استاناداعى «قازمەديا حولل» كونتسەرت زالىندا «ءان ايتقىم كەلەدى» اتتى العاشقى مۋزىكالىق شوۋ ءوتتى. وندا الدىن الا ىرىكتەۋدەن وتكەن, 18 جاستان اسقان 20 ادام ونەرلەرىن كورسەتتى. سونىڭ ەڭ ۇلكەنى 67 جاستا بولدى.
جوباعا قاتىسۋشىلار ءبىر اي بويى ۆوكالدان, ستيلدەن جانە ساحنالىق شەبەرلىكتەن ساباقتاردى ءوتىپ, دايىندالدى. ۇيىمداستىرۋشىلار ۇلكەن ساحنادا ءان سالۋدى ارمانداعان ادامدارعا وسىنداي مۇمكىندىك بەرۋدى ماقسات ەتىپ قويدى. قاتىسۋشىلاردىڭ ونەرىن بەلگىلى انشىلەر سارالاپ, اقىل-كەڭەستەرىن بەردى.
جوبا اۆتورى, رەجيسسەر باقىتجان ءتاجينوۆتىڭ ايتۋىنشا, كومانداعا ءوز ءىسىنىڭ ناعىز شەبەرلەرى تارتىلدى. ولار بيدەن, يميدجدەن, ۆوكالدان شەبەرلىك ساباقتارىن وتكىزدى. سونىڭ ءبىرى – «ح-فاكتور» جوباسىنىڭ وڭىرلىك فيليالىنىڭ جەتەكشىسى, ءانشى ۆلاديمير ليگاي ونەر جولىن ەندى باستاعان ارتىستەر باستاپقىدا قانداي قاتەلەرگە ۇرىناتىنىن ايتىپ, وندايدان ساقتاندىرۋعا تىرىستى.
پاريجدە وتكەن ءسان اپتالىعىندا «Fashion Global» startup-جوباسىن جەڭىپ العان ديزاينەر, «Zeken» ءسان ءۇيىنىڭ نەگىزىن قالاۋشى قايروللا ابىشەۆ وبراز تاڭداۋ مەن ستيلدەن اقىل-كەڭەس بەردى.
جالپى, جىل اياعىنا دەيىن ۇيىمداستىرۋشىلار وسىنداي بەستەن استام شوۋ وتكىزىپ, قورىتىندى كونتسەرتتى جەلتوقسان ايىندا وتكىزۋدى جوسپارلاپ وتىر. جۋىردا شوۋدىڭ ەكىنشى ماۋسىمىنا ىرىكتەۋ جاريالانادى.
امانعالي قالجانوۆ
