«ءۇمىت» انىقتاعان ۇزدىكتەر
جۇمىسپەن قامتۋ جانە الەۋمەتتىك باعدارلامالار باسقارماسىنىڭ قولداۋىمەن ءمۇمكىندىگى شەكتەۋلى بالالاردى ومىرگە بەيىمدەۋ ماقساتىندا «ءۇمىت» اتتى اربامەن بيلەۋ سايىسى ءوتتى.
تاعدىردىڭ جازۋىمەن ارباعا تاڭىلعانداردىڭ تاماشا ونەرىنىڭ ءبىرى – ارباداعى بي (wheelchair dancing) دەپ اتالادى. ونەردىڭ بۇل ءتۇرى وتكەن عاسىردىڭ الپىسىنشى جىلدارى العاش رەت انگليادا پايدا بولىپ, ەۋروپاعا تاراعان ەدى. ءبۇگىندە مۇمكىندىگى شەكتەۋلى جانداردىڭ جىگەرىن دە, تالانتىن دا ۇشتاعان قوس دوڭعالاق ۇستىندەگى بي ەلوردالىقتارعا دا جات ەمەس.
– جاس بيشىلەرىمىز ەكى اي بويىنا تىنىمسىز دايارلىقتان ءوتتى. سونىڭ ارقاسىندا سوفيا كليموۆا, مارات سەيتىموۆ, التىنشاش مۇقاتاەۆا, مۇحتار داۋرەن ەسىمدى بيشىلەرىمىز ۇزدىك ونەرىمەن ماراپاتقا يە بولدى, – دەيدى «ايالا» قوعامدىق بىرلەستىگىنىڭ جەتەكشىسى سالتانات مۋسينا.
«جالپى, ەرەكشە سايىسقا قاتىسقانداردىڭ ءبارى – جەڭىمپاز. ويتكەنى, ولار بويىنداعى ۇرەيدى ۇمىتكە جەڭدىرىپ, ادەمىلىككە ۇمتىلعان جان-دۇنيەسى ارقىلى وزدەرىنىڭ قاتار-قۇربىلارىنا ۇلگى بولا ءبىلدى» دەيدى ۇيىمداستىرۋشىلار.
ايگۇل ۋايسوۆا