ۇلى دالا ءۇنى
مەرەكە كۇنى استانانىڭ اسپانىن دومبىرانىڭ داۋىسى كۇمبىرلەتتى. قازاعىمىز سالتانات قۇرىپ, «بايتەرەكتىڭ» تۇبىندە بەس ءجۇز كۇيشى كۇي توكتى. قالالىق مادەنيەت جانە سپورت باسقارماسىنىڭ باسشىسى بولات ماجاعۇلوۆ باستاعان دومبىراشىلار فلەشموبىنا مىڭداعان كورەرمەن جيىلدى.
اشىق اسپان استىنداعى فلەشموبتى «NOMAD» ينسترۋمەنتالدى جوباسى مەن قازاق ۇلتتىق ونەر ۋنيۆەرسيتەتىنىڭ وقىتۋشىلارى مەن ستۋدەنتتەرى كۇي تارتىسىمەن باستادى. سودان كەيىن حالىق ىشىنەن جينالعان 500 دومبىراشى ءبىر ادامداي «سارىارقا», «بالبىراۋىن», «اداي» جانە «ەركە سىلقىم» سىندى عاجاپ كۇيلەردى ورىندادى. وركەستردە اۋەسقويلار دا, شەبەر دومبىراشىلار دا بولدى. سوعان قاراماستان, اۋەسقوي ونەرپازدار مۋزىكانتتارمەن تەڭ دارەجەدە ونەر كورسەتتى. شاراعا قاتىسقان استانالىق نۇرالى جۇنىسباەۆ: «نەگىزگى ماماندىعىم – پروگرامميست. دومبىرانى مەكتەپ جاسىنان باستاپ ۇيرەندىم. اپام Dombyra-Flashmob تۋرالى جارنامانى الەۋمەتتىك جەلىدەن كورىپ قالىپ, ماعان ايتتى. وسى تەكتەس شاراعا العاش رەت قاتىسۋىم. باسىندا ءبىراز تولقىدىم. ءبىز ويناعان كۇيلەردى بارشا حالىق جاقسى بىلەدى عوي. قالامىزدا وسىنداي شارالار كوپتەپ بولسا ەكەن دەيمىن» دەپ تىلەگىن ءبىلدىردى.
شارادا ەل اراسىندا ءجۇرىپ, ونەرىمەن حالىقتىڭ ىقىلاسىنا بولەنگەن ازاماتتار دا توبە كورسەتتى. «التىن دومبىرا» سىيلىعىنىڭ ەكى دۇركىن يەگەرى مۇحتار نيازوۆ, حالىقارالىق, رەسپۋبليكالىق ايتىستاردىڭ جەڭىمپازى مەيىربەك سۇلتانحان جانە ايتىسكەر-اقىن سەرىكزات دۇيسەنعازين دومبىرا شەرۋىنە قاتىستى. سونداي-اق, كونتسەرت بارىسىندا كورەرمەن اراسىندا ءۇش دومبىرا ۇتىسقا سالىندى. فلەشموبقا دەيىن بىرنەشە كۇن قالعاندا Dombyra-Flashmob رەسمي ينستاگرام پاراقشاسىندا قاتىسۋشىلاردى تىركەۋ جاريالانعان بولاتىن. جۇزدەن استام تىركەلگەندەرگە رەتتىك ءنومىر تاراتىلدى. سول نومىرلەر بويىنشا كەزدەيسوق مۋزىكالىق اسپاپتاردىڭ يەلەرى انىقتالدى.
قازاقتىڭ قارا دومبىراسىنىڭ دۇركىرەگەن ءۇنى كوپشىلىكتىڭ ارقاسىن قوزدىرىپ, رۋحىن كوتەرىپ تاستادى. ءبىز دە «رۋحاني جاڭعىرۋدىڭ» ءبىر كورىنىسىنە كۋاگەر بولدىق. بىرلىك كۇنى ۇيىمداستىرىلعان «ۇلى دالا ءۇنى» اتتى دومبىراشىلار شەرۋى ەلوردانىڭ 20 جىلدىعىنا ارنالادى.
گۇلدانا تالعاتقىزى