ەلوردامىزدىڭ اي اسىپ, جىل ساناپ جاسارىپ كەلە جاتقانى بۇگىندە امبەگە ايان. ءزاۋلىم عيماراتتارى سياقتى تۇرعىندارىنىڭ دا ارمانى – اسقاق, كوڭىلى – كوكتە. استانالىقتاردىڭ جاس مولشەرى دە ۋاقىت وتە جاسارۋدا. بىزگە ءمالىم دەرەكتەرگە سۇيەنسەك, ەلوردامىزدا جىلىنا 22 600 ءسابي شاڭىراققا شاتتىق سىيلاسا, №1 پەرزەنتحانانىڭ وزىندە جەتى مىڭعا جۋىق ءسابي جارىق دۇنيە ەسىگىن اشادى ەكەن.
بولاشاقتىڭ باعبانىنداي بۇل باقىت
وسى ورايدا جارقىن ەلدىڭ بولاشاعى سانالاتىن سابيلەردىڭ, انالاردىڭ دەنساۋلىعىنا ەرەكشە كوڭىل ءبولىپ, ءتۇن قاتىپ, تاڭ اتىرىپ قىزمەت ەتۋدەن استە جالىقپايتىن №1 پەرزەنتحانا دارىگەرلەرىنىڭ قىزمەتى ايرىقشا ەكەنىن ايتۋعا ءتيىسپىز.
پەرزەنتحاناداعى گينەكولوگيا بولىمشەسىنىڭ مەڭگەرۋشىسى باقىت اناپينانىڭ ءومىر جولى دا بالالار باقىتى مەن انا تاعدىرىنا تىكەلەي بايلانىسىپ جاتىر. اگرونوم وتباسىندا تاربيەلەنگەن ول سول كەزدەگى تسەلينوگراد مەديتسينا ينستيتۋتىنا ءتۇسىپ, 1998 جىلى وقۋىن ويداعىداي ءبىتىرىپ, ەكى جىل كلينيكالىق ورديناتۋرادا, ونان سوڭ اسپيرانتۋرادا وقىدى. ءبىلىمىن تاجىريبەمەن ۇشتاستىرا بىلگەن جاس مامان 2000 جىلدان بەرى وسى پەرزەنتحانادا اكۋشەر-گينەكولوگ بولىپ قىزمەت ەتتى. 2006 جىلى ءوز سالاسىنداعى عىلىمي ىزدەنىستەرىنىڭ ناتيجەسىندە كانديداتتىق ديسسەرتاتسياسىن قورعاپ, ەكى جىلدان سوڭ گينەكولوگيا بولىمشەسىنىڭ مەڭگەرۋشىلىگىنە تاعايىندالادى. قىزمەت ەتكەن جىلدارىندا اكۋشەريا جانە گينەكولوگيا سالالارىندا قولدانىلاتىن جاڭا پەريناتالدىق تەحنولوگيالار, وپەراتيۆتى كىرىسۋ داعدىلارىن تولىق مەڭگەرگەن باقىت ۇرىمبايقىزى بۇگىندە ايەلدەرگە كۇردەلى وتالار, ونىڭ ىشىندە گينەكولوگيالىق پلاستيكالىق وپەراتسيالاردى دا جاسايدى.
«ون سەگىز جىلدىق جۇمىس تاجىريبەمدە اكۋشەريا, گينەكولوگيا سالاسىندا قولدانىلاتىن جاڭا پەريناتالدىق تەحنولوگيالاردى, وپەراتسيا داعدىلارىن مەڭگەردىم دەپ ايتا الامىن. گينەكولوگيالىق پلاستيكالىق وپەراتسيالار جاسايمىن. پەرزەنتحاناداعى ۋرگەنتتىك قىزمەتتى دە قولعا الدىق» دەپ, بىلىكتى دارىگەر ءوز سالاسىنداعى جەتىستىكتەردى ايتتى. «ۋرگەنتتىك قىزمەت دەگەنىمىز – ايەلدەرگە جاسالاتىن كۇردەلى وتا. اسىرەسە, ەگىز بالالى انالاردى بوساندىرۋ كەزىندە ءتۇرلى قيىندىقتار تۋىندايدى. ماسەلەن, ءبىر بالا باسىمەن جاتسا, ەكىنشىسى تەرىس جاتۋى مۇمكىن. انا بوسانعان ساتتە جاتىرىنا زاقىم كەلىپ, اۋىر جاعدايلارعا دۋشار بولامىز. مۇنداي جاعداي ون مىڭ ايەلدىڭ بىرىندە كەزدەسەدى. ءوز تاجىريبەمدە وسى تاقىلەتتەس 5 وقيعا بولدى» دەيدى.
