استانا قالاسىنىڭ ءماسليحاتى كەزەكتەن تىس سايلاۋعا دايىندىق جۇرگىزۋدە. 26 ناۋرىزدا №20 سايلاۋ وكرۋگىندە قالالىق ءماسليحات دەپۋتاتى سايلانادى.
– اتالمىش وكرۋگ بويىنشا سايلانعان دەپۋتاتتىڭ مەملەكەتتىك قىزمەتكە اۋىسۋىنا بايلانىستى, قازاقستان رەسپۋبليكاسىنداعى سايلاۋ تۋرالى كونستيتۋتسيالىق زاڭىنا سايكەس, بوساعان ورىنعا جاڭادان ءماسليحات دەپۋتاتى سايلانادى, – دەپ مالىمدەدى استانا قالاسىنىڭ قالالىق سايلاۋ كوميسسياسىنىڭ توراعاسى يگىلىك جالبىروۆ.
باس قالامىز بويىنشا بۇل جۇمىستى 10 سايلاۋ كوميسسياسى, ونىڭ ىشىندەگى 2 اۋماقتىق, 1 وكرۋگتىك جانە 7 ۋچاسكەلىك كوميسسيا ۇيىمداستىرىپ, جۇزەگە اسىرادى. ءماسليحات دەپۋتاتىنا داۋىس بەرۋگە الماتى اۋدانىنىڭ №35, 36, 37, 38, 63, 64, 82 سايلاۋ ۋچاسكەلەرى اۋماقتارىندا تۇرىپ جاتقان سايلاۋشىلار قاتىسادى.
«№20 سايلاۋ وكرۋگى بويىنشا 5 ادامنان ۇسىنىس ءتۇستى. ونىڭ ىشىندە 2 ادام ساياسي پارتيا اتىنان, ياعني «نۇر وتان» پارتياسى مەن قازاقستاننىڭ حالىقتىق كوممۋنيستىك پارتياسى اتىنان ۇسىنىلدى. قالعان ۇشەۋى ءوزىن-ءوزى ۇسىنۋ بويىنشا تىركەلىپ وتىر. ۇمىتكەرلەردىڭ 4-ەۋىنىڭ ءبىلىمى جوعارى, سونىمەن بىرگە ورتاشا ارناۋلى ءبىلىمى بار ءبىر ازامات تىركەلگەن. بارلىق كانديداتتار قازاقستان رەسپۋبليكاسىنداعى سايلاۋ تۋرالى كونستيتۋتسيالىق زاڭىنا سايكەس, تەكسەرۋدەن وتكەن. وسى جىلدىڭ 11-25 ناۋرىز ارالىعىندا ۇمىتكەرلەر سايلاۋالدى ۇگىت-ناسيحاتىن جۇرگىزىپ, ءوز سايلاۋشىلارىمەن كەزدەسە الادى. ول ءۇشىن بارلىعىنا تەڭ جاعداي قاراستىرىلعان» دەپ اتاپ ءوتتى قالالىق سايلاۋ كوميسسياسىنىڭ توراعاسى.
ايگۇل ۋايسوۆا
