استانادا ەل تاۋەلسىزدىگىنىڭ 25 جىلدىعىنا ارنالعان «قۋاتتى ءوڭىر – قۋاتتى قازاقستان» باعدارلاماسىنىڭ اياسىندا جامبىل جانە پاۆلودار وبلىستارىنىڭ كۇندەرى وتۋدە. اۋليەتا جانە كەرەكۋدەن ەلورداعا ات شالدىرعان قوناقتار بىرقاتار الەۋمەتتىك جانە مادەني ءىس-شارالاردى وتكىزۋدى باستاپ كەتتى.
بۇگىن جامبىلدىق دەلەگاتسيا جىر الىبى جامبىل جاباەۆ پەن ءباھادۇر باۋىرجان مومىشۇلىنىڭ ەسكەرتكىشتەرىنە گۇل شوقتارىن قويىپ, تاعزىم ەتۋىمەن جۇمىستارىن باستادى. وندا وبلىس əكىمىنىڭ ورىنباسارى ەرقانات مəنجۋوۆ پەن پارلامەنت ءمəجىلىسىنىڭ دەپۋتاتى باقىتجان ەرتاەۆ ءسوز سويلەپ, Əۋليەاتا توپىراعىنان تۇلەگەن الىپتاردىڭ ەرەن ەڭبەكتەرى مەن تۇلعالىق كەلبەتتەرى جونىندە əڭگىمەلەدى. ولارعا دەگەن ۇرپاق قۇرمەتىنىڭ ورتايمايتىنىن ايتتى.
بۇدان سوڭ جامبىلدىقتار ۇلتتىق مۋزەيگە جەتپىسكە جۋىق تاريحي جəدىگەر تارتۋ ەتتى. مەكەمە ديرەكتورى دارحان مىڭباي مۋزەي قورىنىڭ قۇندى دۇنيەلەرمەن تولىققانىنا ريزاشىلىعىن ءبىلدىرىپ, əۋليەاتالىق əرىپتەستەرىنە العىسىن جەتكىزدى.
ال تاڭعى ساعات 9.00-دەن باستاپ بەيبىتشىلىك كوشەسىندەگى قالالىق الاڭدا جامبىلدىق اۋىل شارۋاشىلىعى ونىمدەرىن وندىرۋشىلەردىڭ جارمەڭكەسى وتۋدە. بەرەكە مەن مەرەكەگە تولى شارا ەرتەڭ دە جالعاساتىن بولادى. سونداي-اق, وسى كۇندەرى ەلوردا تۇرعىندارى مەن قوناقتارى «بەيبىتشىلىك جانە كەلىسىم سارايىندا «قازاقستاندا جاسالعان» اكتسياسى اياسىندا وتەتىن جامبىل وبلىسى كاسىپورىندارى ونىمدەرىنىڭ كورمەسىن تاماشالاۋعا مۇمكىندىكتەرى بار.
ءدال قازىر «حان شاتىر» ساۋدا ويىن-ساۋىق ورتالىعىنىڭ الاڭىندا ءوتىپ جاتقان جارمەڭكەگە پاۆلودارلىق تاۋار وندىرۋشىلەر 700 توننادان استام ءونىم اكەلىپتى. ونىڭ 90 توننادان استامى ەت پەن ەت ونىمدەرى, 300 تونناسى كارتوپ, 140 تونناسى كوكونىس, 150 تونناسى باسقا دا ازىق-تۇلىكتەر ەكەن.الاڭعا كەلىپ, سورەلەردى ارالاعان استانا اكىمى اسەت يسەكەشەۆ جارمەڭكەنىڭ ءوتۋ بارىسىمەن تانىستى.
بۇل جەردە ءوتىپ جاتقان جارمەڭكەدە حالىققا ازىق-تۇلىكپەن قاتار ءتۇرلى دايىن تاعامدار دا ساتىلۋدا. ي. بايزاقوۆ اتىنداعى پاۆلودار وبلىستىق فيلارمونياسىنىڭ ارتىستەرى ونەرىن ورتاعا سالىپ, شارانىڭ كورىگىن قىزدىرۋدا. الاڭدا ءتۇرلى سپورتتىق شارالار دا وتۋدە.
«تاريحى تەرەڭ تارازدان تاعزىم» اكتسياسىنىڭ شەڭبەرىندە جامبىلدىق ونەر ۇجىمدارى ەلورداعا بىرنەشە قويىلىم الىپ كەلگەنىن ايتا كەتەيىك. جامبىل وبلىستىق قازاق دراما تەاترى م.اۋەزوۆتىڭ پوۆەسىنىڭ جەلىسى بويىنشا قويعان ن. ءورازاليننىڭ «قيلى زامان» تاريحي دراماسىن جانە م. اۋەزوۆتىڭ «ەڭلىك-كەبەك» تراگەدياسىن جاستار تەاترىنىڭ ساحناسىنان تاماشالاي الاسىزدار. ال جامبىل وبلىستىق ورىس دراما تەاترىنىڭ رەپەرتۋارىنداعى س. مارشاكتىڭ «كوشكين دوم» اتتى بالالارعا ارنالعان ەرتەگىسىن جəنە ش. ايتماتوۆتىڭ پوۆەسىنىڭ جەلىسى بويىنشا «پەگي پيوc, بەگۋششي كراەم موريا» قويىلىمىن, ف.بۋلياكوۆتىڭ «ۆىحوديلي بابكي زامۋج» كومەدياسىن م. گوركي اتىنداعى مەملەكەتتىك اكادەميالىق ورىس دراما تەاترىندا كورۋ مۇمكىندىگىڭىز بار.
اسحات رايقۇل