باقىت ۇرىمبايقىزى ايەلدەردىڭ جۇكتىلىككە جاۋاپكەرشىلىكپەن قاراپ, ءوز ومىرىنە دە, بالا بولاشاعىنا دا زاردابىن تيگىزبەۋ ءۇشىن دايىندىق جاساۋ قاجەتتىگىن ۇنەمى ەسكە سالادى. «ەڭ الدىمەن, انا بولۋعا نيەتتەنگەن ايەلزاتى دەنەگە بالا بىتپەستەن بۇرىن تولىق دارىگەرلىك تەكسەرىستەن ءوتۋى, تۇرعىلىقتى جەرىنە بايلانىستى تىركەۋگە تۇرۋى ءتيىس» دەيدى. بۇگىندە قالا پەرزەنتحانالارىنا تىركەۋگە تۇرماستان كەلىپ جاتاتىن بوسانۋشى ايەلدەر كوپ.
ەل ورتالىعى بولعاندىقتان, استاناعا ءوز وڭىرىمىزدەن دە, كورشى ەلدەردەن دە جۇمىس ىزدەپ كەلىپ جاتاتىن ادامدار از ەمەس. «وكىنىشتىسى, قىرعىزستان, وزبەكستان سەكىلدى ەلدەردەن كەلگەن ايەلدەردىڭ جاعدايى قيىنداۋ. بۇل ايەلدەردىڭ كوپشىلىگى بازار سەكىلدى ساۋدا-ساتتىق ورىندارىندا جۇمىس ىستەيدى. سول سەبەپتى, دەنساۋلىعىنا كۇتىم جاساماعاندارى كوپتەپ كەزدەسەدى. گەموگلابيندەرى از, ەكسترەگەنيتالدىق پاتولوگياعا ءجيى ۇشىرايدى» دەيدى.
ماۋسىم ايىنان باستاپ پەريناتالدىق ورتالىق اتاۋىن الاتىن پەرزەنتحانا دارىگەرلەرىنىڭ ءبىلىمى مەن بىلىكتىلىگى دە جوعارى. گينەكولوگيا بولىمشەسىنە جەتەكشىلىك ەتەتىن باقىت اناپينا 2007 جىلى جاپونيادا «Jeica» باعدارلاماسى بويىنشا كاسىبي بىلىكتىلىگىن كوتەرسە, 2013 جىلى «بولاشاق» باعدارلاماسىمەن وڭتۇستىك كورەي رەسپۋبليكاسىندا ءوز سالاسى بويىنشا تاجىريبە جيناقتاپ, ءبىلىمىن شىڭداعان.
بالا بولاشاعىنا بايلانىستى كاسىپتى ءناسىپ ەتكەن باقىت اناپينانىڭ ومىرلىك جارى دا دارىگەر, ورتوپەد-تراۆماتولوگ. وتباسىندا ەكى قىز تاربيەلەپ وتىرعان دارىگەر-انا ولاردىڭ سالاۋاتتى ءومىر سالتىن ۇستاناتىنىن قۋانىشپەن جەتكىزدى. «ۇلكەن قىزىم كوركەم گيمناستيكامەن اينالىسادى, ال كىشىسى سپورتتىق بال بيىنە قاتىسادى. كەنجەسى دارىگەرلىكتى ۇناتادى» دەيدى.
انا جانىنىڭ اراشاشىسى
مول تاجىريبە مەن بىلىكتىلىكتى قاجەت ەتەتىن №1 پەرزەنتحانانىڭ جۇمىسى دا شاش ەتەكتەن. استانانىڭ نەگىزگى تۇرعىندارىمەن قاتار, وزگە وڭىرلەردەن, تىپتەن, كورشىلەس ەلدەردەن كەلگەن تىركەۋسىز ايەلدەرگە دە ۇزدىكسىز قىزمەت كورسەتەتىن پەرزەنتحانادا ءتۇرلى سيپاتتاعى وتالار جاسالادى. وسىعان جەدەل قارەكەت قىلارلىق تاجىريبەلى دارىگەرلەردىڭ قاجەتتىلىگى ءسوزسىز تۇسىنىكتى. اسىرەسە, لەونيد كوزلوۆ اعايدىڭ بۇل سالاداعى ەڭبەگى ۇشان-تەڭىز.
