ەلورداداعى «قازمەديا» ورتالىعىندا بايلانىس جانە اقپارات قىزمەتكەرلەرى كۇنى مەرەكەسىندە وسىمەن ەكىنشى رەت ءوتىپ وتىرعان «ۇركەر» سىيلىعىنىڭ جەڭىمپازدارىن ماراپاتتاۋعا ارنالعان سالتاناتتى كەش ءوتتى.
بيىلعى بايقاۋ وتكەن عاسىر باسىندا سايىن دالانىڭ ءۇنى مەن قۇلاعى بولعان «قازاق» گازەتىنىڭ 105 جىلدىعىنا ارنالدى. وسى جىلى كونكۋرسقا قاتىسقان ۇمىتكەرلەر سانى دا مول بولعان. ولار ون ءتورت اتالىم بويىنشا سىنعا ءتۇستى. وندا باق-تىڭ بارلىق سالاسى قامتىلدى. كەلگەن ماتەريالداردى ساراپتان وتكىزگەن قازىلار قۇرامى دا ەلگە بەلگىلى ازاماتتاردان جاساقتالعان.
ەندى كەزەكتى جۇيرىكتەرگە بەرەيىك. «ۇزدىك فوتوسۋرەت» اتالىمىندا تۇرار قازانعاپوۆ (Tengrinews.kz), «ۇزدىك رەپورتاج» اتالىمىندا يليا استاحوۆ (Today.kz), «ۇزدىك سۇحبات» اتالىمىندا گۇلزينا بەكتاسوۆا («ايقىن»), «قازاقستان تۋرالى ۇزدىك تانىمدىق ماتەريال» اتالىمىندا ياكوۆ فەدوروۆ (Yvision.kz), «ۇزدىك ايماقتىق ءباسپاسوز باسىلىمى» اتالىمىندا «جەتىسۋ» گازەتى, «ۇزدىك رەسپۋبليكالىق ءباسپاسوز باسىلىمى» اتالىمىندا «ەگەمەن قازاقستان» گازەتى توپ جاردى. «ۇزدىك حالىقارالىق ساراپتامالىق ماتەريال» نوميناتسياسىندا ساۋلە يساباەۆا (تسەنترالازيامونيتور), «ۇزدىك ساراپتامالىق ماتەريال» اتالىمىندا اسەل مۇقانوۆا («كازاحستانسكايا پراۆدا») جەڭىسكە جەتتى. «ۇزدىك جۋرناليستىك زەرتتەۋ» اتالىمىن اسقار دجالدينوۆ (Time.kz) الدى.
«ۇزدىك ايماقتىق راديوستانتسيا» اتالىمىندا «جۇلدىز FM» راديوستانساسى, ال «ۇزدىك قازاقستاندىق راديوستانتسيا» اتالىمىندا «شالقار» راديوسى يەلەندى. «ۇزدىك ينتەرنەت باق» اتالىمىندا «Informburo.kz» سايتى وزىپ شىقتى. «ۇزدىك ۆاين» نوميناتسياسىن نۇرلان باتىروۆ الدى. «استانانىڭ 20 جىلدىعىنا ارنالعان ماتەريال» اتالىمىندا بەلگىلى جۋرناليست, كەزىندە «استانا اقشامى» گازەتى باس رەداكتورىنىڭ ورىنباسارى بولعان عالىم ومارحاننىڭ اسىعى الشىسىنان ءتۇستى. بارلىق جەڭىمپازدار قوماقتى قارجىلاي جۇلدەمەن ماراپاتتالدى.
