ۇمىتۋعا بولمايدى
ەلورداداعى ۇلتتىق مۋزەيدە قازاقستان سۋرەتشىلەر وداعىنىڭ مۇشەسى الماس سىرعابايدىڭ «ۇمىتۋعا بولمايدى» اتتى كورمەسى اشىلدى. ساياسي قۋعىن-سۇرگىن جانە اشارشىلىق قۇرباندارىنىڭ رۋحىنا تاعزىم رەتىندە ۇيىمداستىرىلعان كورمە ءبىر ايعا سوزىلادى.
اۆتوردىڭ تۋىندىلارىندا ادەبيەت پەن تاريحتىڭ ۇشتاساتىنىن بايقايمىز. اقيىق اقىن مۇقاعالي ماقاتاەۆتىڭ شىعارماشىلىعىن كارتينالارىنا كوپ ارقاۋ قىلاتىن سۋرەتشى-كەسكىندەمەشى «رايىمبەك! رايىمبەك» پوەماسىنىڭ يلليۋستراتسياسىن جاسادى. اسىرەسە, «الاش» پارتياسى, الاشوردا قايراتكەرلەرى ونىڭ شىعارماشىلىعىندا ەرەكشە ورىن الادى. اتاپ ايتقاندا, وسىعان دەيىن ءاليحان بوكەيحان, احمەت بايتۇرسىنۇلى, مۇحامەتجان تىنىشباەۆ, ماعجان جۇماباەۆ, ت.ب. جازىقسىز جاپا شەككەن ۇلت تۇلعالارىنىڭ بەينەسىن كەسكىندەدى. بۇل جولعى جەكە كورمەسىنىڭ تاقىرىبى دا ونەردە ۇستانعان باعىتىنان الشاقتاعان جوق.
كەشەگى ساياسي قۋعىن-سۇرگىن جىلدارىنداعى قاسىرەتتى سۋرەت تىلىمەن سويلەتكەن اۆتور «اقتابان شۇبىرىندى, القاكول سۇلاما» زامانىنان بەرى قاراي قازاق باسىنا تۇسكەن ناۋبەتتى كوز الدىمىزعا كەلتىردى.
كورمەگە بارلىعى 20 كارتينا قويىلدى. ونى تاماشالاپ جۇرگەنىمىزدە ارقالى اقىن سەرىك اقسۇڭقارۇلىنىڭ «جيىرماسىنشى عاسىردىڭ جيىرما ءساتى» اتتى پوەما-پانوراماسى اراسىندا ساباقتاستىقتى اڭعاردىق. «وتكەندى ەسكە الۋ – بولاشاقتى بولجاۋ. قۋعىن-سۇرگىن قۇرباندارىن ەسكە الۋ – قازاق تاريحىن ەسكە الۋ, الاشتى ارداقتاۋ دەپ باعالاعانىمىز ابزال. 20 كارتينا 20-عاسىرداعى
20 ءساتتىڭ ىشقۇساسى بولعان شەردى تارقاتادى, ويلاندىرادى, سانانى جاڭارتادى, جاستارعا باعىت-باعدار بەرەدى» دەگەن نۇر-سۇلتان قالاسى سۋرەتشىلەر وداعىنىڭ توراعاسى جانۇزاق ءمۇساپىردىڭ ءسوزى دە بۇل ويىمىزدى بەكىتە ءتۇستى.