ەلوردادا «مۇحتار اۋەزوۆتىڭ رۋحاني شاكىرتتەرى» اتتى ءى قالالىق عىلىمي جوبالار بايقاۋى ءوتتى. شارانىڭ ماقساتى – وقۋشىلاردى جازۋشىنىڭ ادەبي مۇراسىمەن تانىستىرۋ, ناسيحاتتاۋ, زەرتتەۋ. بايقاۋ ۇيىمداستىرۋشىسى م.اۋەزوۆ اتىنداعى №86 مەكتەپ-گيمنازيا باسشىسى بازاركۇل سىزدىقوۆانىڭ ايتۋىنشا, شارا بالالار جىلى اياسىندا وتكىزىلىپ وتىر.
– جازۋشى, دراماتۋرگ, پروفەسسور, پۋبليتسيست مۇحتار اۋەزوۆتىڭ 125 جىلدىعىنا وراي ءارى بالالار جىلىندا ءى قالالىق عىلىمي جوبالار بايقاۋىن ۇيىمداستىرىپ وتىرمىز. وقۋشىلار جوبانى ءۇش سەكتسيا بويىنشا قورعايدى. ونلاين فورماتتا وتكەن عىلىمي جوبالار كونكۋرسىنىڭ العاشقى كەزەڭىنە قالاداعى 98 ءبىلىم بەرۋ مەكەمەسىنەن 150 وقۋشى ءوز جوبالارىن ۇسىندى. ەكىنشى كەزەڭگە 60 وقۋشى ءوتىپ, قورىتىندى كەزەڭگە جولداما الدى. دەمەۋشىلەرىمىزدىڭ ارقاسىندا جەڭىمپازدارعا نوۋتبۋك, 2 پلانشەت, 3 تەلەفون جانە قۇلاققاپ سىيعا بەرىلەدى. ال وقۋشىلاردىڭ جەتەكشىلەرى عىلىمي كونفەرەنتسياعا قاتىسىپ, ءبىر-بىرىمەن تاجىريبە الماسادى, – دەيدى مەكتەپ باسشىسى.
بايقاۋعا ارنايى قوناق رەتىندە نۇر-سۇلتان قالاسىنىڭ ءبىلىم بەرۋدى جاڭعىرتۋ ورتالىعى, «استانا دارىنى» دارىندىلىقتى دامىتۋ جانە پسيحولوگيالىق سۇيەمەلدەۋ ورتالىعى, مەملەكەت تاريحى ينستيتۋتىنىڭ قىزمەتكەرى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىلارى شاقىرىلدى.
شاراعا قاتىسقان قوناقتار م.اۋەزوۆكە ارنالعان ساحنالىق كومپوزيتسيانى تاماشالاپ, قورىتىندى ادەبي-اۋەزدى كەشكە قاتىستى. قاتىسۋشىلار 3 سەكتسيا بويىنشا عىلىمي جوبالارىن قورعادى. اتاپ ايتساق, مۇحتار اۋەزوۆتىڭ ادەبيەتتانۋ عىلىمىنداعى ورنى, تاريح جانە الەم ادەبيەتى. كونكۋرس جەڭىمپازدارى مەن دايىنداعان جەتەكشىلەرى ديپلوم جانە باعالى سىيلىقتارمەن ماراپاتتالدى.
ايزادا جايىققىزى
