ەلوردادا ۇلەسكەرلىك قۇرىلىستىڭ پروبلەماسى ءالى دە وزەكتى سانالادى. جاقىندا نۇر-سۇلتان قالاسىنىڭ اكىمى التاي كولگىنوۆ قۇرىلىسى ۇزاققا سوزىلعان «سادوۆىە ۆارتالى», «كومسومولسكي» جانە «انيسا» تۇرعىن ءۇي كەشەندەرىنىڭ ۇلەسكەرلەرىمەن كەزدەستى. بۇل ءۇش كوپپاتەرلى تۇرعىن ءۇي كەشەنىندە شامامەن 1,5 مىڭ ۇلەسكەر وتباسى بار.
«سادوۆىە كۆارتالى» تۇرعىن ءۇي كەشەنىنىڭ قۇرىلىسى 2013 جىلى باستالعان. بىراق 2014 جىلى ىرگەتاسىنىڭ قادالارى تۇرعىزىلعان كۇيىندە عانا قالدى. بۇگىنگە دەيىن وسى نىساننىڭ ۇلەسكەرلەرىمەن تەك قازانشۇڭقىردىڭ ماڭىندا كەزدەسكەنبىز. ودان بەرى اۋقىمدى جۇمىس جۇرگىزىلدى: تەحنيكالىق تەكسەرۋ وتكىزىلىپ, قۇرىلىسى جانداندى, ال ەڭ ماڭىزدىسى – ينۆەستورلار جۇمىلدىرىلدى.
«سادوۆىە كۆارتالى» تۇرعىن ءۇي كەشەنىنىڭ قۇرىلىسىن اياقتاۋ ءۇشىن بيۋدجەتتەن قاراجات بولىنگەن جوق. نىساننىڭ قۇرىلىسى جەكە ينۆەستورلار ەسەبىنەن سالىنىپ جاتىر.
«كومسومولسكي» تۇرعىن ءۇي كەشەنى 7 جىل بۇرىن پروبلەمالى نىسانعا اينالدى. مۇندا پاتەرلەردى 600-دەن اسا ۇلەسكەر وتباسى العان. قازىرگى ۋاقىتتا نىساندا ۆيتراجداردى مونتاجداۋ, تەرەزەلەر ورناتۋ, ليفت جابدىقتارىن مونتاجداۋ, ينجەنەرلىك جەلىلەردى ورناتۋ جانە ت. ب. جۇمىستار ءجۇرىپ جاتىر.
«انيسا» تۇرعىن ءۇي كەشەنى – سەگىز جىلدىق تاريحى بار نىسان. بۇل نىسانعا دا ينۆەستورلار تارتتىق. ولار ءوز قاراجاتى ەسەبىنەن نىساننىڭ قۇرىلىسىن اياقتايدى. ماسەلەن, 1 جانە 2-بلوكتاردا قابىرعالارىن قالاۋ جۇمىستارى, 5 جانە 6-بلوكتاردا ءمونوليتتى جۇمىستار ءجۇرىپ جاتىر» دەپ ءمالىم ەتتى ەلوردا اكىمى التاي كولگىنوۆ.
ۇلەستىك قۇرىلىستاردى اياقتاۋ ماسەلەسىن مەملەكەت باسشىسى تىكەلەي نازارىندا ۇستاپ وتىر. 2019 جىلدىڭ جازىندا پروبلەمالى 150 كوپپاتەرلى تۇرعىن ءۇي كەشەنى بولسا, قازىر ونىڭ 90-ى اياقتالدى. قالعان نىساندار بويىنشا قادامدىق ءىس-شارالار جوسپارى بار.
