«بوزوق» تاريحي-مادەني مۋزەي قورىعىنىڭ ۇيىمداستىرۋىمەن التىن وردانىڭ 750 جىلدىعىنا ارنالعان «ۇلى دالا مۇراسى» اتتى عىلىمي-تاجىريبەلىك سەمينار ءوتتى.
جيىندا جوشى ۇلىسىنىڭ قازاق حاندىعىن قۇرۋداعى تاريحي ساباقتاستىعى, حالىقارالىق ءتۋريزمدى دامىتۋ ءۇشىن ەلىمىزدىڭ تاريحي-مادەني مۇراسىن ساقتاۋ جانە ناسيحاتتاۋ ماسەلەلەرى تالقىلاندى.
سەميناردىڭ اشىلۋىندا ءسوز العان قر مادەنيەت جانە سپورت مينيسترلىگىنىڭ مادەنيەت جانە ونەر ىستەرى جونىندەگى دەپارتامەنتىنىڭ ديرەكتورى كۇمىس سەيىتوۆا مەملەكەت باسشىسى قاسىم-جومارت توقاەۆتىڭ قىركۇيەكتەگى قازاقستان حالقىنا ارناعان جولداۋىندا التىن وردانىڭ 750 جىلدىعىن اتاپ وتۋگە ەرەكشە ماڭىز بەرىلىپ وتىرعاندىعىن جەتكىزىپ, بۇل باسقوسۋ – سول اۋقىمدى شارانىڭ باسى دەپ ەسەپتەيمىن دەدى.
«بوزوق» تاريحي-مادەني مۋزەي قورىعىنىڭ ديرەكتورى ساۋلە بۋرباەۆا دا التىن وردا تۋرالى سالماقتى وي قوزعادى.
– شىن مانىندە, قازاق جۇرتى – التىن وردانىڭ تىكەلەي مۇراگەرى سانالادى. التىن وردا نەمەسە جوشى ۇلىسى ەۋرازيا ايماعىندا ءومىر سۇرگەن قۋاتتى مەملەكەت بولدى. وسى ايماقتا ورنالاسقان ەلدەر جوشى ۇلىسىنىڭ اسەرىن باستان وتكەردى. التىن وردا ءتۇرلى حالىقتاردىڭ مادەنيەتىن بىرىكتىرىپ, ونى جوعارى دەڭگەيگە جەتكىزدى. قازاندا التىن وردانىڭ 750 جىلدىعىنا ارنالعان حالىقارالىق فورۋم ءوتتى. كورشى قىرعىز ەلىنىڭ استاناسى بىشكەكتە كورمە اشىلدى. بيىلعى مامىردا پاريجدە تۇركى اكادەمياسى يۋنەسكو-مەن بىرلەسىپ, فورۋم وتكىزدى. بىزدە دە بۇل ايتۋلى كۇن –قازاقستان پرەزيدەنتىنىڭ تاپسىرماسىمەن مەملەكەتتىك دەڭگەيدە اتاپ وتىلەدى, – دەي كەلىپ, ەلوردانىڭ ىرگەسىندەگى «بوزاق» شاھارىنىڭ تاريحى مەن جوسپارى جايىندا ايتىپ ءوتتى. «بوزاق» قالاسىنىڭ ىرگەلەس اۋماعىنا تاريحي-مادەني پارك سالىنادى. وندا عىلىمي جانە شىعارماشىلىق جوبالاردى جۇزەگە اسىراتىن الاڭ بولادى. سونداي-اق كونە شاھار – يننوۆاتسيالىق جوبا رەتىندە ەلدىڭ تۋريستىك كارتاسىنداعى مادەني ورتالىققا اينالادى» دەدى ول.
ال ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ پروفەسسورى كوپجاسار مەڭدىگەرەەۆ رەسەيدىڭ استراحان وبلىسىندا التىن ورداعا ارنالعان مۋزەي بار ەكەندىگىن ايتتى.
«مەن ونى وسىدان 20 جىل بۇرىن كورگەم. استراحان وبلىسى قارابايلى اۋدانىندا التىن وردانىڭ بيلەۋشىسى باتۋ حان الاش ورداسىن تىككەن جەرگە – اسپان استىنداعى مۋزەي جاساپ قويعان. مۇراجايدىڭ كومپوزياتسياسى ەرەكشە كوز تارتادى. حاننىڭ سارايى, كۇتۋشىلەرگە ارنالعان ورىن, مونشا, ات بايلايتىن كەرمە – قىسقاسى, سول داۋىردەگى كورىنىستى كوز الدىڭىزعا اكەلەدى. ورتا عاسىرداعى جادىگەرلەرگە دە باي» دەيدى عالىم.
سونىمەن قاتار سەميناردا رەسپۋبليكانىڭ ءار وڭىرىنەن كەلگەن عالىمدار ءوز باياندامالارىندا التىن وردا مەن جوشى ۇلىسى تۋرالى تاريحي دەرەكتەرگە توقتالدى. كەيبىر تاريحشىلار ءبىز دە ورتا عاسىر تاريحىن زەرتتەيتىن ماماندار تاپشى ەكەندىگىن ايتىپ, سوعان جاستاردى باۋلۋ كەرەك دەدى.
بەرىك شامشىكەنوۆ
