قازاقستان رەسپۋبليكاسىنىڭ مەملەكەتتىك رامىزدەر كۇنى ەلوردا تورىندە ەرەكشە سەرپىنمەن اتالىپ ءوتتى. جاستار ساياساتى ماسەلەلەرى جونىندەگى باسقارمانىڭ ۇيىتقى بولۋىمەن ۇيىمداستىرىلعان «مەنىڭ قازاقستانىم! مەنىڭ استانام!» جانە «پاتريوتيزم تولقىنىندا» اكتسيالارى استانالىق جاستاردىڭ وتانسۇيگىشتىگىن, ەلجاندىلىعىن, بەلسەندىلىگىن كورسەتتى.
مەملەكەتتىك رامىزدەرىمىزدى ۇلىقتاۋعا جينالعان جاستار الدىمەن ەسىل وزەنى جاعالاۋىنا جينالىپ فلەش-موب ۇيىمداستىردى. بۇل بۇقارالىق شاراعا جوعارى وقۋ ورىندارى مەن كوللەدجدەردەن 500-گە جۋىق ستۋدەنت-جاس قاتىستى. مەرەكەلىك رۋحپەن جىگەرلەنگەن جاستار وتان تۋرالى, ەل جۇرەگىنە بالانعان استانا جايلى اندەردى شىرقاپ, ەسىل تولقىنىمەن تەربەتىلىپ بي بيلەدى.
– مەنىڭ تۋعان ەلىم-وتانىم – قازاقستاننىڭ مەملەكەتتىك رامىزدەرى كۇنى ەلىمىزدىڭ ەرەكشە مەرەكەسى دەپ بىلەمىن. تۋىمىز بەن ەلتاڭبامىز ەلدىگىمىزدىڭ باستى بەلگىسى بولىپ تابىلادى. ال ءانۇرانىمىز شىرقالعاندا, مەنىڭ جۇرەگىم قاشاندا تولقىپ تۇرادى, شاتتىققا بولەنەدى. بۇگىن دە وسى شاراعا قاتىسىپ, سونداي كۇيگە ءتۇسىپ تۇرمىن. سوندىقتان دا مەملەكەتتىك رامىزدەرىمىزدى قۇرمەتتەۋ مەن ۇلىقتاي ءبىلۋ ءار قازاقستاندىقتىڭ قاسيەتتى پارىزى بولسا دەپ تىلەيمىن, – دەيدى وسى شاراعا قاتىسۋشى ستۋدەنت ايجان قاسىموۆا.
ەسىل ۇستىندەگى زاۋلاعان كەمەدە قازاقستان تۋىن جەلبىرەتكەن جاستاردىڭ كوڭىل-كۇيى استانا جۇرتشىلىعىنا ەلدىك رامىزدەرىمىزدىڭ اسا قۇندىلىعىن ايشىقتاپ كورسەتكەندەي اسەر بەردى. كوك بايراقتى كوتەرىپ, وتاندى جىرعا قوسقان جاستارعا قول بۇلعاپ ريزاشىلىعىن ءبىلدىرىپ جاتقان ادامدارعا قاراپ وسىنداي ويعا بەرىلدىك.
ەسىلدەگى ەلدىكتى اسپەتتەگەن شارادان كەيىن «داۋلەت» سپورت كەشەنىندە وتكەن «مەنىڭ قازاقستانىم! مەنىڭ استانام!» اتتى اكتسيا دا ەلوردا تورىندەگى اتالىپ وتىلگەن مەرەكەنىڭ ءمان-ماعىناسىن ايشىقتاي ءتۇستى. بۇل شاراعا جاستارمەن قاتار مەملەكەتتىك ورگاندار مەن قوعامدىق ۇيىمداردىڭ وكىلدەرى قاتىسىپ, ەلدىك رامىزدەرىمىزدى ۇلىقتاۋعا ارنالعان تەاترلاندىرىلعان قويىلىمداردى تاماشالادى. پرەزيدەنت پولكىنىڭ قۇرمەتتى قاراۋىلى تۋىمىز بەن ەلتاڭبامىزدى الىپ شىققاندا ءانۇرانىمىز شىرقالىپ, كەشەن ىشىندەگى بارلىق ادام قولدارىن جۇرەكتەرىنە قويىپ, سالتاناتتى شارانىڭ رۋحىن سەزىندى. اكتسيا بارىسىندا قازاقستان تۋىن تالاي حالىقارالىق جارىستاردا بيىكتەن جەلبىرەتكەن سپورتشىلار دانيار ەلەۋسىنوۆ پەن ءىلياس سۇلەيمەنوۆ ءسوز سويلەپ, «بايتەرەك». «اقسەلەۋ», «ارلان» توپتارى مەن بىرقاتار ەسترادا جۇلدىزدارى ءان شىرقادى.
كەنجە قونىسباي
