كومپانياسىنا «گارانت» تۇرعىن ءۇي كەشەنى قۇجاتتارىنىڭ تولىق جيناعى ۇسىنىلىپ, «نۇرلى جەر» باعدارلاماسىنا قاتىسۋ ءۇشىن «ەلوردا» قۇرىلىس كومپانياسى» جشس پەن ۋاكىلەتتى ۇيىم شەڭبەرىندە شارت جاساستى. اتالمىش نىساننىڭ قۇرىلىسىن اياقتاۋ «گرانت ۋسپەح» مۇشەلەرىنىڭ جينالىسىندا انىقتالادى.
سونىمەن قاتار, ۆەدومستۆوارالىق كوميسسيا اياسىندا «تەرريتوريا كومفورتا-1 استانا» تۇرعىن ءۇي كەشەنى «نۇرلى جەر» باعدارلاماسىنا قاتىسۋعا شەشىم قابىلداندى. «ەلوردا قۇرىلىس كومپانياسى» «تەرريتوريا كومفورتا-1» تۇرعىن ءۇي كەشەنىنىڭ جوبالاۋ-سمەتالىق قۇجاتتامانى ازىرلەۋگە بايلانىستى بىرلەسىپ قىزمەت جاساۋعا كەلىسىمشارت جاساۋ جوسپارلاندى. «تەرريتوريا كومفورتا-2» تۇرعىن ءۇي كەشەنى مەن «مۇنار-2» تۇرعىن ءۇي كەشەنى قۇرىلىسىن اياقتاۋ سوت شەشىمىمەن تۇرعىن ءۇي قۇرىلىس كووپەراتيۆتەرىنە بەرىلدى.
جيىندا ىشكى ىستەر دەپارتامەنتىنىڭ باسشىسى مارات قوجاەۆ قوعامدىق قاۋىپسىزدىككە توقتالدى. وتكەن اپتادا قالا بويىنشا قىلمىس 38,2 پايىزعا ازايعان. «سەرگەك» بەينەباقىلاۋدىڭ ناتيجەسىندە ءبىر اپتادا 14105 قۇقىق بۇزۋشىلىق تىركەلىپ, ونىڭ 12 مىڭى انىقتالىپ, 40 ملن تەڭگەدەن استام ايىپپۇل وندىرىلگەن.
سونداي-اق, قىسقى ماۋسىمعا دايىندىق بارىسى دا ايتىلدى. سالقىن تۇسىسىمەن كومىرگە سۇرانىس ارتادى. ول ءۇشىن ءتيىستى مەكەمەلەرگە تۇرعىندارعا قىسقا دايىندىقتى ەرتەدەن قامداۋ كەرەك ەكەندىگىن جەتكىزۋ تاپسىرىلدى. قوعامدىق كولىك ماسەلەسى دە نازاردان تىس قالمادى. وتكەن اپتادا كولىكتىك كارتانى پايدالانۋشىلاردىڭ ۇلەسى 90 پايىزعا وسكەن.
