ەلورداداعى «ءۇمىت» داعدارىس ورتالىعى تۇرمىستىق زورلىق-زومبىلىققا تاپ بولعان ايەلدەر مەن بالالاردى جاتىن ورىنمەن قامتاماسىز ەتىپ, پسيحولوگيالىق قولداۋ كورسەتەدى. ورتالىققا 18-دەن 58 جاسقا دەيىنگى انالار كامەلەتكە تولماعان بالالارىمەن, ءوز ەركىمەن نەمەسە ءبىلىم بەرۋ, دەنساۋلىق ساقتاۋ, الەۋمەتتىك قورعاۋ جانە ىشكى ىستەر ورگاندارىنىڭ جولداماسىمەن قابىلدانادى.
«ورتالىقتا 50 توسەك-ورىن بار. زورلىق-زومبىلىققا تاپ بولىپ, بارار جەرى جوق ازاماتتار 1 ايدان 6 ايعا دەيىن ورتالىقتا تۇرىپ, الەۋمەتتىك كومەك الا الادى. بارلىق سانيتارلىق تالاپتاردى ساقتاي وتىرىپ, كومەككە مۇقتاج جانداردى قابىلداپ جاتىرمىز. دارىگەرلەرمەن تىعىز بايلانىستامىز. تۇرمىستىق زورلىق-زومبىلىق قۇرباندارى, پسيحولوگيالىق قىسىم كورگەن جانە قارجىلاي قيىندىققا تاپ بولعان قىز-كەلىنشەكتەرگە قولداۋ كورسەتەمىز. ارنايى ماماندارمەن ەكىجاقتى جۇمىس ىستەيمىز. جابىرلەنۋشىنىڭ كۇيەۋىمەن دە بايلانىس ورناتامىز. تاتۋلاسىپ جاتقاننىڭ وزىندە ءبىر جىل ءبىزدىڭ باقىلاۋىمىزدا بولادى. ءبىز جابىرلەنۋشى تاراپىندامىز, دەگەنمەن اجىراستىرۋدان اۋلاقپىز. كەرىسىنشە, شاڭىراعى شايقالعان وتباسى مۇشەلەرىن باسىن بىرىكتىرسەك, ءبىزدىڭ ماقساتىمىزدىڭ ورىندالعانى» دەيدى مەكەمە باسشىسى عاليحان كۋكانبەكوۆ.
جىل باسىنان بەرى «ءۇمىت» داعدارىس ورتالىعىنا 232 جان قابىلدانعان. بۇگىندە ورتالىقتا 54 قىزمەت الۋشى تۇرىپ جاتىر.
نايما نۇرالىقىزى
