تاريحي سانانى جاڭعىرتىپ, ۇلتتىڭ ۇلى قاسيەتىن ارداقتاۋدىڭ ءبىر ءتاسىلى ۇلىلاردى ۇلىقتاپ, بابالار رۋحىنا تاعزىم ەتۋ دەسەك, وتكەن 2 جىل قازاقستان ءۇشىن ۇلىلارىن ۇلىقتاعان, بابالار رۋحىنا تاعزىم ەتكەن جىل بولدى.
2019 جىلى تامىز ايىندا پرەزيدەنت قاسىم-جومارت توقاەۆ 2020 جىلى شىعىستىڭ ۇلى ويشىلى ءابۋ ناسىر ءال-ءفارابيدىڭ 1150 جىلدىق مەرەيتويى مەن ۇلى ابايدىڭ 175 جىلدىعىن اتاپ ءوتۋ ءۇشىن مەملەكەتتىك كوميسسيا قۇرۋدى تاپسىرىپ, ارناۋلى قاۋلى قابىلدادى. وسى قاۋلى نەگىزىندە مەرەيتويعا دايىندالۋ جانە ونى وتكىزۋگە جاۋاپتى ارنايى مەملەكەتتىك كوميسسيا قۇرىلدى. مەملەكەتتىك كوميسسيا مۇشەلەرى كەلىپ تۇسكەن ۇسىنىستاردى مۇقيات تالقىلاپ, قوس مەرەيتويعا دايىنداۋ جانە وتكىزۋ جونىندەگى جالپىرەسپۋبليكالىق جوسپارلاردى بەكىتتى. جوسپارعا سايكەس, ءابۋ ناسىر ءال-ءفارابيدى ۇلىقتاۋ ماقساتىندا حالىقارالىق, رەسپۋبليكالىق جانە وڭىرلىك دەڭگەيدە 50-دەن استام ءىس-شارا وتكىزۋ جوسپارلانسا, اباي قۇنانبايۇلىنىڭ مەرەيتويىن مەرەكەلەۋ جوسپارى 80 تارماقتى قامتىدى. بۇلاردىڭ ىشىندە حالىقتىڭ بارلىق بۋىنىن قامتيتىن ارنايى جوبالار, عىلىمي تالداۋلار, قوعامدىق ماڭىزدى جانە مادەني-بۇقارالىق ءىس-شارالار بار.
مەرەيتوي اياسىندا ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىن مۋزەەفيكاتسيالاۋ جانە اقىن ەسىمىمەن بايلانىستى تاريحي-مادەني مۇرا وبەكتىلەرىنە عىلىمي-رەستاۆراتسيالاۋ جۇمىستارى جۇرگىزىلدى. 10 تامىز اباي كۇنى رەتىندە بەلگىلەنىپ, قازاقستان رەسپۋبليكاسىنىڭ مەملەكەتتىك مەرەكەلەر كۇنتىزبەسىنە ەنگىزىلدى. اباي ومىرىنەن, اباي تاعىلىمىنان سىر شەرتەتىن بىرنەشە فيلم ءتۇسىرىلدى. ەڭسەلى ەسكەرتكىشتەر اشىلدى.
مەملەكەت باسشىسى قاسىم-جومارت توقاەۆتىڭ جارلىعىمەن تاۋەلسىزدىكتىڭ 30 جىلدىعى اياسىندا 2021 جىلى جامبىل جاباەۆتىڭ 175 جىلدىق مەرەيتويىن جوعارى دارەجەدە ۇيىمداستىرىپ, ونىڭ مازمۇندىق دەڭگەيىن قامتاماسىز ەتۋ قولعا الىندى. وسى ماقساتتا ارنايى مەملەكەتتىك كوميسسيا قۇرىلدى. تۇلعا تويىن دايىنداۋ جانە وتكىزۋ جونىندەگى 25 اقپان كۇنى وتكەن مەملەكەتتىك كوميسسيانىڭ ءبىرىنشى وتىرىسىندا مەرەيتويلىق ءىس-شارالاردىڭ جالپىرەسپۋبليكالىق جوسپارى بەكىتىلدى. ناتيجەسىندە كوميسسيا شەشىمىمەن جامبىل جىلى اياسىندا بۇكىل ەل بويىنشا 500-دەن استام الەۋمەتتىك-مادەني, اعارتۋشىلىق, عىلىمي جانە ءبىلىم بەرۋ جوباسى ىسكە اسىرۋ تۋرالى جوسپار جاسالدى. اقىن مەرەيتويىنا ارنالعان ءىس-شارالار رەسپۋبليكامىزدىڭ بارلىق وڭىرلەرىندە جانە شەتەلدە جىل بويى وتكىزىلدى. اقىن ومىرىنەن فيلمدەر ءتۇسىرۋ, ولەڭدەرىنىڭ جاڭا جيناقتارىن شىعارۋ, كىتاپ كورمەلەرىن ۇيىمداستىرۋ, مەرەيتويلىق مونەتا, پوشتا ماركاسىن ازىرلەۋ سىندى جۇمىستار دا نازاردان قاعىس قالعان جوق.
