دەمالىس كۇندەرى ۇيدە بولعاننان كەيىن بىرۋاق تەلەديدارعا ءۇڭىلىپ, الدىمەن وتاندىق ارنالاردى شولاسىز. ايتەۋىر, سەنبى-جەكسەنبىدە بىزدەگى تەلەارنالار كونتسەرتتەر مەن ءتۇرلى ءازىل-شوۋلاردان بوسامايدى. بۇلاردى كورە-كورە مەزى بولعان سوڭ با, ءتىپتى, قاراعىڭىز كەلمەيدى. سوسىن امالسىز باسقا جۇرتتىڭ ارناسىنا كوشەسىز.
ءوز باسىم, رەسەيدىڭ «كۋلتۋرا» ارناسىنداعى كەزىندە سول مەملەكەتتىڭ مادەنيەت ءمينيسترى بولعان, قايراتكەر ميحايل شۆىدكوي جۇرگىزەتىن «اگورا» اتتى توك شوۋىن قىزىعىپ كورەمىن. نەگە دەيسىز عوي؟ بۇل باعدارلامادا ورىستىڭ زيالىلارى جينالىپ, ۇلت ماسەلەسىنەن باستاپ, تاريح, ادەبيەت, تەاتر, كينو, مۋزەي, قىسقاسى, وسى سالاداعى پروبلەمالاردىڭ سان قىرىن قوزعاپ, كەم-كەتىگىن تالداپ, ورەلى ويلار ايتىپ جاتادى.
ءبىزدىڭ زيالىلاردى دا بۇل ماسەلە الاڭداتادى. بىراق ولاردى تەلەەكراننىڭ تورىنە شاقىرىپ, پىكىرىن ايتقىزىپ وتىرعان ەشكىمدى كورمەيسىز. ءتورت قۇبىلامىز تۇگەل ەل سەكىلدىمىز. قازىر ءبىز ءۇشىن «شوۋ» باعدارلامالاردىڭ داۋرەنى ءجۇرىپ تۇر. الايدا بۇگىنگى مادەنيەتىمىز, ادەبيەتىمىز قانداي دەڭگەيدە, تەاترىمىزدىڭ جاعدايى قالاي, جاستار نەگە كىتاپ وقىمايدى دەگەن سان-ساۋال ءوز ۇلتىنىڭ كەلەشەگىن ويلايتىن كەز كەلگەن قازاقتى ويلاندىراتىنى انىق.
وتكەن جولى «ادەبيەت» پورتالىندا جاس تەاتر سىنشىسى ايزات قادىراليەۆانىڭ قازىرگى قازاق تەاترىنىڭ دامۋىنا كۇيىنىپ, باتىل پىكىرلەر ايتقان سۇحباتى جارىق كوردى. وسى ماسەلەنى تەلەارناداعى ارنايى باعدارلامادا سالا ماماندارىن شاقىرىپ, تالقىلاسا بولار ەدى. بىراق ءبىزدىڭ ارنالاردا تەاتر تۋرالى ءبىر باعدارلاما جوق.
جالپى, ۇلت زيالىلارىنىڭ ويلارى مەن پىكىرلەرى گازەت-جۋرنالعا بەرگەن سۇحباتتارى مەن ماقالالارىندا عانا ايتىلادى. ءبىر كەزدەرى كورنەكتى سىنشى, قايراتكەر ساعات اشىمباەۆتىڭ «پارىز بەن قارىز» باعدارلاماسىنىڭ جاريالىلىق تۇسىندا ۇلتتى وياتۋعا ىقپالى كۇشتى بولدى. عاسىر باسىندا ۇلتتىق ارنادا جۋرناليست, مارقۇم راحات مامىربەك جۇرگىزگەن «كۇلتوبە» دەگەن باعدارلامادا زيالىلار وي-پىكىرىمەن ۇلتتىق ماسەلەنى جان-جاقتى قوزعادى. قازىر بىزگە وسىنداي باعدارلامالار اۋاداي قاجەت. مۇمكىن ونىڭ رەيتينگى تومەن شىعار, بىراق حالىققا بەرەرى مول. وسىنى وتاندىق تەلەارنالاردىڭ تىزگىنىن ۇستاپ وتىرعان ازاماتتار ەسكەرسە ەكەن.