1982 جىلى كەڭەس اسكەرى قاتارىندا اسكەري بورىشىن وتەپ كەلگەن ل.كوزلوۆ تسەلينوگراد مەملەكەتتىك مەديتسينا ينستيتۋتىنىڭ دايارلاۋ بولىمشەسىنە تىڭداۋشى رەتىندە قابىلدانادى. اراعا جىل سالىپ, وسى ينستيتۋتتىڭ 1-كۋرسىنا ءتۇسىپ, 1989 جىلى ينستيتۋتتى ويداعىداي تامامداعاننان كەيىن, ينتەرناتۋرادان وتۋگە تسەلينوگراد قالاسىنىڭ №1 قالالىق اۋرۋحاناسىنا جولداما الادى.
«ينتەرناتۋرانى اياقتاعاننان بەرى بۇگىنگە دەيىن وسى پەرزەنتحانادا قىزمەت ەتىپ كەلەمىن» دەيدى ل.كوزلوۆ ەڭبەك جىلدارىنا كوز جىبەرىپ. انەستەزيولوگ-رەانيماتولوگ قىزمەتىن اتقاراتىن ول جۇمىس بارىسىندا تامىرىشىلىك ناركوز جاساۋ, پەريدۋرالدى, سەگىزسوزدىك انەستەزيا, بۇعانااستى كوكتامىرعا پۋنكتسيا جاساۋ سەكىلدى دارىگەرلىك كومەك كورسەتەدى.
«ءبىزدىڭ نەگىزگى مىندەتىمىز – اۋىر جاعدايدا تۇسكەن ايەلدەرگە جەدەل دارىگەرلىك كومەك كورسەتۋ. جۇرەك-وكپە رەانيماتسياسى, پەريدۋرالدى كەڭىستىككە پۋنكتسيا سەكىلدى انەستەزيا ادىستەرىن قولدانامىز» دەپ, جۇمىس بارىسى جايىندا باياندادى. «بالا بوسانۋ كەزىندە كوپ قان جوعالتقان ايەلدەرگە جەدەل كومەك كورسەتەمىز. «جەدەل جاردەم» كولىگى جەتكەنشە تولعاعى قىسىپ, جاعدايى قيىنداعان ايەلدەر پەرزەنتحانانىڭ قابىلداۋ بولىمىنە جەتكەنشە كوپ قان جوعالتاتىن وقيعالارى ءجيى كەزدەسەدى. وسىنداي ساتتە ءبىز تولىق دارىگەرلەر بريگاداسى بولىپ جۇكتى ايەلدى كۇتىپ الامىز, جەدەل قارەكەت قىلۋعا كىرىسەمىز» دەيدى.
انا مەن بالا ءومىرىن الىپ قالۋ ءۇشىن اراشا تۇسەتىن اق حالاتتى ابزال جانداردىڭ جۇمىستارى تاۋلىك بويى تولاستاعان ەمەس. ءبىرىنشى بىلىكتىلىك ساناتتى انەستەزيولوگ-دارىگەر لەونيد كوزلوۆ گەستوزدى ەمدەۋدىڭ زاماناۋي ادىستەرىن دە مەڭگەرگەن. ءار اداممەن تەز ءتىل تابىسىپ, ورتاق وي وربىتە الاتىن ل.كوزلوۆ – قايىرىمدى اكە, ادال جار. ومىرلىك ماقساتى ءبىر زايىبىنىڭ كاسىبى دە ورتاق, پەريناتالدى الدىن الۋ ورتالىعىندا تەراپەۆت-دارىگەر بولىپ قىزمەت ەتەدى. ەكەۋى ۇكىلەپ وتىرعان ۇلى دا قارا جاياۋ ەمەس. 1-سىنىپتى تامامداعان ول كاراتەمەن اينالىسقاندى ۇناتادى.
سالاۋاتتى تۇرمىس سالتىن ارداق تۇتقان دارىگەرلەر شاڭىراعى وتاننىڭ كىرپىشى وتباسىدان قالاناتىنىن جەتە ۇعىنعانداي.
جايىق ناعىماش
